Qarabağ FK

Bu məqalə Ağdam şəhərini təmsil edən Qarabağ FK haqqındadır. Digər mənalar üçün Qarabağ FK (dəqiqləşdirmə) səhifəsinə baxın.

Qarabağ FK
Klubun tam adı	Qarabağ Futbol Klubu
Ölkə	Azərbaycan
Ləqəb(lər)	Atlılar Köhlən Atlar
Rəng(lər)	Göy–Ağ
Yaranma tarixi	1951) (1951), "Məhsul" adı ilə 1987) (1987), "Qarabağ" adı ilə
Stadionu	Azərsun Arena Tofiq Bəhramov adına Respublika Stadionu "İmarət" stadionu
Tutumu	5.850, 31.200
Prezidenti	Tahir Gözəl
Baş məşqçisi	Qurban Qurbanov
Liqa	Azərbaycan Premyer Liqası
2025–26	2.
Ev forması Səfər forması Üçüncü forma
Rəsmi saytı
Vikianbarda əlaqəli mediafayllar

Qarabağ FK — Azərbaycanın Ağdam şəhərini təmsil edən peşəkar futbol klubu. 1992-ci ildən Azərbaycan Premyer Liqasında mübarizə aparır. Tarixində 12 dəfə Azərbaycan Premyer Liqasının qalibi olmuşdur. Klub eyni ildə həm ölkə çempionu olan, həm də ölkə kubokunu qazanan ilk Azərbaycan klubudur.

"Qarabağ" klubu bütün Azərbaycan çempionatlarında iştirak edən iki komandadan biridir (ikinci "Neftçi" klubudur). 1951-ci ildə, Ağdam şəhərində "Məhsul" idman cəmiyyətinin futbol komandası yaradılmaqla klubun əsası qoyulub.

Klub 1987-ci ildə "Qarabağ" adlandırılmış, həmin ilədək müxtəlif illərdə "Məhsul", "Şəfəq" və "Kooperator" olmaqla üç fərqli adla çıxış etmişdir. 1993-cü ilin 23 iyul tarixində Ermənistan Silahlı Qüvvələrinin Ağdam şəhərini işğal etməsindən sonra "Qarabağ" ev oyunlarını Bakı və digər şəhərlərdəki stadionlarda keçirmişdir.

"Qarabağ" avrokuboklarda mərhələ keçən ilk, Çempionlar liqasının qrup mərhələsinə vəsiqə qazanan və avrokuboklarda qrup mərhələsini keçərək play-offa yüksələn ilk və yeganə Azərbaycan klubudur.

2025-ci ilə olan məlumata görə dəyəri 28,5 milyon avro olan heyəti ilə "Qarabağ" ölkə çempionatında ən yüksək bazar dəyərinə malik klubdur.

Adları

• "Məhsul": 1951–1977
• "Şəfəq": 1977–1982
• "Kooperator": 1982–1987
• "Qarabağ": 1987–2001
• "Qarabağ-Azərsun": 2001–2004
• "Qarabağ": 2004-cü ildən indiyədək

Tarixi

1950-ci illər

Ağdamda futbol komandası (1953-cü il)

"İmarət" stadionu 1951-ci ildə kənd stadionu kimi istifadəyə verilmişdir. Stadionun fəaliyyətə başlaması ilə "Məhsul" FK-nin (indiki "Qarabağ") yaranması üst-üstə düşmüşdür.

Həmin dövrdə "Məhsul" uğurlu çıxışlar göstərmiş, "Stalin rayonu" komandası üzərində 2:1 qələbə əldə etmiş, "Stepanakert" komandasını 3:1 hesabla məğlubiyyətə uğratmışdır.

1960-cı illər

Yarandığı gündən sonra bir müddət "Məhsul" adı ilə çıxış edən "Qarabağ" ilk dəfə 1966-cı ildə Azərbaycan SSR çempionatında iştirak etmişdir. Həmin il çempionatı 4-cü yerdə başa vuran "Qarabağ" 4 il ardıcıl olaraq ölkə birinciliyində mübarizə aparmışdır. Bu illər ərzində ən yaxşı nəticəni 1969-cu ildə 2-ci yeri tutmaqla qazanmışdır. Buna baxmayaraq, 1969-cu ildən sonra diqqətsizlik və maliyyə dəstəyinin olmaması səbəbindən komanda təxminən on il çempionatdan kənard qalmışdır.

1970–1980-ci illər

1974-cü ildə uşaqlardan ibarət "Qarabağ" futbol komandası təşkil olunmuşdur. Komanda Adil Nadirovun rəhbərliyi altında qısa müddətdə qələbələr qazanmağa başlamışdır. 1975-ci ildə komanda Azərbaycan komsomolu Mərkəzi Komitəsinin "Sevinc" kuboku uğrunda keçirilən yarışlarda zona üzrə birinci yerə çıxmışdır. "Qarabağ" həmin il respublika final yarışlarında da iştirak etmiş və üçüncü yerə çıxmışdır. Komandanın 1976-cı ildə də müvəffəqiyyətlər əldə etmişdir. "Sevinc" kuboku uğrunda respublika yarışlarının zona birinciliyində "Qarabağ" heyəti "Bərdə" komandasına 5:1, "Ağcabədi" komandasına isə 4:0 hesabı ilə qalib gələrək çempion olmuşdular. "Qarabağ" iyul ayında Bakıda keçirilən final yarışlarında da yüksək nəticələr əldə etmişdir. Bu dövrdə komandanın kapitanı Şamil Haqverdiyev, qapıçı Şakir Vəliyev ön plana çıxmışdır.

