Mingəçevir işıqları (qəzet)

Vikipediya, azad ensiklopediya
Jump to navigation Jump to search
Picto infobox newspaper.png
Mingəçevir işıqları
Format A4
Təsisçi(lər) Fərman Nəbiyev
Baş redaktor Fərman Nəbiyev
Yaranma tarixi 1948
Dil Azərbaycan dili
Səhifə 8
Baş qərargah Mingəçevir, Rəsul Rza küçəsi, 23
Tiraj 1000
mi-news.az

Mingəçevir işıqlarıMingəçevirdə nəşr olunan qəzet.

Tarixi[redaktə | əsas redaktə]

"Mingəçevir işıqları" qəzeti 1948-ci ildən 1991-ci ilədək yerli hakimiyyət orqanlarına məxsus olmuşdur. F.Nəbiyevin təsisçiliyi ilə 25 mart 1999-cu ildə 10/110 nömrə ilə Azərbaycan Respublikasının Ədliyyə Nazirliyində hüquqi şəxs kimi qeydiyyatdan keçmiş və o zamandan bəri qəzetin 400-ə yaxın sayı çıxmışdır.

Redaksiya fəaliyyətə başladıqdan 3 il sonra poliqrafiya sexini, 2009-cu ildə isə Mingəçevir Media Mərkəzini açmışdır. Hazırda burada Media Mərkəzi, poliqrafiya sexi, mətbəx və yeməkxana otaqları, İcma Məlumat Mərkəzi və redaksiyanın iş otaqları yerləşir. Qəzetin digər ofisi Heydər Əliyev prospekti, 28/12 ünvanında yerləşir. Dövlət Əmlak Komitəsindən icarəyə götürülüb və həmin ofisdə redaksiyanın yayım və reklam departamenti yerləşir.

Redaksiyaya onun təsisçisi və baş redaktoru rəhbərlik edir.

Redaksiya 4 bölmədən ibarətdir:

  • Xəbərlər şöbəsi
  • Reklam, elan və yayım idarəsi
  • Poliqrafiya sexi
  • Mingəçevir Media Mərkəzi

Redaksiya həftədə bir dəfə olmaqla A4 ölçüdə 8 səhifədə qəzet nəşr edir. Qəzetin səhifələrində şəhərdə, ölkədə və dünyada baş verən ictimai-siyasi hadisələr barədə xəbərlər, siyasi şərhlər, araşdırma və analitik materiallar, tənqidi məqalələr, elan və reklamlar yerləşdirilir. Hər həftə 1000 nüsxə tirajla nəşr olunan qəzetin 500 nüsxəsi daimi abunəçilərə göndərilir. Hər dəfə 200 nüsxəyə qədər pərakəndə yolla satılır, qalan nüsxələr isə əlillər, qocalar, ictimai birliklər arasında pulsuz yayılır.

Redaksiya Mingəçevirdə ilk dəfə olaraq "Şəhərin fəxri" müsabiqəsini keçirib. 4 ay davam edən ünvanlı sorğuların nəticəsində fəaliyyəti ilə seçilən təhsil, səhiyyə, mədəniyyət, sənaye, ticarət və iaşə müəssisələri, banklar və gözəllik salonları ictimaiyyətə təqdim olunub. Mingəçevirin 60 illik yubileyi ərəfəsində qəzetin adından 8 qalibə və 16 mükafatçıya diplomlar verilib.

Qəzetin əməkdaşları İnternyus-Azərbaycan, "Yeni Nəsil" Jurnalistlər Birliyi, Azərbaycan Jurnalistlər Birliyi, Mediada Müxtəliflik İnstitutu, Vaşinqtondakı Beynəlxalq Jurnalistika Mərkəzi və digər qurumlarla əməkdaşlıq etmiş və onların layihələrinə qoşulmuş, eyni zamanda ABŞ, İsveç, Polşa, Rumıniya, Litva, Ukrayna, Gürcüstan və Azərbaycanda keçirilən beynəlxalq tədbirlərdə və peşəkarlığı artırma kurslarında iştirak etməklə zəngin təcrübə qazanmışlar.

Qəzetin auditoriya dairəsi: dövlət və özəl qurumlar, siyasi partiyalar və ictimai birliklər, təhsil müəssisələri, səhiyyə və mədəniyyət obyektləri, kommunal təşkilatlar və qismən də gənclərdir. İnformasiyaları vaxtaşırı yeniləmək şərtilə qəzetin internet versiyası hazırlanıb.

Mənbə[redaktə | əsas redaktə]