Günahdır səni sevmək

Vikipediya, açıq ensiklopediya
Jump to navigation Jump to search
Günahdır Səni Sevmək
Fotoqrafiya
Müəllif(lər) Orxan Bahadırsoy
Janr Roman
Orijinalın dili Azərbaycan dili
Orijinalın nəşr ili 2014
Nəşriyyat Qanun nəşriyyatı
Səhifə 132[1] (yumşaq cild)

Günahdır Səni Sevmək - Azərbaycan yazıçısı Orxan Bahadırsoy tərəfindən yazılmış sevgi romanıdır.[2] Əsərdə İlyas və Mövlan adlı iki gəncin sevgisindən bəhs edilir. Roman 2014-cü ildə Qanun nəşriyyatı tərəfindən nəşr edilmişdir.

Məzmunu[redaktə | əsas redaktə]

Romanda əsas hadisələr gənc azərbaycanlı oğlan olan İlyasın orta məktəbi bitirdikdən sonra Bakıdakı universitetlərdən birində Psixologiya fakultəsinə qəbul olmasından sonra başlayır. İlyas qrup yoldaşı olan Mövlan adlı bir oğlana vurulur, lakin cəmiyyətin təzyiqindən qorxaraq uzun müddət sevgisini etiraf edə bilmir. Bununla belə mənəvi sıxıntı yaşayan İlyas ürəyini aça biləcəyi sırdaş axtarışına çıxır və Bakı küçələrindən birində Mariya adlı transseksualla tanış olaraq onun evinə gedir. Ürəyini Mariyaya açdıqdan sonra Mariyanın İlyasa ürəyi ağrıyır və öz həyat hekayəsini İlyasa danışır. Məlum olur ki, vaxtilə Mariya da belə bir çətin vəziyyətdə olub və o zaman başqa bir adam da Mariyaya kömək edib. Mariya İlyası gay dostu Seymurla tanış edir. İlyas və Seymur əylənmək və söhbət etmək üçün Bakıda yerləşən gey-klublardan birinə üz tuturlar. Klubda bir qədər içdikdən sonra Samir adlı bir gənc İlyasa yaxınlaşaraq onu rəqsə dəvət edir.

Bir qədər rəqs etdikdən sonra İlyas və Samir klubdakı otaqlardan birinə keçərək öpüşməyə başlayırlar, lakin İlyas etiraz edərək, sevdiyi birinin olduğunu və başqası ilə yaxınlıq etmək istəmədiyini bildirir. Bundan sonra Seymur İlyası evlərinə ötürür. Sabahsı gündən başlayaraq İlyas təhsil aldığı universitetdə homoseksualların hüquqlarının müdafiəsi istiqamətində fəaliyyətə başlayır. Universitet rəhbərliyi bu mövzuda tədbirin təşkil edilməsinə razılıq verir. Lakin İlyasın bu istiqamətdə fəaliyyəti ailəsində narazılıqlar yaradır.

Samir Seymurla əlaqə saxlayaraq İlyasa dəlicəsinə aşiq olduğunu bildirir. İlyas və Samir Seymurun evində görüşdükdə isə İlyas ona bu sevdadan əl çəkməsini və Mövlana aşiq olduğunu bildirir. Universitetin birinci kursunda İlyasla birlikdə təhsil alan Mövlanın atası AMEA-nın alimlərindən olsa da homoseksuallıqla bağlı araşdırmaları onun işdən uzaqlaşdırılmasına səbəb olub. Bundan sonra atası içkiyə qurşanıb. Mövlanın özündən böyük Kənan adlı qardaşı və anası da var. Dörd nəfərlik bu ailə çətinliklə dolanır.

Bu arada Mariyanın evinə gələn qonaq qəfildən onu hədələməyə başlayır və məlum olur ki, gələn çoxdandır Mariyanı axtaran qardaşıdır. Mariya qadın olmağa qərar verdikdə ailəsi onu döymüş və bundan sonra Mariya Bakıya qaçaraq ailsəindən tamamilə uzaqlaşmışdı. Lakin onun izinə düşən qardaşı Mariyanı Bakıda tapır və öldürür.

