Mübariz Abbasov

Mübariz Abbasov
Mübariz Əfqan oğlu Abbasov
Şəxsi məlumatlar
Doğum tarixi	10 yanvar 1969
Doğum yeri	Gədəbəy rayon Arıqıran kəndi
Vəfat tarixi	1 mart 1995 (26 yaşında)
Vəfat yeri	Kəlbəcər rayonu
Vəfat səbəbi	Şəhid
Dəfn yeri	Gədəbəy rayonu
Vətəndaşlığı	SSRİ→ Azərbaycan
Hərbi fəaliyyəti
Mənsubiyyəti	Azərbaycan Ordusu
Qoşun növü	Quru qoşunları
Xidmət illəri	1993-1995
Rütbəsi	Gizir
Döyüşlər	Qarabağ müharibəsi

Mübariz Əfqan oğlu Abbasov (10 yanvar 1969 – 1 mart 1995, Kəlbəcər rayonu) — Azərbaycanlı şəhid.

Həyatı

Abbasov Mübariz Əfqan oğlu 1969-cu ildə yanvar ayının 10-da Gədəbəy rayonunun Arıqıran kəndində anadan olmuşdu. Orta məktəbi bitirdikdən sonra hərbi xidmətə çağırılmışdı. Sonra Bakıya işləməyə gəlmişdi. 1993-cü ilin yanvarında torpaqlarımızı müdafiə etmək üçün könüllü olaraq cəbhəyə yollanmışdı. Ağdərə bölgəsində kəndlərimizin azad edilməsi uğrunda gedən döyüşlərdə xüsusi şücaətlər göstərmişdi. Kəlbəcər, Füzuli, Ağdam, Tərtər, Murovdağ döyüş bölgələrində azğın düşmənlə ölümdirim savaşlarında zabit heyətinin və əsgər yoldaşlarının ehtiramını qazanmış, sıravilikdən mühəndis istehkam qurğularının taqım komandiri vəzifəsinə irəli çəkilmişdi. 1993-cü ilin sonlarında Kəlbəcər uğrunda döyüşlərdə Mübariz altı erməni quldurunu məhv etmiş, onların silahını və bir minaaxataran cihazı gətirib hissəyə təhvil vermişdi. Bir dəfə də döyüş yoldaşlarını və dəstə komandirini mühasirədən çıxara bilməsi onun əsl qəhrəmanlığından xəbər verirdi. Bu vaxt Mübariz yaralanmışdı. Üç ay hərbi qospitalda müalicə olunduqdan sonra yenə öz hərbi hissəsinə qayıtmışdı. Sonra mahir döyüşçü 3 aylıq zabit kursuna göndərilmiş, gizir rütbəsində taqım komandiri kimi hərbi hissəyə qayıtmışdı. Mübariz Abbasov 1995-ci il martın 1-də növbəti tapşırığı yerinə yetirərkən döyüşçü dostu Namiqlə birlikdə həlak oldu.