Pambıqçı Bərdə FK

Pambıqçı Bərdə FK
Pambıqçı Bərdə FK
	220x80px
Ləqəb(lər)	pambıqçılar
Rəng(lər)	göy, ağ;
Stadionu	Bərdə şəhər stadionu

Pambıqçı futbol klubu Bərdə şəhərində yaranmışdır. Müxtəlif vaxtlarda "Pambıqçı", "Qarabağ" adları ilə 6 dəfə futbol üzrə Azərbaycan çempionatının elitasında iştirak etmişdir.

"Pambıqçı" komandası hələ SSRİ dönəmində mövcud olub və müntəzəm olaraq, Azərbaycan SSR çempionatında çıxış edib. Müstəqilliyin əldə edilməsindən sonra 1992-ci ildə təşkil olunan ilk Azərbaycan çempionatında 26 komanda arasında "Pambıqçı" da var idi. Bölgə əhalisinin əsas məşğuliyyətini adı ilə tərənnüm edən kollektiv 1998-ci ilə kimi güclülər dəstəsinin sakini olub. Lakin həmin mövsüm artıq "Qarabağ" adı ilə çıxış edən kollektiv yüksək liqanı tərk edib.

"Pambıqçı" yüksək liqada 6 dəfə çıxış edib və bu müddətdə komandanın ən yaxşı nəticəsi 1993-cü il mövsümünə qeydə alınıb. Onda "A" qrupunda çıxış edən "Pambıqçı" 10 kollektiv arasında 5-ci olmuşdu. Qalan mövsümlərdə isə (1992-ci ildən 1997/1998 mövsümünə qədər müvafiq olaraq) 17, 11, 10, 8 və 14-cü yerləri tutmuşdu. Maraqlıdır ki, Bərdə təmsilçisi heç vaxt elitanı turnir vəziyyətinə görə tərk edənlər sırasında olmayıb. Yalnız 1995/1996 mövsümünü buraxan "pambıqçılar" onda da maliyyə problemləri üzündən yarışa qatıla bilməmiş, bununla belə, ölkə kubokunda mübarizə aparmışdılar (yeri gəlmişkən, "Pambıqçı" 7 dəfə kubok oyunlarında qüvvəsini sınayıb və ən yaxşı halda (5 dəfə) 1/8 finala qədər irəliləyib). Növbəti mövsümdən isə komandanın elitadakı "halal" yeri bərpa edilmişdi. Digər qeyd olunası məqam ondan ibarətdir ki, kollektivin 1998/1999 mövsümündə mübarizəyə qoşula bilməməsinin səbəbi birinci dəstəyə yuvarlanması yox, pulsuzluq üzündən dağılması olmuşdu. "Qarabağ"a çevrilən "Pambıqçı" 1998-ci ildə dağıldı.