Kadeş müqaviləsi

Vikipediya, azad ensiklopediya
Jump to navigation Jump to search
Kadeş müqaviləsi
Treaty of Kadesh.jpg
Müqavilənin İstanbul Arxeologiya Muzeyində saxlanılan orijinal mətni
Ägyptisch-Hethitischer Friedensvertrag Karnaktempel.jpg
Yaranıb e.ə 1259
Tarixi 1828 (misir) və 1906 (het)
Saxlanılır
Commons-logo.svg Vikianbarda əlaqəli mediafayllar

Kadeş müqaviləsi və ya Misir-Het sülhü — Eradan əvvəl XIII əsrin əvvəlində Misir hökmdarı II Ramzeslə Het hökmdarı Hattuşili arasında imzalanan Kadeş sülhü yazılı tarixdə məlum olan ilk sülh müqaviləsi kimi önəmli yer tutur.

Sülh akkad və misir dillərində imzalanmışdı. Gümüş lövhə üzərində akkadca cızılan mətn Misirə göndərilmiş, lakin indiyədək o nümunə tapılmamışdır. Lövhə daha sonra misir dilinə çevrilərək Karnakdakı məbəd divarlarına həkk edilmişdir. Eyni mətnin nümunələri Boğazköy arxivində tapılmışdır. Bir növ hücum etməmək haqqında bağlanan sülhə görə, hər iki başçı bir-birilərinə qarşı daha savaşmayacaq və lazım gələrsə, ümumi düşmənə qarşı müttəfiq olacaqdı. Günahkarların öz ölkələrinə geri qaytarılması məsələsində də razılığa gəlinmişdi. Bu anlaşmanın Misir və Het nümunələrinin tapılması qədim dövr tarixşünaslığının ən gözəl tapıntılarından sayılır. Sülh müqaviləsi, böyük ehtimal ki, ortaq bir komissiyanın fəaliyyəti nəticəsində ərsəyə gəlmiş və ilk təklifin Het hökmdarından gəldiyi düşünülür. Hattuşili Ramzesə yazırdı: “Qardaşım üçün gümüş lövhə hazırlatdım və ona göndərdim. Sən də gümüş lövhə hazırlat və mənə göndər”. Ramzesin Mira hökmdarına yazdığa məktubda isə “Mən dostumla and içdim, ona qarşı savaşda sənə yardım edə bilmərəm” ifadəsi işlənmişdi. III Hattuşili isə Kadaşman-Enlilə “Misir hökmdarı ilə mən qardaş olduq və bu qərarı verdik: Biz qardaşıq və bunun üçün düşmənə qarşı birlikdə savaşacaq və dosta qarşı da birgə dost olacağıq”, - deyə yazmışdır.

Başqa bir fikrə görə, yazılı tarixdə ilk müqavilə Akkadla Elam arasında imzalanmışdır. Həmin müqavilənin də şərtləri eynilə bunun kimi sadə və lakonik idi: “Dostun dostumdur, düşmənin düşmənim!”[1]

Kadeş müqaviləsi, eramızdan əvvəl 13-cü əsrin əvvəllərində Kadeş döyüşünə son qoyan Misir fironu II Ramzes və Het kralı III Hattuşili arasında bəzi mənbələrə görə e.ə. 1285-ci ildə, bəzi mənbələrə görə e.ə. 1280-ci ildə, bəzi mənbələrə görə isə e.ə. 1286-cı ildə bağlanmış və Suriya ərazilərinin yenidən bölüşdürülməsi ilə nəticələnmiş sülh müqaviləsidir.

Yaxın Şərqdə imzalanan ilk müqavilə xüsusiyyətinə malikdir. Bu, indiyə qədər qeydə alınmış ən qədim beynəlxalq müqavilə olsa da, daha qədim müqavilələrin mövcudluğu da sübut edilmişdir. Əvvəlcə Akkad dilində yazılmış, sonra isə Misir dilinə və Het dilinə də kopyalanan və bərabər şərtlərlə imzalanmış müqavilənin gil tabletdən surəti, 1906-cı ildə Het imperatorluğunun paytaxtı olan Hattuşa (Boğazköy) şəhərindəki qazıntılar nəticəsində tapılmışdır.

