Heydər Əliyevin heykəlləri

Heydər Əliyev.

Heydər Əliyevin heykəlləri — Azərbaycanın eks-prezidenti Heydər Əliyevi təsvir edən heykəltaraşlıq nümunələri.

Azərbaycanda

Heydər Əliyevin heykəli (Bakı) — Bakıda Heydər Əliyev Sarayının qarşısında, 2005-ci il may ayının 10-da ucaldılan möhtəşəm abidə. Memarlıq kompleksinin, o cümlədən Heydər Əliyevin abidəsinin açılışı 2005-ci il mayın 10-da Heydər Əliyevin anadan olmasının 82-ci ildönümü ilə əlaqədar olaraq Heydər Əliyev Sarayının qarşısındakı parkda olmuşdur. Açılış mərasimində Azərbaycan Respublikasının Prezidenti İlham Əliyev, nazirlik və idarələrin rəhbərləri, Milli Məclisin deputatları, ölkə ictimaiyyətinin, eləcə də Bakıda akkreditə olunmuş diplomatik korpusun nümayəndələri iştirak ediblər.

Heydər Əliyev büstü (Naxçıvan) — Naxçıvan şəhərində Heydər Əliyevə həsr olunmuş büst. SSRİ Ali Soveti Rəyasət Heyətinin 1983-cü il 7 may tarixli Fərmanı ilə iki dəfə Sosialist Əməyi Qəhrəmanı adına layiq görüldüyünə görə anadan olduğu Naxçıvan şəhərində Heydər Əlirza oğlu Əliyevin büstünün qoyulması qərara alınmışdır. 1983-cü ilin oktyabrında Naxçıvan şəhərində Heydər Əliyevin büstünün açılışı olmuşdur. Büst Naxçıvan şəhərinin qədim məhəllələrindən birinin yerindəki mədəniyyət və istirahət parkında uca ərazidə yerləşir. Büstün müəllifi Azərbaycan Milli Elmlər Akademiyasının akademiki, xalq rəssamı Ömər Eldarovdur.

Heydər Əliyev büstü (Sabirabad) — Sabirabadda yerləşən büst. Heydər Əliyevin büstü Heydər Əliyev Mərkəzinin içərisində yerləşir. Binanın ümumi sahəsi 5,2 min kvadratmetrdir. Üçmərtəbəli binanın birinci mərtəbəsində internet kafe və rəqs studiyası, konfrans zalı və müasir akustika sistemi ilə təchiz edilmiş 3D kinozalı fəaliyyət göstərir. İkinci mərtəbədə ümummilli lider Heydər Əliyevin büstü qoyulmuşdur.

Xaricdə

Heydər Əliyev büstü (Tbilisi) — Gürcüstanın Tbilisi şəhərində Heydər Əliyevin adına ucaldılan büst. 2004-cü ildə prezident İlham Əliyevin Gürcüstana səfəri zamanı büstün açılışı olmuşdur. Eyni zamanda büstün olduğu parka da onun adı verilmişdir. Azərbaycanın xalq rəssamı, heykəltaraş Natiq Əliyevin hazırladığı qranit büst və postamentin hündürlüyü dörd metrdir. Büstün açılışı mərasimində Mixail Saakaşvili bildirib ki, Azərbaycan, azərbaycanlılar Gürcüstanın həmişə sadiq dostları olublar: "Düşünürəm ki, bugünkü gün tarixi qardaşlığımızın, dostluğumuzun çox parlaq təsdiqidir. Hərçənd ki, bizim çoxəsrlik dostluğumuzun sübuta ehtiyacı yoxdur. Gürcüstanda yaşayan azərbaycanlılar ölkəmizin vətəndaşlarıdır, öz mədəniyyətini, öz dilini saxlayan və inkişaf etdirən bu insanlar, eyni zamanda, vətənimizin, ölkəmizin, onun gələcəyinin ayrılmaz tərkib hissəsidirlər. Eləcə də Azərbaycan Gürcüstanın gələcək tərəqqisinin ayrılmaz tərkib hissəsidir". Prezident İlham Əliyev öncə Heydər Əliyevin xatirəsinə göstərilən ehtirama görə bütün gürcü xalqına, onun prezidentinə təşəkkürünü bildirib: "Bu gün mən böyük iftixar hissi keçirirəm ki, 15 il əvvəl müstəqillik qazanmış xalqlarımız və ölkələrimiz arasında çoxəsrlik münasibətlərin tarixində bizi daha da yaxınlaşdıran bir hadisə baş verir. Bu gün gözəl bir yerdə, Tbilisinin mərkəzində, biz Azərbaycanın ümummilli lideri Heydər Əliyevin büstünü açdıq. Bugünkü mərasim bizim birliyimizin rəmzidir, qardaşlığımızın rəmzidir. Onun rəmzidir ki, əvvəlki kimi, xalqlarımız bundan sonra hələ çox onilliklər və əsrlər bir yerdə olacaq, yaxın olacaq, bir-birinə kömək edəcək, indi olduğu kimi, bir-birinin uğurlarına sevinəcəklər".