1977-ci ildə "Qarabağ" yenidən "Şəfəq" adı ilə bərpa edilmişdir. Ondan əvvəl komanda "Ehtiyat əmək qüvvələri" adlanırdı. Elə həmin il "Ehtiyat əmək qüvvələri" Azərbaycan SSR çempionatının 2-ci dəstəsində yarışmışdır. Ağdamın futbol komandası respublika birinciliyinin ikinci dəstəsində müvəffəqiyyətlə çıxış etmiş və birinci yerə çıxmışdır. Komandanın məşqçisi Adil Nadirov olmuşdur. Komandanın tərkibi əsasən 50 nömrəli texniki peşə məktəbinin uşaqlarından təşkil edilmişdir. Mövsümün sonunda komandanın hücumçusu Nadir Əsgərov Xankəndi şəhərini təmsil edən "Qarabağ" klubuna transfer edilmişdir.

1978-ci ildə Azərbaycan SSR Milli Futbol Çempionatında çıxış edən "Şəfəq"in heyətində Ənvər Axundov, Elşən Babayev, Adil Nadirov, Nazim Mehrəliyev, Eldar Bağırov, İnqilab Əhmədpur, Cavanşir Novruzov, Qasım Qasımov, Çingiz Əliyev, Kamil Məmmədov, Yusif Əsədov, Sabir Məhəmmədov, Yusif Əsədov, Loğman Talıbov, Gündüz Qəhrəmanov, Marsel Firidunov, Elxan Quliyev, Arzuman Cabbarov və Aqil Cabbarov, həmçinin komandaya həmin mövsüm qoşulan İxtiyar Allahyarov kimi oyunçular var idi.

"Şəfəq" komandasının yüksək liqadakı debütü və İmişlinin "Meliorator" komandasına qarşı baş tutmuşdur. Ağdam klubu "Meliorator" futbolçularını öz meydançasında qəbul etmişdir. Görüşdən əvvəl təntənəli şəraitdə çempionatın bayrağı qaldırılmışdır. Komandalar arasında keçirilən oyunu yüzlərlə azarkeş izləmişdir. "Şəfəq" respublika birinciliyinin yüksək liqasında mübarizəyə başlalıqları ilə görüşdə 2:0 hesablı qələbə qazanmışdır. Oyundan sonra rayon partiya komitəsinin təbliğat və təşviqat şöbəsinin müdiri B. Hüseynov, xalq maarif şöbəsinin müdiri Q. Hüseynov, 50 nömrəli texniki peşə məktəbinin direktoru F. Hacıyev, bədən tərbiyəsi və idman komitəsinin sədri Q. Qurbanov, komsomol komitəsinin nümayəndəsi B. Axundov futbolçuları qazandıqları parlaq qələbə münasibətilə təbrik etmişdilər. Komandaların görüşündən sonra stadionda oyunu tamaşa etmiş Xankəndi təmsilçisi olan "Qarabağ" komandasının baş məşqçisi Aleksandr Trofimov demişdir ki, "kənd uşaqlarından ibarət ağdamlıların məzmunlu, yüksək səviyyəli oyunu mənə xoş təsir bağışladı". Həmin dövrdə "Şəfəq" və "Qarabağ" klubları öz aralarında dostluq münasibətləri qurmuşdular.

Mövsümdə oyunların biri də uğurlu çıxışlar edən, Kazbek Tuayevin məşqçilik etdiyi "OİK Bakı" klubuna qarşı olmuşdur. Səfər oyunu heç-heçə bitmişdir. Oyundan sonra matçı izləyən Tofiq Bəhramov demişdir ki, "Kənddə idman zəifdir deyənlər yanılırlar. Bu da kənd atletlərinin əla oyunu!".

"Şəfəq" ardınca Lənkəran səfərindən bir xalla geri qayıtmış, sonra öz meydançasında Masallının "Viləş" futbol komandasını 4:0 hesabla məğlub etmişdir. Ertəsi gün "Şəfəq" Bakıda "Suraxanı" idmançıları ilə görüşmüş, oyun heç-heçə qurtarmışdır. Bu zaman "Şəfəq" dörd oyundan 6 xal əldə etmiş və qol buraxmamışdır.

Respublika futbol çempionatının yüksək liqasında "Şəfəq" məğlubiyyət əldə etmədən irəliləmiş, turnir cədvəlinin ikinci pilləsində öz mövqeyini daha da möhkəmləndirmişdir. "Şəfəq" Xankəndi şəhərində Əli Bayramlının (indiki Şirvan) "Energetik" komandası ilə keçirdiyi matçda 2:0 hesablı qələbə qazanmışdır, sonradan Mingəçevirin «PTM» komandasını öz meydançasında qəbul etmiş və onu da 2:0 hesabla məğlub etmişdir. Sonrakı oyunda öz meydançasında "Üzümçü" üzərində 4:1 hesablı qələbə etmiş "Şəfəq" üç oyunda 8 qol vurmuşdur.