Əvvəlcə[redaktə | əsas redaktə]

Suriya, eradan əvvəl XIII əsrdə Het kralı Muvatalli və Misir fironu II Ramzesin hədəfində idi. Onlar Suriyada öz hegemonluqlarını təmin etməyi qarşılarına məqsəd qoymuşdular. Bu məqsəd tərəfləri e.ə 1274-cü ildə indiki Suriya və Livan sərhədində, Orentos çayı üzərindəki Kadeş şəhərində üz-üzə gətirdi.

II Ramzes bu döyüşə 20 min döyüşçü və 2 min döyüş arabası ilə qatılmışdı. Ordu əsasən xəncər və 90 metrlik hədəfi dəqiq vuran kamanlarla silahlanmışdı.

Hetlər isə Misirin düşmənləri - Naharina, Karkemiş, Kadeş, Uqarit və Halpa çarları ilə birləşərək, 37 min nəfərlik piyada, 3500 döyüş arabasına malik ordu hazırlamışdı. Misirlilərin döyüş arabasından fərqli olaraq hetlərə məxsus arabalar üç ekipajlı, ağır və az manevrli idilər. Bu döyüşdə hetlər ilk dəfə dəmir kəsici silahdan istifadə etmişdilər.

Het kralı Muvatalli Misir ordusu ilə açıq döyüşdən çəkinirdi. Onun ordusu sayca çox olsa da, nizamsız idi və əsasən muzdlulardan təşkil edilmişdi. Orduda başqa xalqların, köçəri tayfaların olması ona rəhbərliyi xeyli çətinləşdirirdi. Belə nizamsız ordu ilə mütəşəkkil Misir ordusuna qalib gəlmək çox çətin idi. Het kralı hərbi gücdən çox, hiylə ilə qalib gəlməyə ümid bəsləyirdi. O, elə bu yola da əl atdı...

Bədəvilərin yalanı[redaktə | əsas redaktə]

E.ə. 1274-cü ilin aprelində Misir gözətçiləri iki bədəvini tuturlar. Onlar Ramzes uğrunda vuruşmaq istədiklərini, Het dövlətinin paytaxtı Hattuşa şəhərinin hakiminin yerində olmadığını deyirlər. Ramzes bu deyilənlərdən şübhələnmir və dərhal Kadeşə hücum edir. Nəticədə ordusunun 20-30 km aralıda olan diviziyaları bu hücuma qoşula bilmirlər. Belədə Ramzes öz qrupu ilə tək qalır.

Bir qədər sonra misirlilər daha iki heti ələ keçirirlər. Onlar bədəvilərin yalan söylədiklərini, bunun bir tələ olduğunu və hetlərin qoşununun Kadeş həndəvərində, şəhərdən şərqdə yerləşdiyini bildirirlər.

Bu arada Muvatalli 1000 ədəd döyüş arabasını Orentes üzərindən misirlilərin Ra diviziyasına həmlə etmək üçün göndərir. Bunu gözləməyən misirlilər böyük itkilər verərək, geri çəkilməyə məcbur olurlar. II Ramzes Amon diviziyası ilə Ranın geri çəkilməsindən və Ptah və Set diviziyalarının xeyli aralı olmasından çıxılmaz vəziyyətə düşür. Belə olan halda hetlər qələbəyə arxayınlaşırlar. Lakin sahil istiqamətindən Kadeşə yollanmış növbəti Misir dəstəsinin yetişməsi döyüşün taleyinə təsir edir, II Ramzes mühasirəni yara bilir. Bunu görən Muvatalli qaçan misirlilərin təqibini dayandıraraq, Orentes çayının şərq sahilində qərar tutmağa məcbur olur. Lakin II Ramzes az qüvvə ilə duruş gətirə bilməyəcəyindən öz dəstələrini toplayaraq, döyüşdən kənar qalmış Ptah və Set diviziyalarının mövqelərinə çəkilir.

