Hüseyn Rəhmanov

Hüseyn Rəhmanov
Hüseyn Əlipaşa oğlu Rəhmanov
Azərbaycan SSR Xalq Komissarları Sovetinin sədri 12 dekabr 1933 — 22 avqust 1937
Sələfi	Mircəfər Bağırov
Xələfi	Teymur Quliyev
Azərbaycan KP MK-nın üçüncü katibi 4 iyun 1930 — 28 noyabr 1930
Azərbaycan KP MK-nın katibi 24 dekabr 1929 — 31 may 1930
Azərbaycan Kommunist Gənclər İttifaqı Mərkəzi Komitəsinin birinci Katibi 1923 — 1925
Ümumittifaq Lenin Kommunist Gənclər İttifaqı Zaqafqaziya Regional Komitəsinin birinci katibi 1925 — 1928
Ümumittifaq Lenin Kommunist Gənclər İttifaqı Mərkəzi Komitəsinin katibi 17 may 1928 — 7 dekabr 1929
Şəxsi məlumatlar
Doğum tarixi	1 dekabr 1902
Doğum yeri	Bakı qəzası, Bakı quberniyası, Rusiya İmperiyası
Vəfat tarixi	21 aprel 1938 (35 yaşında)
Vəfat yeri	Bakı, Azərbaycan SSR, SSRİ
Partiya	RK(b)P
Təhsili	Qızıl Professorlar İnstitutu
Təltifləri
Vikianbarda əlaqəli mediafayllar

Hüseyn Əlipaşa oğlu Rəhmanov (1 dekabr 1902, Bakı – 21 aprel 1938, SSRİ) — Azərbaycanın siyasi və dövlət xadimi.

Həyatı

H.Rəhmanov 1902-ci ilin dekabrında Bakıda dənizçi ailəsində anadan olmuşdur. O, ilk təhsilini rus-tatar (Azərbaycan) məktəbində almış, 1918-ci ildə isə I Bakı kişi gimnaziyasında oxumuşdur.

H.Rəhmanov əmək fəaliyyətinə 1919-cu ildə Azərbaycan Xalq Cümhuriyyətinin Xarici İşlər Nazirliyində kuryer kimi başlamışdır. 1920-ci ildə bir neçə ay Bakı soveti yanında rayon ərzaq komitəsinin evlər idarəsinin təşkilində çalışan H.Rəhmanov könüllü olaraq ordu sıralarına gedir. Sonra o, əsgərlikdən hərbi məktəbə oxumağa göndərilir. H.Rəhmanov 1920-1921-ci illərdə Azərbaycan hərbi məktəbinin kursantı olmuşdur. O, kursant olmasına baxmayaraq, Azərbaycanda antisovet qüvvələrə qarşı mübarizədə iştirak etmişdir. 1921-1924-cü illərdə o, Maştağa və Şəhər rayon komsomol komitələrinin təşkilat şöbəsinin müdiri, Balaxanı-Sabunçu rayon komsomol komitəsinin katibi, Bakı şəhər komsomol komitəsinin təbliğat-təşviqat şöbəsi müdirinin müavini işləmişdir

Həsən Rəhmanovun qardaşı, Aza Rəhmanovanın əmisidir.

Siyasi fəaliyyəti

1924-1926-cı illərdə H.Rəhmanov Azərbaycan Kommunist Gənclər İttifaqı Mərkəzi Komitəsinin birinci katibi vəzifəsində çalışmışdır. H.Rəhmanov iki ilə yaxın – 1926-1929-cu illərdə Zaqafqaziyada Ölkə Komsomol Komitəsinin birinci katibi olmuşdur.

1928-ci il mayın 17-də Moskvada ÜİLKGİ Mərkəzi Komitəsinin plenumu çağırılmışdır. Plenum H.Rəhmanovu ÜİLKGİ MK bürosunun üzvü və 4 katibindən biri seçmişdir. Bir ildən sonra – yəni 1929-cu ilin aprelində isə o, ÜİLKGİ MK ikinci katibi təsdiq edilmişdir.

1929-1930-cu illərdə H.Rəhmanov Azərbaycan KP MK-nın üçüncü katibi vəzifəsini aparmışdır. Bu zaman o, Azərbaycanda əksinqilabi çıxışların – Şamxor ruhanilərinin "Şamxor imamı", Qarabağ üsyanlarının yatırılmasında, qrupbazlıq işinin ləğvində yaxından iştirak etmişdir. H.Rəhmanov 1930-1933-cü illərdə Qazaxıstan Həmkarlar İttifaqında, Moskvada ÜİMHİS-da müxtəlif vəzifələrdə çalışmış və Qırmızı Professorlar İnstitutunda təhsil almışdır. O, 1933-cü ilin aprelində Bakıya göndərilmiş və burada Azərbaycan Kommunist Partiyası MK-nın üçüncü katibi, dekabrında isə Azərbaycan SSR Xalq Komissarları Sovetinin sədri vəzifəsinə irəli çəkilmişdir. H.Rəhmanov bu ali vəzifədə ömrünün axırına – 1937-ci ilin sonuna qədər çalışmışdır.

1935-ci ildə Azərbaycan SSR-nin 15 illiyi qeyd edilən günlərdə respublikanın iqtisadi və mədəniyyət sahəsində əldə etdiyi müvəffəqiyyətlərdə böyük xidmətlərinə görə H.Rəhmanov Lenin ordeninə layiq görülmüşlür.

H.Rəhmanov repressiyaya məruz qalmış və 1938-ci ildə həbs olunub güllələnmişdir.

Mənbə

• Musa Qasımlı, Cavid Hüseynov. Azərbaycanın baş nazirləri. Bakı, 2005