"Şəfəq" 1982-ci ilə qədər Ağdam futbolunun yeganə təmsilçisi oldu. 1982-ci ildən 1987-ci ilə qədər isə klub "Kooperator" adı ilə yarışlara qatıldı. "Qarabağ" ilk dəfə Azərbaycan SSR çempionu adına 1988-ci ildə – Azərbaycan keçmiş SSRİ-nin tərkibində olarkən layiq görüldü. Həmin çempionluqdan sonra "Qarabağ" SSRİ çempionatının 2-ci dəstəsinə vəsiqə qazandı. 1989-cu ildə "Qarabağ" SSRİ çempionatının 9-cu zonasında yarışdı. 1990-cı ildə SSRİ çempionatının 2-ci dəstəsinin zona yarışlarında dəyişiklik edildiyindən "Qarabağ" Azərbaycan SSR çempionatının zona yarışlarında iştirak etmək məcburiyyətində qaldı.

1990-cı illər

1990-cı illərin əvvəlləri

1991-ci ildə SSRİ dağılandan sonra Azərbaycan Respublikasının müstəqil futbol çempionatı təşkil olundu. "Qarabağ" Azərbaycan çempionatının bütün mövsümlərində iştirak edən 2 komandadan biridir(Neftçi PFK ilə yanaşı). Təbii ki, müstəqillik illərində "Qarabağ"ın ağır günləri də az olmayıb. Azərbaycan tarixinin ən qara günlərdən biri olan Ağdam şəhərinin işğalı günü (23 iyul 1993-cü il) "Qarabağ" komandasının tarixində də ən qara gündür – həmin tarixdən etibarən komanda "qaçqın klub" kimi fəaliyyət göstərir.

Qeyd edək ki, 1992–1993-cü illərdə rəqiblərini Ağdamda qəbul edən "Qarabağ" burada 28 oyun keçirib. "Qarabağ" Ağdamda keçirdiyi son 22 matçda qalib gəlib. Əyalət təmsilçisinin evdə son məğlubiyyətindən isə daha uzun 27 oyunluq seriya keçir. Maraqlıdır ki, "Qarabağ"ın Ağdamda uduzduğu yeganə oyun onların müstəqilik tarixindəki ilk qarşılaşması olub. Və məğlubiyyətlə başlayan tarix qələbə seriyası ilə davam edib

"İmarət"də…

• … son oyun — "Qarabağ" – Turan Tovuz 1:0 (Azərbaycan kubokunun yarımfinalı, 12 may 1993)
• … son qol — Yaşar Hüseynov ("Qarabağ" – Turan Tovuz 1:0, Azərbaycan kubokunun yarımfinalı, 12 may 1993)
• … son fiti çalan hakim — Rüstəm Rəhimov ("Qarabağ" – Turan Tovuz 1:0, Azərbaycan kubokunun yarımfinalı, 12 may 1993)
• … son sarı vərəqə — Vəli Hüseynov (Qarabağ – Turan Tovuz 1:0, Azərbaycan kubokunun yarımfinalı, 12 may 1993)
• … son çempionat oyunu — "Qarabağ" – Xəzər Sumqayıt 1:0 (9 may 1993)
• … son qırmızı vərəqə — Aqil Məmmədov (Qarabağ – Xəzər Sumqayıt 1:0, 9 may 1993)
• … son penalti — Mehman Alışanov (Qarabağ – Xəzər Sumqayıt 1:0, 9 may 1993)
• … qonaqların son qolu — Samir Ələkbərov (Qarabağ – Neftçi Bakı 2:1, Azərbaycan kubokunun ¼ finalı, 28 aprel 1993)
• … son heç-heçə — Qarabağ – Kəpəz 0:0 (24 iyun 1992)
• … son məğlubiyyət — Qarabağ – İnşaatçı Sabirabad 1:2

1990-cı illərin sonları

XX əsrin son illərində klub maddi sıxıntılardan ciddi əziyyət çəkirdi. Məhz bu səbəbdən 1998–2001-ci illərdə ölkə çempionatının güclülər dəstəsində zəif nəticə göstərdi. Üstəlik maddi vəziyyət klubun aparıcı futbolçularının da "Qarabağ"ı tərk etməsinə gətirib çıxartdı.

Bütün bunlara baxmayaraq belə bir çətin dövrdə "Qarabağ" Avrokuboklarda mübarizə aparmışdır. Azərbaycan klublarından ilk dəfə mərhələ adlayan "Qarabağ"ın uğuru da məhz bu dövrə təsadüf edir. İsrailin Makkabi Hayfa klubu ilə baş tutmuş oyunların nəticəsində klub qələbə qazanaraq mərhələ adlamışdır. Azərbaycan futbolunun tarixində ilk dəfə olaraq Azərbaycana "böyük beşlik" təmsilçisi gəlmişdir. Bu Fransanın Monpelye klubu idi.