Heydər Əliyevin heykəli
Ölkə	Türkiyə
Yerləşir	İstanbul,Sarıyer rayonu

Heydər Əliyev heykəli (İstanbul) — Türkiyənin İstanbul şəhərinin Sarıyer rayonunda yaradılmış Heydər Əliyevin heykəli. Abidə 2006-cı il iyulun 12-də salınmışdır. Azərbaycan Prezidenti İlham Əliyev İstanbul şəhərinin Sarıyer rayonundakı Heydər Əliyev parkında abidənin açılışında iştirak etmək üçün Heydər Əliyev küçəsinə gəldi. Ətraf binada Atatürkün və Heydər Əliyevin portretləri, Azərbaycanın və Türkiyənin dövlət bayraqları asılmışdı.

Heydər Əliyev heykəli(Misir)
Ölkə	Misir
Layihə müəllifləri	Səlhab Məmmədov, Akif Əsgərov və Natiq Əliyevdir
Hündürlüyü	3 metr
Material	tunc

Heydər Əliyev heykəli (Misir) — Misirin Qalyubiyyə vilayətinin Qanatır əl-Xeyriyyə şəhərində yerləşən Misir-Azərbaycan Dostluq parkında salınmış Heydər Əliyev heykəli. 2008-ci il fevralın 7-də Misirin Qəlyubiyyə vilayətinin Qanatır şəhərində Azərbaycan-Misir dostluq parkının və Heydər Əliyevin bu parkda ucaldılmış abidəsinin açılışı olmuşdur. Açılış mərasimlərində Misirin beynəlxalq əməkdaşlıq naziri xanım Faizə Əbu əl-Nəqə, Qəlyubiyyə vilayətinin valisi Ədli Hüseyn, Qanatır şəhərinin rəhbərləri, ictimaiyyətin nümayəndələri, bu münasibətlə səfərə gələn Abşeron Rayonu İcra Hakimiyyətinin başçısı Zakir Fərəcovun rəhbərliyi ilə nümayəndə heyəti, Azərbaycanın Misirdəki səfiri Faiq Bağırov, diplomatik korpusun əməkdaşları, Misirin Ayn Şəms Universitetində Azərbaycan və türk dillərində təhsil alan əcnəbi tələbələr, Azərbaycan icmasının üzvləri iştirak etmişlər. Parkın açılışını bildirən rəmzi lent kəsildikdən sonra Misirin incəsənət ustaları konsert proqramı ilə çıxış etmiş, səmaya sülh göyərçinləri buraxılmışdır. Daha sonra xHeydər Əliyevin abidəsinin açılışı olmuşdur. Əvvəlcə Azərbaycanın və Misirin dövlət himnləri səsləndirilmiş, sonra abidə üzərindən ağ örtük götürülmüş, önünə gül-çiçək dəstələri düzülmüşdür. Hündürlüyü 3 metr olan tunc abidənin müəllifləri Səlhab Məmmədov, Akif Əsgərov və Natiq Əliyevdir. Nazir Faizə Əbu əl-Nəqə, vali Ədli Hüseyn, Abşeron Rayon İcra Hakimiyyətinin başçısı Z. Fərəcov və səfir F. Bağırov mərasimdə çıxış etmişlər.