Döyüşün sonu[redaktə | əsas redaktə]

II Ramzes öz məqsədinə - Kadeşin fəthinə nail ola bilmir. Uğrunda müharibə gedən ərazilər hetlərin əlində qalır.

Sülh müqaviləsi II Ramzes ilə Muvatallinin varisi III Hattusilis tərəfindən imzalanır. Bu müqavilə sülh, qardaşlıq, xarici təcavüzün və daxili siyasi konfliktlərin dəf edilməsində əməkdaşlıq haqqında məlum olan ən qədim müqavilələrdən biri, bəlkə də birincisidir.

Müqavilənin qısa mətni belədir: “Qoy əbədiyyətə qədər tanrı Misirin böyük hökmdarı və Het ölkəsinin böyük hökmdarı arasında bu müqaviləyə uyğun olaraq düşmənçilik yaranmasına imkan verməsin. Qoy Het ölkəsinin böyük hökmdarının övladları Misirin böyük hökmdarı Ramzesin övladları ilə qardaş olsunlar və sülh şəraitində yaşasınlar. Qoy Misirin böyük hökmdarı Ramzes hər hansı bir yeri tutmaq məqsədi ilə heç vaxt Het ölkəsinə hücum etməsin”.

Müqaviləyə əsasən, Suriya və Finikiyanın çox hissəsi hetlərin, Cənubi Finikiya, Cənubi Suriya və Fələstin isə Misirin nüfuz dairəsində qalır.[2]

Qədim Misirdə II Ramzes taxta çıxmış və ümumiyyətlə memarlıq baxımından ölkəsini gözəlləşdirmişdi. Ayrıca nizam qurmaq və ölkəsinin gücünü göstərmək üçün bəzi hərbi ekspedisiyalarda həyata keçirmişdir. Bununla yanaşı o, ölkəsinin Het Dövləti ilə siyasi və iqtisadi problemlərinin həllini də öz çiyinlərinə götürmüşdü. Kadeş müharibəsi hakimiyyətinin ən vacib hadisələrindən biridir. Müharibənin səbəbi e.ə. 13-cü əsrin əvvəllərində Misir və Het dövlətlərinin bərabər qüvvəyə çevrilmələri, Kral Muvatallinin ölkənin sərhədlərini dəyişdirmək istəyi, I Suppiluliuma dövründə Het şahzadəsi Zannanzanın kraliça Ankesenamonla evlənmək üçün Misirə gedərkən yolda misirlilər tərəfindən öldürülməsi, bu iki böyük dövlətin iqtisadi maraqlarının Şimali Suriya ərazisində birləşməsi idi. Digər bir səbəb, Het hakimiyyəti altında olan Amurru şəhər dövlətinin Misir tərəfinə keçməsidir. Kadeş yaxınlığında iki böyük ordu görüşdü və burada müharibə aparılmışdır.

Christian Jacq “Ramses Kadeş müharibəsi” kitabında II Ramzesin böyük bir müvəffəqiyyət qazandığından, Het qoşunlarının darmadağın edilməsindən və o dövrün Het kralı olan II Muvatallinin sülh üçün yalvardığından yazır. Əslində nə Misir, nə də Het dövlətinin Kadeş müharibəsinin əsl qalib olduğunu söyləmək olmaz. Ancaq Misir mənbələrinə baxmadan obyektiv bir yanaşma olarsa Hetlilərin hərbi baxımdan daha müvəffəqiyyətli olduğunu söyləmək olar. Müharibədən sonra III Hattuşili dövründə II Ramses ilə Kadeş müqaviləsi ilə imzalanmışdır. Müqavilənin Şərqdəki Assuriya təhlükəsinə qarşı da edildiyini iddia etmək olar.