2000-ci illər

"Qarabağ-Azərsun"

XXI əsrin əvvəlində klub maddi problemlərlə üz-üzə qaldı. Bu problemlər 2001-ci ildə Azərbaycanda fəaliyyət göstərən ən böyük holdinqlərdən biri olan "Azərsun" şirkətinin komandanı sponsorluğa götürməsindən sonra həll olundu. "Azərsun" Holdinq şirkəti "Qarabağ"ın inkişafı üçün əməli işə girişdi. Şirkətin prezidenti Abdulbari Gözəlın bilavasitə şəxsi köməkliyi ilə komandanın maddi problemləri həll olundu. İmkansızlıq ucbatından digər klublara keçmiş eks-qarabağlılar heyətə qaytarıldı və həmin dövrdən klub "Qarabağ-Azərsun" adı ilə çıxış etməyə başladı.

Maddi vəziyyətin düzəlməsi klubun nəticələrinə də təsir göstərdi. 2001-ci ildə "Qarabağ-Azərsun" ölkə çempionatında 9-cu yeri tutsa da qarşıdakı mövsümə hazırlıq işləri ciddi gedirdi və iddiası böyük olan klubun qarşısına ən yüksək yerləri tutmaq vəzifəsi qoyulmuşdu. Lakin həmin dövrdə Azərbaycan futbolunda baş verən böhran səbəbindən ölkədə 2002–2003-cü ildəki çempionat yarımçıq dayandırıldığı üçün qarşıya qoyulan məqsədə nail olmaq mümkün olmadı.

Azərbaycan futbolundakı böhran başa çatdıqdan sonra, 2003-cü ildə "Qarabağ-Azərsun"un rəhbər strukturunda bir sıra dəyişikliklər aparıldı və Tahir Gözəl komandanın vitse-prezidenti təyin edildi. Tahir Gözəlin kluba gəlişindən sonra "Qarabağ"ın tarixində sanki yeni səhifə açıldı. Komandanın ölkə çempionatında uğur qazanması üçün bütün imkanlar səfərbər edildi. Və məhz bu səylərin nəticəsi idi ki, 2003–2004-cü il mövsümündə "Qarabağ" uzun fasilədən sonra yenidən Azərbaycan çempionatının mükafatçıları sırasında yer aldı və birincilikdə ilk dəfə bürünc medalları qazandı.

2022-ci ilin payızında klub ölkə çempionatında 10, bu mövsüm beş, keçmiş mövsümdə isə beş dəfə ardıcıl qalib gələn ilk Azərbaycan komandası kimi rekord vurdu.

27 aprel 2025-ci ildə Premyer Liqanın 2024/2025 mövsümünün 32-ci turunda "Sabah"la 1:1 hesabla bərabərə qalan "Qarabağ" mövsümün başa çatmasına 4 tur qalmış çempionluğunu rəsmiləşdirib və bununla da tarixində 12-ci dəfə və ardıcıl olaraq 4-cü dəfə Premyer Liqanın çempionu olub.

2024/2025 mövsümündə "Qarabağ" Azərbaycan Kubokunun 1 iyun 2025-ci ildə keçirilən final oyununda "Sabah" ilə qarşılaşıb. Mehdi Hüseynzadə adına Sumqayıt şəhər stadionunda oynanılan matçda "Qarabağ" rəqibinə 2:3 hesabı ilə məğlub olaraq turniri ikinci olaraq yekunlaşdırıb.

2025/2026 mövsümündə "Qarabağ" 29 yanvar 2026-cı ildə UEFA Çempionlar Liqasının VIII, sonuncu turunda "Liverpul"a məğlub olsa da, əsas mərhələdə topladığı 10 xal ilə liqa cədvəlində 22-ci yeri tutaraq Azərbaycan futbol tarixində ilk dəfə Çempionlar Liqasının pley-off mərhələsinə vəsiqə qazanıb.

Tarixi adın bərpası və yeni loqotip

"Qarabağ"ın rəhbərliyi 2004–2005-ci il mövsümündə İsveçdə yaşayan təcrübəli məşqçi İqor Ponomaryovu baş məşqçi postuna təyin etdi. Bundan sonra qısa zamanda Azərbaycanın müxtəlif yaş qruplarına aid yığma komandalarının üzvü olan bir sıra futbolçular heyətə cəlb olundu. Tahir Gözəlin təşəbbüsü ilə 2004-cü ildə "Qarabağ"ın tarixi adı özünə qaytarıldı və komanda yenidən bu adla adlandırılmağa başlandı. Bundan başqa Tahir bəy klub üçün yeni loqotip də hazırlatdırdı. İngiltərədə dizaynerlər tərəfindən hazırlanan bu loqotipdə "Qarabağ"ın simvolu olan Qarabağ atları təsvir olunub. Loqotipi bundan başqa futbola aid müxtəlif atributlar bəzəyir.

Qurban Qurbanov dövrü

Azərbaycan Kubokunda qələbə

2008-ci ildə Rasim Karadan sonra Qarabağın sükanı arxasına Qurban Qurbanov gətirildi. 2008/2009 sezonunda Azərbaycan Premyer Liqasında Qurban Qurbanovun komandası 5-ci yer ilə kifayətləndi. Azərbaycan Kubokunda isə Qarabağ finala qədər bütün rəqiblərini məğlub etdi. Finalda 23 mayda Bakıda Tofiq Bəhramov adına Respublika Stadionunda Qarabağ paytaxt təmsilçisi İnter ilə qarşılaşdı. Görüşün 57-ci dəqiqəsində Vaqif Cavadovun vurduğu yeganə qol Qarabağa Azərbaycan Kubokunda 3-cü zəfəri gətirdi. Bununla da Qurban Qurbanovun komandası gələn mövsüm Azərbaycanı UEFA Avropa Liqasında təmsil etmə hüququ qazandılar.

