Qadağan olunmuş meyvə

Yan Breyqel və Piter Paul Rubens "İnsanın günaha batması və Ədən bağı" adlı əsəri

Qadağan olunmuş meyvə — İbrahimi dinlərdə Allahın bəşəriyyətə yeməməyi əmr etdiyi, Ədən bağında bitən meyvəyə verilən ad. Bibliyanın Yaradılış kitabında Adəm və Həvva Allaha itaətsizlik edir və ilkin günahı törədərək xeyri və şəri dərketmə ağacının qadağan olunmuş meyvəsindən yeyirlər və Ədən bağından qovulurlar:

Rəbb Allah insana əmr edib dedi: «Bağdakı bütün ağacların bəhrəsindən istəyəndə yeyə bilərsən. Ancaq xeyirlə şəri bilmə ağacının meyvəsindən yemə, çünki ondan yeyən gün hökmən öləcəksən». Yaradılış 2:16-17

İbrahimi dinlərdən kənarda metafora kimi işlədildikdə, bu ifadə adətən qanunsuz və ya əxlaqsız hesab edilən hər hansı həzz və ya zövqə düşkünlüyü nəzərdə tutur.

Bibliyada

Yaradılış kitabındakı hekayəyə görə, ilk kişi və qadın olan Adəm və Həvva Ədən bağında yaşayırdılar. Onlar bir çox ağacın meyvəsindən yeyə bilərdilər, lakin Allah onlara xeyirlə şəri dərketmə ağacının meyvəsindən yeməyi qadağan etmişdi.

Yaradılış 3-də bir ilan qadını sınağa çəkir:

İlan qadına dedi: «Yox, əsla ölməzsiniz. Əksinə, Allah bilir ki, o meyvələrdən yediyiniz gün gözləriniz açılacaq və xeyirlə şəri bilərək Allah kimi olacaqsınız». Yaradılış 3:4-5

Bu biliyə sahib olmaq istəyən qadın qadağan olunmuş meyvədən yeyir və ondan kişiyə də verir və kişi də yeyir. Onlar çılpaq olduqlarını anlayır, əncir yarpaqlarından özlərinə paltar düzəldir və Allah yaxınlaşanda gizlənirlər. Allah onlardan nə baş verdiyini soruşanda Adəm meyvəni yeməsi üçün Həvvanın ona verdiyini, Həvva isə onu ilanın aldatdığını deyir. Bundan sonra Allah ilanı, qadını və kişini lənətləyir və onlar əbədi həyat ağacının meyvəsindən yeməmişdən əvvəl Adəmlə Həvvanı bağdan qovur.

Quranda

Əraf surəsinin 19-cu ayəsində Adəm və onun həyat yoldaşının Cənnətdə olduqları və orada onlara verilən hər şeydən yeyə bildikləri, lakin bir ağaca yaxınlaşmamaları əmr edildiyi bildirilir. Əks halda, onlar "zülm edənlər" hesab ediləcəkdilər.

Əraf surəsinin 20–22-ci ayələrində Adəmlə həyat yoldaşına vəsvəsə verərək onları aldadan Şeytandan bəhs edilir. Onlar ağacın meyvəsindən daddıqda, çılpaq olduqlarını dərk etdilər və Cənnətin yarpaqları ilə örtünməyə başladılar.

Rəbbi onlara müraciət edib buyurdu: “Məgər sizə bu ağacı (ağaca yaxınlaşmağı) qadağan etməmişdimmi? Şeytan sizin açıq-aşkar düşməninizdir, deməmişdimmi?” Əraf surəsi, 22-ci ayə