Məzmunu[redaktə | əsas redaktə]

Müqavilə mətnində “Misir dövləti kralı, böyük kral, Misir ölkəsinin qəhrəman kralı, əzəmətli kral, qəhrəman Re-masesa-mai Amananın (II Ramses), Hatti ölkəsinin böyük kralı Hattuşili ilə dostluq, qardaşlıq və böyük səltənətlərini davam etdirmək üçün bağladıqları müqavilədir” deyilir.

Müqavilənin məzmunu iki vacib qərarı ehtiva edir.

  • Ölkələr, daxili və ya xarici olaraq iki ölkədən birinə edilən hər hansı bir hücumda bir-birlərinə yardım göndərəcəklər.
  • Misirdən Hatti ölkəsinə və ya Hatti ölkəsindən Misirə qaçanlar ölkələrinə qaytarılacaqlar, ancaq ağır cəzalandırılmayacaqlar.

Müqavilənin qısa mətni belədir: «Qoy gələcəkdə, əbədiyyətə qədər tanrı Misirin böyük hökmdarı və Xet ölkəsinin böyük hökmdarı arasında bu müqaviləyə uyğun olaraq düşmənçilik yaranmasına imkan verməsin. Qoy Het ölkəsinin böyük hökmdarının övladları Misirin böyük hökmdarı Ramses Meriamunun övladları ilə qardaş olsunlar və sülh şəraitində yaşasınlar. Qoy Misirin böyük hökmdarı Ramses hər hansı bir yeri tutmaq məqsədi ilə heç vaxt Xet ölkəsinə hücum etməsin». Müqavilənin mətnində daha sonra deyilirdi:

1). Əgər hər hansı bir düşmən Misirin böyük hökmdarı Ramsesin torpaqlarına hücum edərsə və o, Het ölkəsinin böyük hökmdarına «Mənimlə düşmənə qarşı qalibiyyətli qoşununla birgə çıxış et deyə müraciət edərsə, Het ölkəsinin böyük hökmdarı gələcək və onun düşmənlərini darmadağın edəcək. Və əgər Het ölkəsinin böyük hökmdarı şəxsən özü gəlmək istəməsə, o, ləngimədən öz piyada və cəng arabalarından ibarət qoşunu göndərəcək və onlar onun düşmənlərini darmadağın edəcək.

2). Əgər Misirin böyük hökmdarı Ramses Meriamun öz xidmətçilərinə qəzəblənərsə və ya onlar Ramsesə qarşı hər hansı bir çıxış edərlərsə və o, onları darmadağın etmək istəyərsə Het ölkəsinin hökmdarı onunla birlikdə olacaq və Ramsesin qəzəblənməsinə səbəb olanların hamısını məhv edəcək.

3). Əgər hər hansı bir düşmən Hetin böyük hökmdarının torpaqlarına hücum edərsə və o, Misir ölkəsinin böyük hökmdarına müraciət edərsə, Misir ölkəsinin böyük hökmdarı gələcək və onun düşmənlərini darmadağın edəcək.

4). Əgər böyük Het hökmdarının qulluqçuları ona qarşı qalxarlarsa, onda, Ramses Meriamun da müqaviləyə uyğun olaraq onunla birlikdə olacaq. Və əgər Het ölkəsinin hökmdarı «Mən öldükdən sonra qoy, Ramses Meriamun böyük Het hökmdarının varisinə köməyə gəlsin,» - deyərsə onda, o gəlsin.

5). Əgər hansı bir əyan Misir torpağından Het ölkəsinin hökmdarının yanına qaçarsa və yaxud Ramses Meriamuna tabe olan Asiyadakı hər hansı bir şəhər ondan ayrılarsa və o, Het hökmdarına müraciət edərsə qoy, böyük Het hökmdarı onları qəbul etməsin və əmr etsin ki, onları ağaları Ramses Meriamuna qaytarsınlar. Və əgər hər hansı bir əyan Het ölkəsindən qaçaraq böyük Misir hökmdarı Ramsesin yanına gələrsə yaxud hər hansı bir şəhərli, hər hansı bir kəndli... Ramsesin yanına gələrsə, qoy, Ramses onları qəbul etməsin və əmr etsin ki, onları Het hökmdarına qaytarsınlar.