Avropada ilk qələbələr

2009/2010 mövsümündə Qarabağ Qurban Qurbanovun rəhbərliyində uzun fasilədən sonra UEFA Avropa Liqasında mübarizə aparacaqdı. Lakin UEFA Avropa Liqasında Qarabağdan uğur gözləyənlər çox deyildi. Buna əsas səbəb isə heyətdə gənc və təcrübəsiz Azərbaycanlı futbolçuların olması idi. Heyətdə Elvin Məmmədov, Əfran İsmayılov, Maksim Medvedev, Rauf Əliyev və Vaqif Cavadov kimi gənc və təcrübəsiz futbolçular olsa da, Qurban Qurbanov onları UEFA Avropa Liqasında Qarabağın əsas futbolçuları kimi istifadə edirdi.

2009-cu ildə Qarabağ mövsümə UEFA Avropa Liqasının II təsnifat mərhələsində Rusenborq ilə səfər oyunu ilə başladı. 16 iyulda Qurban Qurbanovun komandası Norveç klubu ilə səfərdə 0–0 hesablı bərabərə qaldı. 1 həftədən sonra isə Qarabağ Bakıda Tofiq Bəhramov adına Respublika Stadionunda Rusenborq ilə cavab oyununa çıxdı. Görüşdə yeganə qolu oyunun 45-ci dəqiqəsində möhtəşəm cərimə zərbəsindən Rəşad Sadıqov vurdu. Güclü Norveç klubunu məğlub edən Qarabağ UEFA Avropa Liqasında III təsnifat mərhələsinə vəsiqə qazandı. Bu mərhələdə isə Qurban Qurbanovun komandasını Finlandiya təmsilçisi Honka ilə oyun gözləyirdi. İki oyunun nəticəsində görə Honkanı 3–1 məğlub edən Qurban Qurbanovun yetirmələri pley-off mərhələsinə vəziqə qazanır və bu mərhədə Hollandiyanın Tvente kollektivi ilə üz-üzə gələrək məğlub olurlar, Növbəti mövsümlərdə Qarabağ klubunun Avrokubok nəticələri yüksələn xətt üzrə artmağa başlamışdır.

2017/2018 mövsümündə Qarabağ daha fəal çıxış etməyə başladı. ÇL-in I təsnifat mərhələsində Samtredia üzərində qələbə qazandı (birinci oyun 5–0, ikinci oyun 1–0). II təsnifat mərhələsində Şeriflə birinci oyun qolsuz bərabərliklə bitsə də, ikinci oyunda 2–1 hesablı qələbə qazanaraq tarix yazdı. Pley-off mərhələsi çərçivəsində Kopenhagen komandası ilə birinci oyunda 1–0 hesablı qələbə qazandı. İkinci oyunda 2–1 hesabı ilə məğlub olsa da, səfərdə vurduğu qola görə ÇL-in qrub mərhələsinə vəsiqə qazandı. Bununla da Çempionlar liqasının qrup mərhələsinə vəsiqə qazanan ilk Azərbaycan klubu Qarabağ oldu. Qrup mərhələsində Çelsi, Atletiko Madrid və Roma kimi Avropa nəhəngləri ilə qarşılaşdı. Atletiko ilə hər iki oyunda bərabərliyə imza atan Qarabağ Çempionlar liqasının qrup mərhələsində xal qazanmış ilk Azərbaycan klubu kimi tarixə düşdü.

2025-26 Sezonu

2017/2018 mövsümündə əldə etdiyi tarixi uğurdan sonra Qarabağ FK uzun müddət Avropa kuboklarında sabit çıxışı ilə seçilsə də, Çempionlar Liqasının əsas mərhələsində eyni uğuru təkrarlamaq mümkün olmamışdı. Klub əsasən UEFA Europa League və UEFA Europa Conference League turnirlərində çıxış edərək təcrübə topladı və heyət baxımından inkişaf etdi.

Aradan bir neçə il keçdikdən sonra Qarabağ yenidən Çempionlar Liqasında iddialı çıxış etməyə başladı və 2025/2026 mövsümündə turnirə daha hazırlıqlı və təcrübəli kollektiv kimi qatıldı.

2025/2026 mövsümündə Qarabağ FK Çempionlar Liqasında daha iddialı və diqqətçəkən çıxış etdi. Klub turnirə I təsnifat mərhələsindən başlayaraq Shelbourne FC üzərində inamlı qələbə qazandı (birinci oyun 3–0, ikinci oyun 1–0). II təsnifat mərhələsində KF Shkëndija ilə qarşılaşan Qarabağ ilk oyunda minimal hesablı qələbə (1–0), cavab oyununda isə 5–1 hesablı üstünlüklə növbəti mərhələyə yüksəldi.

III təsnifat mərhələsində rəqib Ferencvárosi TC oldu. Səfərdə 3–1 hesablı qələbə qazanan Qarabağ, evdə 2–3 hesabı ilə məğlub olsa da, ümumi hesabda üstün olaraq Çempionlar Liqasının liqa mərhələsinə vəsiqə qazandı.

