Hayle İbrahimov

Vikipediya, azad ensiklopediya
Naviqasiyaya keç Axtarışa keç
Hayle İbrahimov
Hayle İbrahimov 2012-ci ildə
Hayle İbrahimov 2012-ci ildə
Şəxsi məlumatlar
Tam adı Hayle Desta Hagos İbrahimov
Vətəndaşlığı Efiopiya Efiopiya
Azərbaycan Azərbaycan
Doğum tarixi 18 yanvar 1990(1990-01-18)[1][2] (34 yaş)
Boyu 172 sm. (5 ft 6 in)
İdman növü Yüngül atletika

Hayle İbrahimov (18 yanvar 1990[1][2]) — Azərbaycanı təmsil edən yüngül atlet, 2013-cü il Avropa Salon Çempionatının qalibi.[3]

Hayle İbrahimov 1990-cı il yanvarın 18-də Efiopiyanın Əddis-Əbəbə şəhərində anadan olub.

Hayle İbrahimov 2009-cu ildə beynəlxalq turnirlərdə Azərbaycan bayrağı altında mübarizə aparmağa başladı. Həmin ildə Hayle İbrahimov gənclər arasında Avropa Çempionatında 5000 və 10000 metr məsafələrə qaçış turnirlərində qızıl medallara sahib oldu.

Hayle İbrahimov 2010-cu ilin iyulunda İspaniyanın Barselona şəhərində baş tutan Avropa Çempionatında mübarizə apardı. Hayle İbrahimov 5000 metr məsafəyə qaçış turnirinin təsnifat mərhələsində 14:32.98 dəqiqə nəticə ilə mərhələni birinci pillədə başa vurdu və Avropa Çempionatının final mərhələsinə vəsiqə qazandı. İyulun 31-də baş tutan final mərhələsində isə Hayle İbrahimov 14.34.15 dəqiqə nəticə göstərdi və Avropa Çempionatının bürünc medalına sahib oldu. Hayle İbrahimov Avropa Çempionatlarında medala sahib olan birinci Azərbaycan atleti olaraq tarixə düşdü.

Hayle İbrahimov növbəti uğuruna 2011-ci ilin martında Fransanın Paris şəhərində baş tutan Avropa Salon Çempionatında imza atdı. 3000 metr məsafəyə qaçış turnirində Hayle İbrahimov təsnifat mərhələsində 8:00.36 dəqiqə nəticə ilə mərhələni birinci pillədə başa vurdu və final mərhələsinə vəsiqə qazandı. Final mərhələsində isə Hayle İbrahimov 7:54.32 dəqiqə nəticə ilə Birləşmiş Krallıq nümayəndəsi Məhəmməd Fərəhdən geri qalaraq turniri 2-ci pillədə başa vurdu və Avropa Salon Çempionatının gümüş medalına sahib oldu.

Hayle İbrahimov 2012-ci ildə Fransada baş tutan beynəlxalq turnirlərin nəticələrinə əsasən olimpiya lisenziyasına sahib oldu.[4] İyunda Hayle İbrahimov Finlandiyada baş tutan Avropa Çempionatını altıncı pillədə başa vurdu. Avqustda isə Hayle İbrahimov Azərbaycanı London şəhərində (Birləşmiş Krallıq) baş tutan XXX Yay Olimpiya Oyunlarında təmsil elədi. Hayle İbrahimov olimpiada da avqustun 8-də 5000 metr məsafəyə qaçış turnirində mübarizə apardı.[5] 12:25.22 dəqiqə nəticə göstərən Hayle İbrahimov təsnifat mərhələsinin A qrupunu 20 idmançı sırasında birinci pillədə başa vurdu və final mərhələsinə adladı.[5] Avqustun 11-də baş tutan final mərhələsində isə Hayle İbrahimov 12:45.36 dəqiqə nəticə göstəridi və turniri 15 idmançı sırasında doqquzuncu pillədə başa vurdu.[5]

