Korin Erme

Korin Erme
Korin Erme
	fr. Corinne Hermès
Ümumi məlumatlar
Doğum adı	Corinne Bondeaux
Doğum tarixi	16 noyabr 1961 (64 yaş)
Musiqiçi məlumatları
Fəaliyyəti	müğənni
Fəaliyyət illəri	1979-cu ildən
Janr	pop musiqisi
	corinnehermes.com

Korin Erme əsl adı Korin Miller (fr. Corinne Hermès; 16 noyabr 1961^[1]) — Fransa müğənnisi. O, Lüksemburqu təmsil edərək "Si la vie est cadeau" mahnısı ilə 1971-ci il Avroviziya Mahnı Müsabiqəsinin qalibi olub.^[2]

Həyatı

Korin Ermenin karyerası 1974-cü ildə Rokbrün-sür-Arjansda keçirilən mahnı müsabiqəsində qalib gəlməsi ilə başlayıb. Beş il sonra, onun "La ville où je vis / Le blouson gris" sinqlının yazılışı zamanı bəstəkar və prodüser Bernar Estardi onun səsini eşidib və ona tezliklə işıq üzü görəcək "36 Front populaire" musiqili komediyasında Jülyen Klerk ilə tərəf-müqabili olacağı baş qadın rolunu təkl edib. Müzikldakı mahnılardan ibarət ikiqat albom buraxılsa da, siyasi səbəblərə görə bu müzikl heç vaxt səhnələşdirilməyib — solçu hökumətə qarşı satirik tənqidlər Fransadakı mərkəz-sağ hökumətin dövrü ilə vaxt baxımından üst-üstə düşməyib.

1983-cü ildə Korinn, Almaniyanın Münxen şəhərində keçirilən 28-ci Avroviziya Mahnı Müsabiqəsində Lüksemburqu təmsil etmək üçün RTL tərəfindən daxili seçim fərmanı ilə təyin olunub. Onun Jan-Pyer Millers tərəfindən bəstələnmiş və sözləri Alen Qarsiyaya məxsus olan "Si la vie est cadeau" mahnısı müsabiqə gecəsi sonuncu sırada ifa edilib^[3] və 6 rəqib ölkədən maksimum xal almaqla ümumilikdə 142 xal toplayıb. Bu, Lüksemburqa indiyə qədərki beşinci və sonuncu qələbəsini gətirmək üçün kifayət edib. Belə ki, o, ikinci yerdə qərarlaşan İsrail təmsilçisi Ofra Hazanı cəmi 6 xallıq cüzi bir fərqlə qabaqlayıb. Bu qələbə, 90-cı illərin ortalarında İrlandiya hər iki ölkəni geridə qoyana qədər, Lüksemburqu ən çox qələbə qazanan ölkə kimi Fransa ilə eyni sıraya gətirib. Bu, 28 buraxılış ərzində qalib gələn on ikinci fransızdilli mahnı olub, lakin o vaxtdan bəri yalnız iki fransızdilli iştirakçı qalib gələ bilib. Onun qalib gələn mahnısı Fransanın top-10 hit-paradında doqquz həftə qalıb və müsabiqədən bir həftə sonra 4-cü pilləyə yüksəlib. Lakin İsveç və İsveçrədə qısa müddət ərzində top-20-yə daxil olmasını nəzərə almasaq, bu mahnı həm alman, həm də ingilis dillərində versiyalarının yazdırılmasına baxmayaraq, 1960-cı illərin əvvəllərindən bəri digər ölkələrdə ciddi kommersiya uğuru qazanmayan ilk Avroviziya qalibi olub.

Qələbəsindən sonra Korinn yeni albomunu elan etsə də, yalnız iki mahnı — "Vivre à deux" və "Michaël" işıq üzü görüb və qısa müddət sonra onun prodüseri Haim Saban ABŞ-a köçüb. 1986-cı ildə o, "Ma liberté" sinqlını buraxıb, 1989-cu ildə isə Fransada top-20-yə daxil olan və Belçikanın fransızdilli hit-paradlarında 2-ci pilləyə yüksələn "Dessine-moi" mahnısı ilə yenidən uğur qazanıb. Sonradan Korin, Fransa Mədəniyyət Nazirliyi tərəfindən təqdim olunan "Victoires de la Musique" musiqi mükafatlarında "Ən yaxşı gənc qadın ifaçı" (kəşf) kimi tanınıb. Mahnının ilk dəfə on il əvvəl işıq üzü gördüyünü nəzərə alsaq, bu qərar mübahisələrə səbəb olub.

1993-cü ildə o, TF1 telekanalının "Les Grandes Marées" dram serialının ana musiqisi kimi istifadə olunmaq üçün Fransua Valeri tərəfindən bəstələnmiş "L'amour est artiste" mahnısını yazdırıb. 2000-ci ildə o, 2000-ci il Avroviziya Mahnı Müsabiqəsində Estoniyanın təmsilçisini seçən beynəlxalq münsiflər heyətində Fransanı təmsil etmək üçün dəvət alınb. Növbəti il isə 2001-ci il Avroviziya Mahnı Müsabiqəsində Fransanın səsvermə nəticələrini təqdim edib.

2006-cı ildə "Chérie FM" və "Fnac" ilə tərəfdaşlıq çərçivəsində "Vraie" adlı yeni albomunu çıxarıb. Həmin albomdan iki yeni sinql — "S'il n'y avait pas les mots" və "On vit comme on aime" işıq üzü görüb; sonuncu mahnının klipində Korsika mənşəli Belçika komiki Fransua Vinsentelli rol alıb. Əvvəllər buraxılmamış "Seule sans toi" mahnısı 2009-cu ildə "I love you in Beautiful Paris" adlı toplu alboma daxil edilib və Korinn 2012-ci ildə özünün ən yaxşı mahnılarından ibarət ("best-of") albomunu təqdim edib. Onun indiyə qədərki ən son albomu olan "Intemporelle" 2019-cu ildə işıq üzü görüb və məşhur fransız və beynəlxalq mahnıların 10 kover versiyasından ibarətdir.

Diskoqrafiyası

1980 — 36 Front populaire
1997 — Ses plus grands succès
2006 — Vraie
2008 — Si la vie est cadeau — 25 ans

İstinadlar

1 2 Bibliothèque nationale de France BnF identifikatoru (fr.): açıq məlumat platforması. 2011.
↑ "Si la vie est cadeau - lyrics". The Diggiloo Thrush. 25 mart 2008 tarixində arxivləşdirilib. İstifadə tarixi: 9 iyun 2026.
↑ Eurovision Song Contest 1983 // Eurovision Song Contest. 23 aprel 1983. ARD / en:EBU.

Xarici keçidlər

Vikianbarda Korin Erme ilə əlaqəli mediafayllar var.
(fr.) Official site
(fr.) Site du Concours Eurovision de la Chanson en français, base de données complète (Non official)
Si la vie est cadeau lyrics with English translation
(fr.) Corinne Hermès at Bide et Musique
Korin Erme — IMDb səhifəsi

[_e832b0be201e9564-1] 1 2 Bibliothèque nationale de France BnF identifikatoru (fr.): açıq məlumat platforması. 2011.

[DG-2] "Si la vie est cadeau - lyrics". The Diggiloo Thrush. 25 mart 2008 tarixində arxivləşdirilib. İstifadə tarixi: 9 iyun 2026.

[3] Eurovision Song Contest 1983 // Eurovision Song Contest. 23 aprel 1983. ARD / en:EBU.

[1]

[2]

[3]