Kano Eytoku

Vikipediya, azad ensiklopediya
Jump to navigation Jump to search

Kano Eytoku (狩野 永徳?, 26 fevral 1543, Kioto12 oktyabr 1590[1][2], Kioto)Momoyama dövründə yaşamış yapon rəssam. XVI əsrin dekorativ şirma rəssamlığındakı qalın, rəngli stili ilə tanınır. Dövrünün aparıcı və ən nüfuzlu rəssamlarından biri olmuşdur.

Həyatı[redaktə | mənbəni redaktə et]

1543-cü ildə Kiotoda incəsənət ailəsində doğulmuşdur.[3] Rəssamlıq təhsilini atası Kano Şoey və babası Kano Motonobudan almışdır.[3] İkisi də XVI əsrin birinci yarısının tanınmış incəsənət xadimləri idi.[3] Eytokunun ilk əsas işi Kiotonun əsas Zen məbədlərindən biri olan Daytoku məbədinin Cukoin dekorasiyası idi.[3] O, bu dekorasiyası 1566-cı ildə atası ilə birlikdə yerinə yetirmişdir.[3] Eytoku məşhurlaşdıqdan sonra Oda Nobunaqanın sevimli rəssamı olmuş və onun bir çox sifarişini yerinə yetirmişdir.[3] Bu sifarişlərin arasında Nobunaqanın Azuçi qəsrinin dekorasiyası və Kioto şəhərini əks etdirən şirma dəstləri də var idi.[3]

Nobunaqanın 1582-ci ildəki ölümündən sonra Toyotomi Hideyoşi Eytokuya hamilik etməyə başlamışdır.[3] Bu dövrdə Eytoku Hideyoşi üçün bir çox iş hazırlamışdır: Osaka qəsri və Kiotdakı Curaku sarayı üçün hazırladığı rəsmləri 1587-ci ildə tamamlamışdır.[3] Böyük bir komanda ilə birlikdə işləyən Eytoku yüzlərlə divar rəsmi və şırma hazırlamışdır.[3]

Yaradıcılığı[redaktə | mənbəni redaktə et]

Nobunaqa və Hideyoşinin qəsrlərinin orijinal halları salamat qalmadığı üçün onun bir çox işi yoxa çıxmışdır.[3] Lakin salamat qalmış bir neçə şirma dəsti onun üslubu haqqında fikir deməyə imkan verir.[3] Bunların arasında ən əhəmiyyətliləri sərv ağaclarını əks etdirən 6 qatlı şirma, şirləri təsvir edən böyük şirma və şahinlərlə şam ağaclarını əks etdirən iki cüt altıhissəli şirmadır.[3] Bütün bu əsərləri qalın üslubda, güclü fırça zərbələri və qızıl vərəqlərlə hazırlanmışdır.[3] Onun stili özünəməxsusdur və Momoyama dövrü üçün xarakterik üslub hesab olunur.[3]

Eytokunun işləri saraylarda və qəsrlərdəki ictimai otaqlarda nümayiş etdirilsə də, monoxrom mürəkkəb rəsmləri şəxsi mənzillər üçün də istifadə olunmuşdur.[3] Məsələn, karyerasının ilk illərində Cukoin sarayı üçün 16 qatlı fusuma hazırlamışdır.[3] Quşlar və güllərlə dolu olan mənzərə, "dörd cəhət" konsepsiyası və monoxrom mürəkkəb üslubu Çin mənşəlidir və bunu babası Kano Motonobudan götürmüşdür.[3] Lakin rəssamın stili əvvəlki Çin və Yaponiya üslubları ilə müqayisədə bir çox xarakterik xüsusiyyətə malik olduğu üçün orijinallığını qoruyur.[3]

İstinadlar[redaktə | mənbəni redaktə et]

  1. Kano Eitoku // Encyclopædia Britannica (ing.).
  2. Eitoku // RKDartists (nid.).
  3. 1 2 3 4 5 6 7 8 9 10 11 12 13 14 15 16 17 18 19 Gale, 1998. səh. 242

Ədəbiyyat[redaktə | mənbəni redaktə et]

  • Encyclopedia of World Biography (5-ci cild) (ingiliscə). Gale. 1998. ISBN 0-7876-2545-0. (#accessdate_missing_url)