2013-cü ilin martında Hayle İbrahimov İsveçin Göteborq şəhərində baş tutan Avropa Salon Çempionatında mübarizə apardı. Hayle İbrahimov 3000 metr məsafəyə qaçış turnirinin təsnifat mərhələsində 7:50.55 dəqiqə nəticə göstərdi və mərhələni birinci pillədə başa vuraraq çempionatın final mərhələsinə vəsiqə qazandı. Final mərhələsində isə Hayle İbrahimov 7:48.74 dəqiqə nəticə ilə birinci pillənin sahibi oldu və Avropa Salon Çempionatını qızıl medalla başa vurdu. Həmin ilin iyulunda Hayle İbrahimov Rusiyanın Kazan şəhərində baş tutan Universiada Oyunlarında da mübarizə apardı. 5000 metr məsafəyə qaçış turnirinin təsnifat mərhələsini 14:50.74 dəqiqə ilə birinci pillədə başa vuran Hayle İbrahimov final mərhələsində də 14.35.88 dəqiqə nəticə göstərdi və Universiada Oyunlarının qalibi oldu. Sentyabrda isə Hayle İbrahimov İndoneziyanın Palembanq şəhərində baş tutan III İslam Həmrəyliyi Oyunlarında 5000 metr məsafəyə qaçış turnirini də qızıl medalla başa vurdu.

Hayle İbrahimov növbəti uğuruna 2014-cü ilin avqustunda İsveçrənin Sürix şəhərində imza atdı. 5000 metr məsafəyə qaçış turnirində Hayle İbrahimov 14:08.32 dəqiqə nəticə ilə Avropa Çempionatının gümüş medalına sahib oldu. 2015-ci ilin iyununda isə Hayle İbrahimov Azərbaycanda baş tutan Birinci Avropa Oyunlarında mübarizə apardı. Komanda hesabında aparılan turnirdə Hayle İbrahimov 1500, 3000 və 5000 metr məsafələrə qaçış turnirlərində birinci pillələrin sahibi olsa da, Azərbaycan yığması ümumi nəticədə turniri beşinci pillədə başa vurdu.

Azərbaycan Prezidenti İlham Əliyevin 29 iyun 2015-ci il tarixli Sərəncamına əsasən Birinci Avropa Oyunlarında qazandığı nailiyyətlərə və Azərbaycan idmanında xidmətlərinə görə Hayle Desta Hagos İbrahimov Azərbaycan Prezidentinin fəxri diplomu ilə təltif edildi.[6]

2015-ci ilin iyulunda Hayle İbrahimov Cənubi Koreyanın Kvanju şəhərində baş tutan Universiada Oyunlarında 5000 metr məsafəyə qaçış turnirində 14:44.28 dəqiqə nəticə ilə turnirin qızıl medalına sahib oldu.

2016-cı ildə isə Hayle İbrahimov Azərbaycanı Rio-de-Janeyro şəhərində (Braziliya) baş tutan XXXI Yay Olimpiya Oyunlarında təmsil elədi. 5000 metr məsafəyə qaçış turnirində çıxış edən Hayle İbrahimov avqustun 18-də mübarizə apardı. Təsnifat mərhələsinin birinci qrupunda çıxış edən Hayle İbrahimov 14:26.11 dəqiqə nəticə ghöstərdi. Bu nəticələrə əsasən Hayle İbrahimov qrupda 25 atlet sırasında yeddinci pillənin sahibi oldu. Ümumi nəticədə isə Hayle İbrahimov 50 atlet sırasında 18-ci pillədə qərarlaşdı və Rio-de-Janeyro Olimpiadasında mübarizəsini dayandırdı.

  1. 1 2 Hayle Ibrahimov // https://pantheon.world/profile/person/Hayle_Ibrahimov.
  2. 1 2 Hayle Ibrahimov // World Athletics database.
  3. Olympedia.org. "Hayle İBRAHIMOV". www.olympedia.org (ingilis). 2022-08-30. 2022-04-12 tarixində arxivləşdirilib. İstifadə tarixi: 30.08.2022.
  4. Azerisport.com idman portalı. "Хайле Ибрагимов приносит Азербайджану лицензию". www.azerisport.com (rus.)). 11.02.2022. 2014-08-12 tarixində arxivləşdirilib. İstifadə tarixi: 11.02.2022.
  5. 1 2 3 Olympedia.org. "2012 Summer Olympics / Athletics / 5000 metres / Men". www.olympedia.org (ingilis). 2022-08-30. İstifadə tarixi: 30.08.2022.[ölü keçid]
  6. Azerisport.com idman portalı. "Президент Азербайджана наградил Мехрибан Алиеву, Азада Рагимова и чемпионов Евроигр". www.azerisport.com (rus). 22.08.2022. 2022-11-02 tarixində arxivləşdirilib. İstifadə tarixi: 22.08.2022.