Məzmuna keç

Herreys

Vikipediya, azad ensiklopediya
Herreys
isv. Herreys
Əsas məlumatlar
Üslub pop-rok
Pop-musiqi
Fəaliyyət illəri 1984-hazırda
Ölkə  İsveç
Şəhər Göteborq
Dil isveç dili
ingilis dili
Heyət Per Herrey
Richard Herrey
Louis Herrey
Vikianbarın loqosu Vikianbarda əlaqəli mediafayllar

Herreys və ya Herrey (isv. Herreys) — İsveç vokal qrupu. Herreys Per Herrey, Riçard Herrey və Luis Herrey adlı üç qardaşdan ibarət olan İsveç pop qrupudur. Onlar 1984-cü ildə "Diggi-Loo Diggi-Ley" mahnısı ilə 1984 Avroviziya Mahnı Müsabiqəsinin qalibi olublar. Riçard və Luis Herrey Avroviziyanı qazanan ilk yeniyetmə kişilər olublar və müvafiq olaraq 19 yaş 260 gün və 17 yaş 184 günlüklərində bu uğura imza ataraq, müsabiqə tarixinə ən gənc kişi qaliblər kimi düşüblər. 1985-ci ildə isə "Sommarparty" mahnısı ilə Sopot Beynəlxalq Mahnı Festivalında qalib gəliblər. Avroviziya qələbəsi qazandıqları dövrdə qardaşlar ABŞ-ın Ohayo ştatının Klivlend şəhərində yaşayıb və burada müğənni kimi fəaliyyət göstəriblər. Herreys qrupu daha bir neçə il mahnı yazdırmağa və qastrol səfərlərinə çıxmağa davam etsə də, Avroviziya qalibi olan mahnıları qədər böyük bir uğur qazana bilməyiblər. Bununla belə, Herreys 1980-ci illərdə İsveçin ən çox qazanan pop qrupu olub və 300-dən çox canlı konsert proqramı ilə çıxış edərək uğurlu qastrol səfərləri həyata keçirib.[1]

Üç qardaş 2002-ci ildə İsveç Melodifestivalen seçim turlarının birinin yarımfinal fasiləsində "Diggi-Loo Diggi-Ley" mahnısını ifa etmək üçün yenidən bir araya gəliblər. Riçard Herrey 2005-ci ilin oktyabrında Danimarkanın Kopenhagen şəhərində keçirilən Avroviziyanın 50 illik yubiley konsertində ("Congratulations") çıxış edib. 2006-cı ilin fevralında isə Riçard Herrey "Jag e Kung" adlı ilk solo albomunu buraxıb. Onlar həm 2015-ci ildə Avroviziya Mahnı Müsabiqəsinin 60 illik yubiley şousunda, həm də İsveçin Malmö şəhərində keçirilən Avroviziya 2024-ün ikinci yarımfinalının sonunda çıxış ediblər.[2]

Tarixi

[redaktə | vikimətni redaktə et]

Qrup 1970-ci illərin birinci yarısında Herrey qardaşları (Per, Riçard və Luis) və onların bacısı Mariyanı birləşdirən bir kvartet kimi yaradılıb. 1976-cı ildə Mariya qrupu tərk etdikdən sonra, musiqiçilərin atası qardaşların müxtəlif şoularda çıxış edə bilməsi üçün öz sirkini təşkil edib. 1981-ci ildə ailə ABŞ-a köçüb və qardaşlar burada bir neçə il Ali Rəqs Akademiyasında təhsil alıblar. 1983-cü ildə qrup Vinya-del-Mardakı beynəlxalq musiqi festivalında beşinci yeri tutub.[3]

1984-cü ildə "Diggi-Loo, Diggi-Ley" mahnısı ilə trio İsveçin "Melodifestivalen" seçim turunda, daha sonra isə Avroviziya Mahnı Müsabiqəsində qalib gəlib.[4] Bu qələbə, ABBA qrupunun 1974-cü ildəki uğurundan sonra İsveçin müsabiqədəki ikinci qələbəsi olub. Bundan sonra həmin bəstə İsveç hit-paradlarında ikinci, Norveç hit-paradlarında isə beşinci yeri tutub. 1985-ci ildə qrup "Sommarparty På Stranden" mahnısı ilə Sopot Beynəlxalq Festivalında qalib gəlib və SSRİ-yə qastrol səfərinə yollanıb.

1985-ci ildə SSRİ-də İsveç triosunun Alla Puqaçova ilə birgə konsertləri keçirilib. Konsertlərin ilk seriyası 21–23 mart 1985-ci ildə Moskvadakı "Sovincentr"də baş tutub. Həmin ilin payızında isə Alla Puqaçova ilə birlikdə SSRİ-də irimiqyaslı qastrol səfərləri reallaşıb; "Alla Puqaçova təqdim edir..." konsert proqramı çərçivəsində Leninqrad—Tallin—Moskva turnesi təşkil olunub:

  • 29 avqust – 7 sentyabr 1985 — Leninqradda (Lenin adına İdman-Konsert Kompleksi; 7 konsert),
  • 9 – 13 sentyabr 1985 — Tallində ("Qorxoll" zalı; 5 konsert),
  • 16 – 21 sentyabr 1985 — Moskvada ("Rossiya" Dövlət Mərkəzi Konsert Zalı; 6 konsert),
  • 25 – 28 sentyabr 1985 — Moskvada ("Lujniki" İdman Sarayı; 4 konsert).

Beləliklə, üç şəhərdə və beş fərqli konsert meydançasında ümumilikdə 25 birgə konsert verilib.