Uşaqlıqdan musiqi ilə maraqlanan və fortepiano təhsili alan İlyas, Mövlanın da musiqiyə həvəsi olduğunu və yaxşı mahnı ifa etdiyini öyrənir. Mövlana yaxınlaşan İlyas ona mahnı yazmağı təklif edir, Mövlan məmnunluqla razılaşır və onların arasında ilk münasibət qurulur. Tezliklə “Səni sevirəm” adlı ilk mahnısını yazan İlyas Mövlanla birgə işə başlayır. Beləcə onlar daha sıx-sıx görüşməyə başlayırlar. Lakin, həmin ərəfədə Seymurun problemləri yaranır. Belə ki, ailəsi tərəfindən zorla evləndirilən Seymuru yataqda kişi ilə birlikdə görən arvadı Gültəkin atasının evinə qayıdır və olanları danışır. Gültəkinin qardaşı isə Seymuru öldürmək üçün axtarağa başlayır. Seymur İlyasın məsləhəti ilə Azərbaycandan qaçaraq Türkiyəyə sığınır.

İlyasın homoseksuallıqla bağlı yazdığı məqalə səs-küyə səbəb olur və ailəsi ona təzyiqi daha da artırır. Evdən qaçan İlyas Sahil bağında Mövlanla görüşür və birlikdə şəhərin gecə klublarından birinə gedirllər. Burada bir az içki içdikdən sonra İlyas sevgisini Mövlana etiraf edir. Mövlan əvvəlcə İlyasın içkinin təsiri altında olduğunu düşünsə də, sonradan həqiqəti başa düşür.

Bu arada İlyasın anası qızının hərəkətlərindən şübhələnərək, qızını izləyir və Aydanın Füzuli heykəlinin yanında bir oğlanla görüşdüyünü görür. Sonradan məlum olur ki, həmin oğlan Mövlanın böyük qardaşı Kənandır. İlyasgilin evinə gələn bağlamadan isə İlyasın dəniz sahilində çəkilmiş nyu portreti çıxır, əsərin naməlum rəssamı İlyası sevdiyini bildirir və onu öz sərgisinə dəvət edir. Portret İlyasgilin evində daha bir qalmaqal yaradır. Sərgiyə gedən İlyas əsərin müəllifinin vaxtilə gay klubda tanış olduğu Samir olduğunu görür. Samir həmin portretin başqa bir tayını da sərgidə təqdim edir və Azərbaycanda qonaq olan Türkiyənin məşhur iş adamlarından Adəm Savaş portreti almaq istədiyini bildirir, Samir əvvəl portreti satmaqdan imtina etsə də, İlyasın təkidindən sonra əsəri Adəmə hədiyyə edir. Əsərin qəhrəmanı ilə tanış olan Adəm də İlyasa vurulur və Türkiyəyə qayıdır. Lakin uzun illər homoseksual olduğunu gizlədərək ikili həyata yaşamağa məcbur olan, ən azı Azərbaycandakı qədər sıxıcı Türkiyə cəmiyyətinin onu qəbul etməyəcəyindən çəkinən Adəm mənəvi sıxıntılara dözməyərək özünü İlyasın portreti qabağında öldürür və bütün var-dövlətini İlyasa buraxır.

İstanbula qaçan Seymur isə bir müddət əvvəl bu şəhərə köçmüş azərbaycanlı transseksual Seda ilə əlaqə saxlayır. Sedanın təklifi ilə başqa yolu qalmadığını anlayan Seymur da transseksual olmağa qərar verir və Sima kimi tanınır. Lakin bir müddət sonra müştərilərdən biri ilə görüşərkən Seymur keçmiş həyat yoldaşı Gültəkinlə rastlaşır və ailəsindən qaçaraq İstanbula sığınan Gültəkinin fahişəlik etdiyini öyrənir. Onlar birlikdə Azərbaycana qayıtmağa, onlara bu həyatı yaşamağa məcbur edən insanlardan və cəmiyyətdən qisas almağa qərar verirlər.