Liqa mərhələsində Qarabağ Avropanın güclü klubları ilə qarşılaşdı və ilk turlarda uğurlu nəticələrlə diqqət çəkdi. Xüsusilə SL Benfica və FC Copenhagen üzərində qələbələr qazanaraq turnirə sensasiyalı start verdi. Daha sonra Chelsea FC ilə 2–2 hesablı heç-heçə edərək rəqabətə davamlı olduğunu göstərdi.

Bununla yanaşı, SSC Napoli və Athletic Bilbao kimi güclü rəqiblərlə oyunlarda məğlubiyyətlər aldı. Buna baxmayaraq, Qarabağ ümumi çıxışı ilə Çempionlar Liqasının yeni formatında orta səviyyəli, lakin rəqabətədavamlı komanda olduğunu sübut etdi və pley-off uğrunda mübarizə aparan kollektivlərdən biri kimi yadda qaldı.

Klubun rəngləri və loqosu

Loqosu

Klubun ilk loqosu 1996-cı ildə klubun o vaxtkı həkimi Aydın Mirzəyev tərəfindən yaradılıb.

Ləqəbləri

Komandanın konkret bir ləqəbi olmasa da, müəyyən dövrlərdə müəyyən ləqəbləri qazanmışdır. "Qarabağ"ın ləqəbləri içərisində ən qədimi "Atlılar" ləqəbidir. Ləqəb Qarabağ atları ilə əlaqəlidir. İngiltərədə xüsusi dizaynerlər tərəfindən hazırlanan loqotipdə də "Qarabağ"ın simvolu olan atlar təsvir olunub.

1993-cü ildə Ağdam şəhəri ermənilər tərəfindən işğal olunduqdan sonra doğma İmarət stadionundan didərgin düşən komanda məcburi olaraq "Qaçqın klub" adını almışdır.

Qurban Qurbanovun gəlişindən sonra Qarabağın cəlbedici oyunu kluba "Qafqazın "Barselonası" adını qazandırmışdır.

Forma sponsorları və istehsalçıları

"Qarabağ"ın ənənəvi forması tünd göy və ağdır. Amma klub təmsil etdiyi şəhərdən uzaqda oynadığı üçün, adətən qara rəngli formadan istifadə edir. 2015-ci ildə klub yeni dizaynda tünd göy-qara rəngli formalardan istifadə etdi. 2016 və 2017-ci illərdə sezonun əsasən ilk yarısında Qarabağ bu rəngli formalardan istifadə edib. Forma əsasən Azərbaycan Premyer Liqası və Azərbaycan kuboku matçlarında istifadə olunur. Yalnız bir oyunda, Monako ilə səfərdə 0–1 başa çatan oyunda Qarabağ bu dizaynda formadan Avroliqada istifadə edib. Klubun forması Adidas tərəfindən istehsal olunurdu, 2022-ci ilin iyun ayından etibarən Azerbaycanın ilk idman brendi olan IL’Azero tərəfindən istehsal olundu. Ancaq klubun formalarını 2023/2024 mövsümündən etibarən Adidas hazırlamağa başladı və 2001-ci ildən Azərsun Holdinq tərəfindən sponsorluq edilir.

Uğurları

Əsas məqalə: Qarabağ Ağdam FK-nın mövsümlərinin siyahısı

Ölkədaxili turnirlər

Azərbaycan Premyer Liqası

Qızıl (12) — 1993, 2013/2014, 2014/2015, 2015/2016, 2016/2017, 2017/2018, 2018/2019, 2019/2020, 2021/2022, 2022/2023, 2023/2024, 2024/2025

Gümüş medal (5) — 1993/1994, 1996/1997, 2012/2013, 2020/2021, 2025/2026

Bürünc medal (4) — 2001/2002, 2003/2004, 2009/2010, 2010/2011

Azərbaycan Kuboku

Qalib (8) — 1993, 2005/2006, 2008/2009, 2014/2015, 2015/2016, 2016/2017, 2021/2022, 2023/2024

Finalçı (4) — 1995/1996, 1997/1998, 1999/2000, 2024/2025

Azərbaycan SSR Milli Futbol Çempionatı

Çempion (2) — 1988, 1990

Futbol üzrə Azərbaycan SSR kuboku

Çempion (1) — 1990

Azərbaycan Super Kuboku

Çempion (1) — 1994

Beynəlxalq arenada ən yaxşı nəticələri

UEFA Çempionlar Liqası

Qrup mərhələsi (2) — 2017/18tr:2025-26 UEFA Şampiyonlar Ligi

UEFA Avropa Liqası

1/8 final mərhələsi (1) — 2023/24

UEFA Konfrans Liqası

Pley-off mərhələsi (2) — 2021/22,

2022/23

Birlik Kuboku

5-ci yer (1) — 1994

UEFA Çempionlar Liqası

Qrup mərhələsi (1) — 2025/26

UEFA turnirlərindəki oyunları

Əsas məqalə: Qarabağ FK Avropa yarışlarında

Yarışlara görə

• O = oyun, Q = qələbə, H = heç-heçə, M = məğlubiyyət, VQ = vurduğu qollar, BQ = buraxdığı qollar, QN = qolların nisbəti

Klubun forması Avropa Liqası Muzeyində

25 fevral 2026-ci il tarixinə olan məlumat:

