Məlikov qardaşlarının evi

Məlikov qardaşlarının evi
Ölkə	Azərbaycan
Şəhər	Bakı
Yerləşir	İslam Səfərli küç.13
Aidiyyəti	Mirzə Ələkbər Sabir adına Mərkəzi Şəhər Kitabxanası
Memar	Vartan Sarkisov
Tikilmə tarixi	1900
Üslubu	neobarokko
Vəziyyəti	yaxşı
Azərbaycandakı tarixi abidələrin milli qeydiyyatı
İstinad nöm.	3494
Kateqoriya	Bina
Əhəmiyyəti	Yerli əhəmiyyətli
40°22′18″ şm. e. 49°50′07″ ş. u.
Məlikov qardaşlarının evi
Vikianbarda əlaqəli mediafayllar

Məlikov qardaşlarının evi — Bakı şəhərində, İ. Səfərli 13, S. Tağızadə 121 və Tolstoy 136 küçələrinin kəsişməsində yerləşən tarixi malikanədir. Bina 1900-cü ildə Vartan Sarkisovun layihəsi əsasında neobarokko üslubunda inşa edilmişdir.

Tarixi

İnşası

Bina 1900-cü ildə memar Vartan Sarkisovun layihəsi əsasında inşa edilmişdir. Mülkün sahibi Məlikov qardaşlarıdır.

Sonrakı istifadəsi

Əsas məqalə: Mirzə Ələkbər Sabir adına Mərkəzi Şəhər Kitabxanası

Əvvəllər yaşayış binası kimi istifadə olunmuş binada 1922-ci ildən Azərbaycanın ən köhnə kütləvi kitabxanası olan Mirzə Ələkbər Sabir adına Mərkəzi Şəhər Kitabxanası yerləşdirilmişdir. Kitabxana 1919-cu ilin mart ayında, Nəriman Nərimanov, Dadaş Bünyadzadə, Əbdürrəhim bəy Haqverdiyev, Cəfər Cabbarlı tərəfindən əsası qoyulmuş "Xəzər sahili istehlak cəmiyyəti" adlı təşkilatın təşəbbüsü ilə yaradılmışdır. Azərbaycan qadınlarını geniş sürətdə kitabxanaya cəlb etmək üçün fəaliyyətə başladığı dövrdən kitabxana "Oxucu qadınlar dərnəyi" təşkil etmişdir. 1922-ci ildə Sabirin vəfatının on illiyi ilə əlaqədar olaraq kitabxanaya onun adı verilmiş və həmin ildən kitabxana Məlikovların malikanəsində yerləşdirilmişdir.

Memarlıq xüsusiyyətləri

Məlikovun iki mərtəbəli yaşayış evi forştadtın tarixi məhəllələrinin memarlıq-planlaşdırma həllinin mühüm elementlərindən biridir. Bu evdə tikilinin estetik keyfiyyəti üçün böyük əhəmiyyət kəsb edən yeni tikinti materialı olan qırmızı tökmə kərpiclə order sisteminin zəngin plastikasından uğurla istifadə edilmişdir. Əsas fasad rizalit sistemli daş formanın arxitektur kütlələrin ifadəsinin inkişaf etmiş impulsunu verən xüsusi kompozisiya üsulları ilə fərqlənir. Bina klassik formaların həcmi cəhətdən plastik tarazlığı vasitəsilə ətraf mühitlə məkan əlaqəsi yaradır.

Fasadın daşdan yonulmuş memarlıq elementlərinin reylefliliyi vasitəsilə nail olunmuş fiqurlu forması mükəmməl həll edilərək XX əsrin əvvəllərində memarlığın mürəkkəb inkişaf prosesi şəraitində binanın bədii mahiyyətinin palitrasını meydana çıxarır.

Ədəbiyyat

• Fətullayev, Şamil. Bakının memarlıq ensiklopediyası (az.). Bakı: Şərq-Qərb nəşriyyatı. 2013. səh. 528. ISBN 978-9952-32-020-6.