Pərvin Məmmədov (idmançı)

Pərvin Məmmədov
Şəxsi məlumatlar
Tam adı	Pərvin Rasim oğlu Məmmədov
Vətəndaşlığı	Azərbaycan
Doğum tarixi	16 fevral 1995
Doğum yeri	Bakı, Azərbaycan
Boyu	125 sm. (4 ft 4 in)
İdman növü	Pauerliftinq
Karyera illəri	2014–h. h.
Məşqçisi	İlqar İbişov (yığmada) Rasim Məmmədov (şəxsi)
Medallar Paralimpiya Oyunları Bürünc 2020 Tokio -49 Kq. Dövlət təltifləri

Pərvin Rasim oğlu Məmmədov (16 fevral 1995; Bakı, Azərbaycan) – Azərbaycanı təmsil edən pauerliftinqçi. 2020-ci ildə Yaponiyanın Tokio şəhərində baş tutan XVI Yay Paralimpiya Oyunlarında bürünc medala sahib olub.

Həyatı

Pərvin Məmmədov 1995-ci il fevralın 16-da Qaradağ rayonunda anadan olub. Anadangəlmə III qrup əlildir. 2010-cu ildə o, sənədlərini Əzim Əzimzadə adına Azərbaycan Dövlət Rəssamlıq Kollecinə verib. 2014-cü ildən isə pauerliftinqlə məşğul olur. Şəxsi məşqçisi Rasim Məmmədov, yığmada məşqçisi isə İlqar İbişovdur.

Karyerası

Pərvin Məmmədov 2014-cü ildə Ağsuda Azərbaycan Çempionatında mübarizə apardı və turnirin gümüş medalına sahib oldu. Bundan sonra o, 2015-ci ildə Azərbaycan yığmasına dəvət edildi.

2017-ci ildə Pərvin Məmmədov Macarıstanda baş tutan beynəlxalq turniri üçüncü pillədə başa vurdu. Həmin il o, həmdə Dünya Çempionatında 8-ci pillənin sahibi oldu.

2018-ci ildə Fransada açıq Avropa Çempionatının qalibi olan Pərvin Məmmədov, 2019-cu ilin aprel ayında Macarıstanda beynəlxalq turnirdə qızıl medala sahibi oldu. Daha sonra o, 2019-cu ildə Qazaxıstanda Dünya Çempionatında mübarizə apardı və turniri yeddinci pillədə başa vurdu.

Pərvin Məmmədov 2020-ci ildə İngiltərədə beynəlxalq turnirdə qızıl medal, 2021-ci ildə isə Gürcüstanda beynəlxalq turnirdə gümüş medal qazandı.

2021-ci ilin avqust ayında Pərvin Məmmədov Yaponiyada baş tutan XVI Yay Paralimpiya Oyunlarında mübarizə apardı. O, 156 Kq. nəticə ilə bürünc medala sahib oldu.

Azərbaycan Prezidenti İlham Əliyevin 6 sentyabr 2021-ci il tarixli Sərəncamına əsasən XVI Yay Paralimpiya Oyunlarında qazandığı nailiyyətlərə və Azərbaycan idmanında xidmətlərinə görə Pərvin Rasim oğlu Məmmədov 3-cü dərəcəli "Vətənə xidmətə görə" ordeni ilə təltif edildi.