Naxçıvanın səsi

Vikipediya, açıq ensiklopediya
Keçid et: naviqasiya, axtar
Naxçıvanın səsi
Naxchivanin sesi.jpg
Bütöv adı Naxçıvanın səsi radiosu
Başlama tarixi 19 sentyabr 2001
Ölkə Flag of Azerbaijan.svg Azərbaycan
Dil Azərbaycan dili

Başlanğıc[redaktə | əsas redaktə]

Naxçıvanın səsi - 2001-ci ilin sentyabr ayının 19-da fəaliyyətə başlamış radio. Yarandığı ilk günlərdə radio yalnız Naxçıvan şəhərində və şəhərətrafı kəndlərdə yayımlanırdı. Lakin blokada şəraitində olan muxtar respublikada əhalinin belə bir radioya olan təlabatı və marağı, bu istiqamətdə daha bir addım atmaq zərurəti yaratdı. Belə ki, 2001-ci il oktyabrın 18-də, yəni Dövlət Müstəqilliyi günündə Duzdağ və İbadulla Radio-Televiziya Ötürücü Stansiyalarında quraşdırılan ötürücülərin işə düşməsindən sonra radioyayım 100.3 FM tezliyində Babək, Şərur, Ordubad, Culfa rayonlarında yayımlanmağa başladı. Radioyayımın keyfıyyətini yüksəltmək və əhatə dairəsini genişləndirmək məqsədilə Ordubad rayonu ərazisində yerləşən 2600 metr yüksəklikdə olan "Soyuq dağ" adlı nöqtədə 15 metr hündürlüyündə qüllə, ildırımötürücü qurğular, yüksək gücə malik kəsintisiz cərəyan mənbəyi ilə təchiz edilmiş ötürücü stansiya quraşdırıldı. Bu stansiya 30 avqust 2004-cü ildə istifadəyə verildi. Stansiyanın işə düşməsindən sonra "Naxçıvanın səsi" radiosunun yayımı əvvəlki tezliklərə əlavə olaraq 96 FM tezliyində MR-in ən ucqar dağlıq ərzilərinə ötürüldü. 6 sentyabr 2004-cü ildə isə əlavə olaraq Sədərək rayonu ərazisində quraşdırılan ötürücü vasitəsilə "Naxçıvanın səsi" radiosunu rayon ərazisində tam dinləmək imkanı yarandı. Hərtərəfli maddi-texniki baza ilə təmin olunan "Naxçıvanın səsi" radiosu sonrakı illərdə fəaliyyətini daha da genişləndirərək qlobal internet şəbəkəsinə qoşulmuşdur ki, bu da müasir radioyayımı üçün ən əsas amillərdən biridir. "Naxçıvanın səsi" radiosu 2004-cü il dekabr ayının 15-dən etibarən Naxçıvan MR Rabitə və İnformasiya Texnologiyaları Nazirliyinin Radio-Televiziya Ötürücü Mərkəzinin nəzdində fəaliyyətini davam etdirməyə başladı.

Fəaliyyətə başladığı ilk vaxtlardan radionun əsas məramı və məqsədi dinləyicilərini məlumatlandırmaq, maarifləndirmək, milli musiqilərimizin müşayiəti ilə rəngarəng və maraqlı verilişləri efırə təqdim etmək olmuşdur. Dinləyici marağını hər zaman öndə tutan radio xalqımızın qədim adət-ənənələrini, folklorunu, milli-mənəvi dəyərlərini təbliğ etməklə yanaşı, həm də müasir elmi, texnoloji yenilikləri də dinləyicilərinə çatdırır.

Radionun maraqlı və rəngarəng proqramlarla efır təminatında radio arxivinin böyük əhəmiyyəti vardır. Yayıma başladığı günlərdən yaradılan arxivdə verilişlər, eləcə də müxtəlif mahnı və musiqilər həm kompüter, həm də DVD formatında qorunub saxlanılır ki, bu da illər ərzində kifayət qədər geniş bir arxivin formalaşmasına gətirib çıxarmışdır.

2008-ci ilin yanvar ayının 1-dən isə "Naxçıvanın səsi" radiosu Ulu öndər Heydər Əliyevin siyasi fəaliyyətinin 35 illiyi münasibətilə yaradılmış "Kanal-35" Televiziyası ilə birləşərək vahid idarəetmə sisteminə keçmişdir. Bu tarixdən etibarən radio öz fəaliyyətini mütəmadi olaraq "Kanal 35" Televiziyası ilə əlaqələndirir. Bu əlaqələr dublyaj redaksiyasının fəaliyyətində özünü daha çox büruzə verir. Dublyaj olunacaq fılmlərin səsləndirilməsində də məhz "Naxçıvanın səsi" radiosunun aparıcılarının səsindən istifadə olunur. Bundan əlavə radionun səsyazma studiyasında müxtəlif verilişlərin və radiotamaşaların hazırlanması prosesi də həyata keçirilir.

"Naxçıvanın səsi" radiosuna fəaliyyətinin 7-ci ilində - 31 iyul 2008-ci il tarixdə Naxçıvan MR Televiziya və Radio Şurası tərəfındən müsabiqədənkənar xüsusi razılıq lisenziyası verilmişdir. Bu gün Naxçıvanın səsi radiosu 15 ildir ki, öz səsi ilə nəinki Naxçıvanda hətta internet vasitəsi ilə dünyada yayımlanır.