Sıra	Turnir	O	Q	H	M	Qollar	QN
1	UEFA Çempionlar Liqası	73	32	19	22	113–89	+24
2	UEFA Kuboku / UEFA Avropa Liqası	109	37	23	49	124–158	-34
3	UEFA Konfrans Liqası	16	8	4	4	19–17	+2
4	UEFA Kuboklar Kuboku	4	0	1	3	1–12	-11
5	UEFA İntertoto Kuboku	4	1	0	3	2–11	-9
-	Cəmi	206	78	47	81	259–287	-28

"Qarabağ" avrokuboklarda Azərbaycanın bir sıra "siftə"lərinə imza atıb. Belə ki, avrokuboklarda səfərdə ilk xal məhz bu komanda sayəsində qazanılıb. Ağdam klubu qitə miqyasında debüt mövsümündə Bəxtiyar Musayevin vurduğu qol sayəsində buna nail olmuşdu. Həmin qol Azərbaycan klublarının UEFA Kuboklar Kubokunda vurduğu ilk və son qol idi.

Azərbaycan klublarından avrokuboklarda ilk dəfə mərhələni İsrailin Makkabi Hayfa klubunu yenən "Qarabağ" keçib. "Qarabağ"ın məşqçisi Müşfiq Hüseynov 1999-cu ildə hücumçu kimi UEFA İntertoto Kubokunda Hayfa təmsilçisi ilə görüşdə etdiyi dublla qələbənin memarı olub – 2:1. Bu, eyni zamanda Azərbaycan klublarının Avropa miqyasında ilk səfər qələbəsi kimi tarixə düşüb.

Nəhayət, UEFA Kubokunun xələfi, UEFA Avropa Liqası adlanan turnirdə iki mərhələni ilk keçən də "Qarabağ"dır. 2009-cu ildə Skandinaviya təmsilçilərini yenən ağdamlıların xüsusilə Rusenborq kimi güclü klubu turnirdən kənarlaşdırması Avropada da böyük əks-səda doğurdu.

2010-cu ildə isə UEFA Avropa Liqasında ardıcıl üç mərhələ keçərək daha bir tarix yazdı. Bu da Azərbaycan futbolu tarixində ilk dəfə idi. Həmin turnirin III təsnifat mərhələsində Visla Krakov klubunun mübarizədən kənarlaşdırılması isə Azərbaycan futbolundakı "Polşa sindromu"na son qoydu.

2011-ci ilin 30 iyununda UEFA Avropa Liqasında ilk dəfə Azərbaycan komandası səfərdə 3 və ya daha çox top fərqi ilə qalib gəldi ki, bu qələbə də Banqa Qarqjday klubunu səfərdə 4:0 hesabı ilə məğlub edən "Qarabağ"ın aktivindədir. Bu qələbə eyni zamanda Azərbaycanın avrokuboklarda o dövr üçün ən böyük hesablı qələbəsi idi.

Həmçinin Qarabağ 12 il ard-arda Avroliqanın qrup mərhələsinə adını yazdıran ilk Azərbaycan klubudur. Avroliqanın qrup mərhələsində ilk qəbələ qananan, həmçinin ilk səfər qəbələsi qazanan ilk Azərbaycan klubu Qarabağ olmuşdur. Dnepropetrovk-un "Dnipro", Belçikanın "Anderlext", Yunanıstanın "PAOK" kimi komandalarını məğlub etməklə Avropada diqqət çəkməyə nail olmuşdur. Bundan başqa, Ağdam təmsilçisi Çempionlar Liqasının pley-off mərhələsinə (2017–2018-ci il) yüksələn, eyni zamanda qrup mərhələsinə vəziqə qazanan ilk Azərbaycan klubu olmuşdur.

Birlik Kubokundakı iştirakı

Əsas məqalə: Azərbaycan Birlik Kubokunda

Ağdamlılar 1994 və 2004-cü illərdə 2 dəfə Birlik Kubokunda iştirak etmişdir.

Birlik Kubokundakı bütün oyunları

№	Tarix	Mərhələ	Adı	Rəqib	Hesab
2-ci Birlik Kuboku – Moskva 1994
1	29 yanvar 1994	Qrup	Qarabağ	Sitora	4:0
2	30 yanvar 1994	Qrup	Qarabağ	Romar	2:1
3	31 yanvar 1994	Qrup	Qarabağ	Dinamo Tbilisi	0:3
12-ci Birlik Kuboku – Moskva 2004
4	17 yanvar 2004	Qrup	Qarabağ-Azərsun	U-18	0:1
5	18 yanvar 2004	Qrup	Qarabağ-Azərsun	Şerif Tiraspol	0:0
6	20 yanvar 2004	Qrup	Qarabağ-Azərsun	Kaunas	0:3

Birlik Kubokundakı nəticəsi

İl	Yer	Adı	O	Q	H	M	T/F	B	Xal
1994	5	Qarabağ	3	2	0	1	6:4	+2	6
2004	13	Qarabağ-Azərsun	3	0	1	2	0:4	-4	1
2 turnir	V yer	Cəmi	6	2	1	3	6:8	−2	7

