Pərviz Rüstəmbəyov

Vikipediya, azad ensiklopediya
Jump to navigation Jump to search
PƏRVİZ RÜSTƏMBƏYOV
Pərviz Rüstəmbəyov.jpg
Doğum tarixi 7 yanvar 1922(1922-01-07)
Doğum yeri Bakı
Vəfat tarixi 29 dekabr 1949 (27 yaşında)
Vəfat yeri Bakı

Pərviz Rüstəmbəyov (1922-1949) — saksafonçu, cazmen

Həyatı[redaktə | əsas redaktə]

Pərviz İsmayıl bəy oğlu 7 yanvar 1922-ci ildə Bakı şəhərində anadan olmuşdu. Hələ uşaq yaşlarından onda musiqiyə maraq yaranmışdı, Pionerlər Evinin musiqi dərnəyinə gedir, klarnetdə çalırdı. İstedadlı musiqiçi kimi o, dərhal diqqəti cəlb etdi və 1940-cı ildə Tofiq Quliyev onu öz orkestrinə dəvət etdi.

1944-cü ildə məşhur Eddi Rozner Bakıda qastrolda olarkən bu istedadlı saksofonçunun ifası onu valeh etdi və Rozner onu öz orkestrinə birinci saksofonçu və klarnetçi kimi dəvət etdi. Eddi Rozner kimi dünyaşöhrətli musiqiçi öz kollektivinə yalnız istedadlı ifaçıları götürürdü. 22-yaşlı saksofonçu bu təklifə görə fəxr etməli idi və o, həmin təklifi məmnuniyyətlə qəbul etdi. Pərviz ölkədə özünün iştirak etdiyi bütün konsertlərdə o qədər uğurla çıxış edirdi ki, buna görə onu hətta "sovet Benni Qudmeni" adlandırmağa başlamışdılar.Bir müddət Moskvada yaşamışdı. İki il sonra, artıq məşhur musiqiçi olan Rüstəmbəyov Bakıya köçdü və əvvəlcə "Krasnıy Vostok" (indiki "Azərbaycan") kinoteatrında, sonralar isə "Nizami" kinoteatrında öz orkestrini yaratdı. Lakin 1949-cu ilin yanvarında onu "Qərbə pərəstişkarlıq"da təqsirləndirərək işdən azad etdilər. Pərviz Rüstəmbəyov musiqi aləmində "pozucu qərb incəsənətinə" pərəstiş edən heç olmazsa bir nəfəri nəyin bahasına olursa olsun, tapıb ifşa etməyi öz qarşılarına məqsəd qoymuş xüsusi xidmət orqanlarının nəzər dairəsinə düşdü.

1949-cu il may ayının 20-də Pərviz Rüstəmbəyov Azərbaycan SSR üzrə DİN qoşunlarının hərbi prokurorunun səlahiyyətlərini icra edən ədliyyə mayoru Ayriyanın sanksiyası ilə həbs edildi. Bu barədə qərarda qeyd edilmişdi ki, "Rüstəmbəyov antisovet və amerikapərəst əhval-ruhiyyəli şəxsdir".

Heç nədə günahı olmayan, heç bir - nə ağır, nə də yüngül cinayət törətməyən 27 yaşlı caz musiqiçisi Pərviz Rüstəmbəyov o dövrün sovet qanunlarına görə 15 il müddətində həbs cəzasına məhkum edildi. Totalitar rejimin cəza tədbirləri maşını belə işləyirdi.

1949-cu il dekabrın 29-da Pərviz Rüstəmbəyov artıq həyatdan getmişdi. "Xüsusi müşavirənin" iclasına hələ bir neçə saat qalmış, səhər saat 3:50-də 877 nömrəli məhbus Pərviz Rüstəmbəyov Azərbaycan DTN-in daxili həbsxanasında çox müəmmalı bir şəraitdə vəfat etmişdi…

İstinadlar[redaktə | əsas redaktə]