1986-cı ildən etibarən qrup Almaniyanın "Laser Music" səsyazma şirkəti ilə əməkdaşlıq etməyə başlayıb və onun studiyasında iki albom ("Different I’s" və "Live in Tivoli") yazdırıb. Sonuncu albom, qrupun Kopenhagendəki (Danimarka) Tivoli Parkında çıxışı zamanı yazılmış canlı konsert albomudur. 1987-ci ildə qrup Bakıda keçirilən "İlin mahnısı" ("Pesnya qoda") səyyar buraxılışında iştirak edib və burada kiçik Vladimir Presnyakov ilə birlikdə rus dilində "Dostluq ağacı" ("Derevo drujbı") mahnısını ifa edib.[5]

Dağılması və yenidən birləşməsi

[redaktə | vikimətni redaktə et]

1987-ci ildə Luis İsveç mormon təriqətlərindən birinin missiyası ilə ABŞ-a yollanıb və bununla da qrup fəaliyyətini dayandırıb. 1995-ci ildə Per və Riçard "Där vindarna möts" ("Küləklərin görüşdüyü yer") albomunu və erkən yazılarının daxil edildiyi "Herrey’s story" toplu albomunu buraxıblar. 2002-ci ildə qrup tam heyətlə yenidən bir araya gələrək özlərinin ən populyar mahnılarından ibarət "Gyllene hits" adlı albom yazdırıb. Hazırda müzikllərin quruluşçu rejissoru kimi fəaliyyət göstərən Rikard, 2006-cı ildə özünün ilk solo albomu olan "Jag e Kung"u təqdim edib.[6]

2015-ci ildə qrup, Avroviziya Mahnı Müsabiqəsinin 60 illiyinə həsr olunmuş "Eurovision Song Contest's Greatest Hits" yubiley gecəsində çıxış etmək üçün yenidən birləşib. Bu tədbir Londonun məşhur "Eventim Apollo" teatrında keçirilib.[7]

Qrup, həmçinin Avroviziya 2024-ün ikinci yarımfinalının əyləncəli şou hissəsində də səhnə alıb.[8]

Diskoqrafiya

[redaktə | vikimətni redaktə et]

Albomları

[redaktə | vikimətni redaktə et]
  • 1984 — Diggi-Loo, Diggi-Ley
  • 1985 — Crazy People
  • 1985 — Not Funny
  • 1986 — Different I’s
  • 1987 — Live in Tivoli
  • 1995 — Där vindarna möts
  • 1995 — Herrey’s Story
  • 2002 — Gyllene Hits
  • 2010 — The Greatest Hits

Sinqllar

[redaktə | vikimətni redaktə et]
  • 1984 — Crazy People
  • 1984 — I’m So Sorry
  • 1984 — You
  • 1984 — I See The Love
  • 1984 — Kall Som Is
  • 1984 — Mirror Mirror (#18 İsveçdə)
  • 1984 — Diggi-Loo, Diggi-Ley (#2 İsveçdə, #5 Norveçdə, #10 İsveçrədə, #11 Almaniyada, #18 Danimarkada, #46 Birləşmiş Krallıqda)
  • 1985 — People Say It’s in the Air
  • 1985 — I’m So Sorry (yenidən buraxılış)
  • 1985 — Varje Liten Droppe Regn (#11 İsveçdə)
  • 1985 — People from Ibiza
  • 1985 — Sommarparty (#20 İsveçdə)

İstinadlar

[redaktə | vikimətni redaktə et]
  1. ↑ "Herrey's* - Diggi Loo, Diggi Ley Images Arxiv surəti 30 iyun 2018 tarixindən Wayback Machine saytında", discogs.com. Retrieved 24 September 2016.
  2. ↑ "Herrey* - Different I's Images Arxiv surəti 30 iyun 2018 tarixindən Wayback Machine saytında", discogs.com. Retrieved 24 September 2016.
  3. ↑ Christian Masson. "1984 - Luxembourg". Songcontest.free.fr. 4 mart 2016 tarixində arxivləşdirilib. İstifadə tarixi: 6 iyun 2014.
  4. ↑ "Herreys: "Diggi-Loo Diggi-Ley (Sweden, 2002)". 15 oktyabr 2013. 15 may 2023 tarixində arxivləşdirilib. İstifadə tarixi: 15 may 2023 – YouTube vasitəsilə.
  5. ↑ "03/04/2015, Eurovision's Greatest Hits - Herreys - BBC One". BBC (ingilis). 14 dekabr 2018 tarixində arxivləşdirilib. İstifadə tarixi: 4 aprel 2018.
  6. ↑ Freeman, Guy. "Eurovision's Greatest Hits - full line-up revealed!" (6 February 2015). bbc.co.uk. BBC. 15 oktyabr 2015 tarixində arxivləşdirilib. İstifadə tarixi: 6 fevral 2015.
  7. ↑ Jiandani, Sanjay. "United Kingdom: BBC will host Eurovision's Greatest Hits Show in March". esctoday.com. ESCToday. 3 fevral 2015. 3 fevral 2015 tarixində arxivləşdirilib. İstifadə tarixi: 3 fevral 2015.
  8. ↑ Savage, Mark. "The Netherlands, Israel and Switzerland among countries heading to the Eurovision final". Live Reporting. BBC. London. 9 may 2024. 10 may 2024 tarixində arxivləşdirilib. İstifadə tarixi: 10 may 2024.

Xarici keçidlər

[redaktə | vikimətni redaktə et]
Mənbə — "https://az.wikipedia.org/w/index.php?title=Herreys&oldid=8998815"