Mamagama

Mamagama
Əsas məlumatlar
Üslub	İndie pop · Alternativ rok
Fəaliyyət illəri	2021-ci ildən etibarən
Ölkə	Azərbaycan
Dil	Azərbaycan dili
Heyət	Asəf Mişiyev Həsən Heydər Arif İmanov
Keçmiş üzvlər	Roman Zilyanev Klim Qudin

Mamagama musiqi qrupu 2021-ci ildə Bakıda yaranmışdır. Qrupun tərkibinə vokalist Asəf Mişiyev, gitarist Həsən Heydər və zərb alətləri ifaçısı Arif İmanov daxildir. Qrup, rok, pop və ənənəvi Azərbaycan musiqisinin unikal birləşməsi, enerjili səhnə təqdimatları və dərin, emosional musiqi mətnləri ilə tanınır.

Mamagama, "Avroviziya 2025" Mahnı Müsabiqəsində Azərbaycanı "Run with U" adlı dinamik yeni mahnıları ilə təmsil edəcək.

Musiqi fəaliyyəti

2021-ci ildə Bakıda yaranan Mamagama, müxtəlif musiqi qruplarında təcrübəyə malik üzvlərdən ibarətdir. Qrup, bir neçə beynəlxalq festivallarda iştirak edərək tez bir zamanda tanınmağa başladı.

Qrupun vokalisti Asəf Mişiyev, 2020-ci il "The Voice" layihəsində iştirak edib. O, Polina Qaqarinanın komandasına qoşularaq "knockout" mərhələsinə qədər çatıb.

2022-ci ildə Mamagama, Albaniyanın ən nüfuzlu musiqi festivallarından biri olan Kënga Magjike festivalında, həmçinin Festivali i Këngës-də iştirak edib. "Dreamer" adlı mahnılarının təqdimatı ilə "International Artists" kateqoriyasında ilk mükafatlarını qazanıblar.

Həmin ilin sonunda onlar "Avroviziya 2023" Mahnı Müsabiqəsində Azərbaycanı təmsil etmək üçün seçimlərə qoşulublar. Qrup beş finalçıdan biri kimi seçilsələr də, nəticədə Azərbaycanı Liverpulda TuralTuranX təmsil edib.

4 fevral 2025-ci il tarixində İTV, Mamagamanın "Avroviziya 2025" Mahnı Müsabiqəsində, İsveçrənin Bazel şəhərində Azərbaycanı təmsil edəcəklərini açıqladı.

Musiqi tərzi

Mamagama ənənəvi musiqi elementlərini müasir üslublarla birləşdirmək və indie pop və alternativ rok kimi təsirləri özündə cəmləşdirməklə unikal və dinamik bir tərz yaradır.

Bu tərz, qrupun baş vokalisti Asəf Mişiyevin dağ yəhudi mədəni fonu ilə daha da zənginləşir. Bob Dylan və Amy Winehouse kimi yəhudi sənətçilərinin təsirindən və Azərbaycanın zəngin musiqi irsindən ilham alan Mişiyev, qrupun musiqisinə dərinlik və emosional rezonans qatır.

Heyət

Hal-hazırda

• Asəf Mişiyev – vokalist
• Həsən Heydər – gitara ifaçısı
• Arif İmanov – zərb alətləri ifaçısı

Əvvəllər

• Roman Zilyanev – gitara ifaçısı
• Klim Gudin – zərb alətləri ifaçısı

Diskoqrafiya

Mamagama'nın kataloqu altı single-dan ibarətdir.

Mahnı	İl
''My Medicine'	2022
"Sleep"
"Dreamer"
"River"	2023
"This Is For You"
"Run with U"	2025