İlyas nəhayət ki, çoxdan hazırlaşdığı tədbiri təşkil edir. Tədbirin sonunda çıxışı zamanı İlyas hamının önündə homoseksual olduğunu etiraf edir. Ailəsinə çatan bu xəbərdən sonra evdən qaçan İlyas bir müddət Seymurun yanına sığınır. Daha sonra Mövlanın qardaşı Kənan da onların münasibəti haqqında öyrənir və Mövlan da evdən qaçmağa məcbur olur. Onlar birlikdə İstanbula gedirlər və İlyas burda Adəmdən qalmış mirasa sahib çıxır. Adəmin villasında birlikdə ilk gecələrini keçirirlər. Bakıya qayıtdıqdan sonra İlyasın yazdığı hekayə və məqalələrdən ibarət kitab nəşr olunur. Həmçinin yazdığı “Günahdır səni sevmək” adlı mahnısını Mövlan ifa edir. Həm mahnı, həm də kitab böyük populyarlıq qazansa da, mühafizəkar Azərbaycan cəmiyyəti iki gəncin sevgisini qəbul edə bilmir.

Mövlan və İlyasın Xəzərin sahilində görüşü zamanı İlyas Kənanın Mövlanı silahla vurmaq istədiyini görərək özünü güllənin qabağına verir və sevgilisini xilas edir. İlyas Mövlanın qolları üzərində can verir. İlyasın cansız cəsədi ilə sonuncu dəfə öpüşən Mövlan cəsədi qucaqlayaraq özünü Xəzərin sularına qərq edir. Kənan isə Aydanla birlikdə Zaqatalaya qaçır. Hollandiyaya köçən Samir ömrünün axırına kimi İlyasın yasını saxlayır.

Obrazlar[redaktə | əsas redaktə]

İlyas – gənc azərbaycanlı oğlandır. Orta maddi imkana malik ailədə böyümüşüdü. Ailəsi ilə Arran rayonlarının birində yaşayırdılar. Ailədə dörd nəfər idilər – atası Mətləb, anası Lamiyə və bacısı Aydan. Anası kənd orta məktəbində biologiya müəlliməsi idi. Sonradan Bakıya köçmüşdülər. Atası Qarabağ müharibəsi veteranı idi və kiçik biznesi vardı. İlyas şən, şıltaq, eyni zamanda müdrik və mədəni rəftarı ilə hər kəsdən seçilir, həmişə diqqət mərkəzində olurdu. “Zil qara gözləri, ipək kimi qara saçları, orta boyu, şux qaməti, heç bir qüsuru olmayan mükəmməl bədən quruluşu vardı.” [3] Uşaqlıqdan musiqi təhsili almışdı, eyni zamanda şeirlər, məqalələr və hekayələr yazırdı. Yeniyetməlik dövründən homoseksual olduğunu başa düşmüşdü. Təsəvvüründəki ideal kişi obrazı Leonardo Di Kaprio idi.

Mövlan – İlyasın qrup yoldaşıdır. Onun “mavi gözləri, sarıya çalan ipək saçları, şirin təbəssümü, ehtiraslı baxışları, mülayim və qan coşduran səsi”[4] vardı. Yaxşı səsi vardı.

Tarixi[redaktə | əsas redaktə]

"Günahdır Səni Sevmək" yazıçının nəşr olunmuş ikinci romanıdır. Bundan əvvəl isə o, 2012-ci ildə "Fahişə mələklər" adlı romanını nəşr etdirmişdir.[5] Əsər 2014-cü ildə Qanun nəşriyyatında nəşr edilmişdir.[6]

İstinadlar[redaktə | əsas redaktə]

  1. Günahdır Səni Sevmək, Bakı, Qanun, 2014
  2. Gənc yazardan homoseksuallara dəstək, publika.az, 23 iyun 2014, Yoxlanılıb: 12 avqust 2014
  3. Günahdır səni sevmək, Bakı, Qanun , səh. 12
  4. Günahdır səni sevmək, Bakı, Qanun, səh. 16
  5. Gənc yazar yeni kitabında homoseksuallara dəstək oldu, azxeber.com, 06/23/2014, Yoxlanılıb: 12 avqust 2014
  6. O da homoseksuallara dəstək oldu, movqe.az, 2014-06-23, Yoxlanılıb: 12 avqust 2014

Həmçinin bax[redaktə | əsas redaktə]