Nəbi Əsgərov

Vikipediya, azad ensiklopediya
Jump to navigation Jump to search
Nəbi Əsgərov
Nəbi Ələsgər oğlu Əsgərov
Doğum tarixi 24 yanvar 1956 (1956-01-24) (63 yaş)
Doğum yeri Gorarxı, Borçalı, Gürcüstan
Vətəndaşlığı Azərbaycan Azərbaycan

Nəbi Ələsgər oğlu Əsgərov — filologiya elmləri doktoru, professor.

Həyatı[redaktə | əsas redaktə]

Nəbi Ələsgər oğlu Əsgərov 1956-cı il yanvar ayının 24-də Gürcüstanın Borçalı mahalının Gorarxı (Təzəkənd) kəndində müəllim ailəsində anadan olmuş, 1963- 1973-cü illərdə Təzəkənd orta məktəbində təhsil almış, 1973- 1974-cü illərdə istehsalatda çalışmışdır. 1975-ci ildə V.İ.Lenin adına (indiki ADPU) Azərbaycan Dövlət Pedaqoji İnstitutunun filologiya fakültəsinə daxil olmuş, 1979-cu ildə həmin fakültəni fərqlənmə diplomu ilə bitirmişdir. Həmin ildə təyinatla Ağdaş rayonunun Kotavan kənd orta məktəbinə müəllim təyin edilmiş, 1981-ci ildə həmin məktəbdə direktor müavini vəzifəsinə irəli çəkilmişdir.

1982-ci ildə Azərbaycan dili ixtisası üzrə Azərbaycan Dövlət Pedaqoji İnstitutunun aspiranturasına daxil olmuş, 1986-cı ildə “Azərbaycan dilində hidronimlər” mövzusunda müdafiə edərək filologiya elmləri namizədi alimlik dərəcəsi almışdır.

1984- 1991-ci illərdə Azərbaycan Dövlət Pedaqoji İnstitutunda pedaqoji və istehsalat təcrübə rəhbəri vəzifəsində fəaliyyətini davam etdirmişdir. 1991-ci ildən ADPU-nun Azərbaycan dilçiliyi kafedrasında müəllim, baş müəllim, dosent vəzifəsində çalışmışdır.

1999-cu ildə Respublikamızda ilk dəfə keçirilən bələdiyyə seçkilərində iştirak etmiş, Xətai rayon Xətai bələdiyyəsinin sədri seçilmişdir. 2008-ci ildə “Areal türk onomastik vahidlərinin linqvistik xüsusiyyətləri” mövzusundə doktorluq dissertasiyası müdafiə edərək filologiya elmləri doktoru elmi adı almışdır. 2010-cu ildən Azərbaycan dilçiliyi kafedrasının professorudur. Qədim türk yazılı abidələrinin dili, Azərbaycan dilinin tarixi, Azərbaycan onomalogiyasının əsasları fənlərindən mühazirə oxuyur, seminar məşğələləri aparır. O, universitetin ictimai işlərində yaxından iştirak edir, ADPU-nun filologiya fakültəsinin nəzdində fəaliyyət göstərən metodbirləşmənin və filologiya fakültəsi Elmi Şurasının üzvüdür.

Nəbi Əsgərov 150-dən artıq elmi məqalənin, “Azərbaycan dilində hidronimlər” (2002), “Xətai rayonu: mənəvi dünyası, keçmişi, bu günü” (2003), “Areal türk onomastik vahidlərinin linqvistik xüsusiyyətləri” (2005), “Azərbaycanın makrotoponimləri” (2009), “Adın tarixi, tarixin adi – Paleotoponimlər” (2010), “Azərbaycan hidronimlərinin semantik xüsusiyyətləri” (2011), “Azərbaycan çay adlarının tarixi-linqvistik təhlili” (2013) monoqrafiya və dərs vəsaitlərinin, Onomalogiya ixtisası üzrə magistr 2, bakalavr pilləsi üzrə 5 proqramın və 2 metodik vəsaitin, xaricdə dərc olunmuş bir neçə elmi məqalənin müəllifidir.

O, bir neçə elmlər namizədinə, 1 elmlər doktoruna opponentlik etmiş, onlarla namizədlik və doktorluq dissertasiyalarının avtoreferatlarına rəy vermiş, xeyli dilçilik əsərinin redaktoru və rəyçisi olmuş, onun rəhbərliyi ilə 30-dan artıq magistr müvəffəqiyyətlə dissertasiya müdafiə etmişdir. Təhsil Nazirliyinin fəxri fərmanına və Qızıl Qələm mükafatına layiq görülmüşdür.

Üç övladı var.