6). Əgər Misir torpaqlarından 1, 2 və ya 3 adam qaçarsa və Het hökmdarın yanına gələrlərsə, qoy, Het hökmdarı onları tutsun və böyük Misir hökmdarına qaytarmağı əmr etsin. Ramses Meriamuna qaytarılacaq adama gəldikdə isə qoy, ona qarşı bu cinayətlə bağlı heç bir iş qaldırılmasın. Qoy, onun evini, arvad və uşaqlarını məhv etməsinlər, qoy, onun özünü öldürməsinlər. Qoy onun gözlərinə, qulaqlarına, ayaqlarına xətər yetirməsinlər. Qoy ona qarşı hər hansı cinayətə görə də iş qaldırmasınlar. Eyni qaydada Het ölkəsindən adamlar, fərdi yoxdur, 1, 2 və ya 3 nəfər olsun, qaçıb böyük Misir hökmdarının yanına gələrlərsə, qoy böyük Misir hökmdarı Ramses onları tutsun və böyük Het hökmdarına qaytarmağı əmr etsin və qoy böyük Het hökmdarı da onların cinayətləri ilə bağlı heç bir iş qaldırmasın, evlərini, arvad və uşaqlarını məhv etməsin, özünü öldürməsin, qulaqlarına, ağzına, ayaqlarına heç bir xətər gətirməsin, ona qarşı başqa bir cinayət işi qaldırmasın».

Müqaviləni nəzərdən keçirdikdə görürük ki, heç bir bənddə Misirlə Xet şahlığının sərhədindən danışılmır. Amma bütün məlumatlara görə aydın olur ki, II Ramses Misirin Asiya torpaqlarını genişləndirə bilmədi. Suriya və Finikiyanın çox hissəsi xetlərin, yalnız Cənubi Finikiya, Cənubi Suriya və Fələstin Misirin nüfuz dairəsində qaldı.[3]

Nəticələri və əhəmiyyəti[redaktə | əsas redaktə]

Bu, günə qədər qeydə alınmış və tapılmış ən qədim beynəlxalq müqavilədir. Boğazköy (Hattuşa) qazıntılarında tapılan gil tablet nümunəsi, İstanbul Arxeologiya Muzeyində sərgilənir, razılaşma mətninin böyüdülmüş nüsxəsi isə Nyu Yorkdakı Birləşmiş Millətlər Təşkilatının binasında nümayiş etdirilir.

Ədəbiyyat[redaktə | əsas redaktə]

  • Yusifov Y. Qədim Şərq tarixi. B., 1995
  • Авдиев В.И. Военные история древнего Египта. т.2. М., 1959
  • Авдиев В.И. История Древнего Востока. М., 1970
  • История дипломатии. II изд., т.I. М., 1959
  • Кузишина Н.И. ИсторияДревнего Востока. М., 1978
  • Маккуин Дж. Хетты и их современники в Малой Азии. М., 1983
  • Межгосударственные отношение и дипломатия на Древнем Востоке. М., 1987
  • Перепелкин Ю.Я. Переворот Амен-Хотепа IV. М., 1967

İstinadlar[redaktə | əsas redaktə]

  1. http://atv.az/news/interesting/2883-muharibeni-bitiren-ilk-yazili-sulh-muqavilesi-tarix
  2. https://axar.az/news/hadise/311335.html
  3. https://kayzen.az/blog/q%C9%99dim-%C5%9E%C9%99rq/7485/q%C9%99dim-misir-v%C9%99-xet-d%C3%B6vl%C9%99ti.html