Qarabağ — Neftçi rəqabəti

Əsas məqalə: Qarabağ–Neftçi rəqabəti

Neftçi

Qarabağ

Hər iki komandanın xəritədə yeri

Azərbaycan futbolunda vacib oyunlardan biri "Neftçi — Qarabağ" rəqabətidir. Bu matçları prinspial edən səbəblərdən ən başlıcası hər iki komandanın 1992-ci ildən indiyədək təşkil olunan bütün çempionatlarda iştirak etməsidir. "Neftçi — Qarabağ" rəqabəti ilk dəfə 26 sentyabr 1992-ci ildə Tofiq Bəhramov adına Respublika Stadionunda başladı. Bu oyundan tərəflər 1–1 hesablı bərabərliklə ayrıldı. Bu oyunlarda ilk qələbəni 20 oktyabr 1992-ci ildə Ağdamın "İmarət" stadionunda keçirilən oyunda "Qarabağ" komandası 2–1 hesablı qələbəylə əldə etdi. Bu tərəflərin çempionatda "İmarət" stadionunda baş tutdan yeganə oyunu oldu. "Neftçi" komandası isə əzəli rəqibi üzərində ilk qələbəsini 1994/1995 mövsümündə evdə 3:2-lik qələbəylə əldə etdi. Azərbaycan futbolunda böyük marağa səbəb olan bu rəqabət "Azərbaycan derbisi" olaraq tanınır. Bu derbilərdə ən böyük hesablı qalibiyyət "Qarabağ" komandasına məxsusdur. Beləki, 8 noyabr 2020-ci ildə "Bakcell Arena''da baş tutan oyunda "Qarabağ" rəqibini 0:6 hesabıyla məğlub etmişdir. Neftçinin ən böyükhesablı qələbəsi isə 4 noyabr 2000-ci ildə qeydə alınıb — 0:4.

Şəxsi oyunların statistikası

30.04.2026 ilə olan məlumat.

Azərbaycan Premyer Liqası
Klub	O	Q	Н	M	QV	QB	±
"Qarabağ"	102	47	31	24	148	87	+61
"Neftçi"	102	24	31	47	87	148	−61
Azərbaycan Kuboku
	O	Q	Н	M	QV	QB	±
"Qarabağ"	23	12	5	6	26	17	+9
"Neftçi"	23	6	5	12	17	26	−9
Bütün turnirlərdə
	O	Q	Н	M	QV	QB	±
"Qarabağ"	125	59	36	30	174	104	+70
"Neftçi"	125	30	36	59	104	174	−70

İFFHS reytinqində

2009/2010 mövsümündə "Qarabağ"ın Avropa Liqasındakı uğurlu çıxışı komandanın reytinqinin yüksəlməsinə səbəb olub. Azərbaycanın müstəqillik tarixində ilk dəfə reytinq gətirən yarışda 2 mərhələ keçən komanda 11 xal toplamaqla Beynəlxalq Futbol Tarixi və Statistikaları Federasiyasının (İFFHS) reytin cədvəlində dünyanın 350 ən güclü klubunun sırasına düşüb. "Qarabağ" İFFHS-in siyahısında 418-ci pillədən 279-cu yerə yüksəlib. Növbəti ayda daha 20 pillə irəliləyən "Qarabağ" aktivindəki 76,5 xal ilə "CAPS United Harara" (Zimbabve") və "Falkirk" (Şotlandiya) komandaları ilə birgə 259-cu pilləyə şərik çıxmışdır. Dünya klublarının reytinq cədvəlində yüksəlişi davam etdirən Ağdamlılar 2009-cu ilin dekabr ayının əvvəlinə olan reytinqdə 249-cu pillədə qərarlaşmışdır.

2010/2011 mövsümündə də "Qarabağ"ın uğurlu çıxışı davam etmişdir. Belə ki, 30 iyul 2010-cu ildə açıqlanmış son siyahıda isə "Qarabağ" 88,5 xal ilə 189-cu pillədə qərarlaşmışdır.

2010-cu il noyabrın 26-da açıqlanan klublarının XXI əsr üçün reytinqində isə ilk onilliyi 357 xal ilə Azərbaycan klubları arasında 2-ci, dünyada isə 339-cu pillədə başa vurmuşdur.

2013-cü ilin ən güclü 200 klubu arasında "Qarabağ" 111-ci olub.

2014-cü ilin aprel ayında açıqlanan yeni reytinq siyahısında isə "Qarabağ" 112-ci sırada qərarlaşıb.

2015-ci il nəticələrinə görə klub 142 xalla 77-ci yerdədir və pilləni İspaniya "Valensiya"sı ilə bölüşür.

UEFA reytinqində

Qarabağ FK	2010	2011	2012	2013	2014	2015	2016	2017	2022	2023
Yer	237	216	212	226	210	151	134	106	62	60

Qarabağ FK tarixində ilk dəfə Avropada 2021-ci ilin Ən Güclü 50 klubu siyahısında yer alıb.

UEFA klub reytinqində

Sonuncu dəfə 17 sentyabr 2025 tarixində yeniləndi

Sıra	Klub	Koefisent
52	Sevilya	39.000
53	Şaxtyor	38.000
54	PAOK	37.250
55	Qarabağ	37.000
56	Braqa	37.000
57	Viktoriya	36.750
58	Seltik	35.000

Fanatları

Qarabağ FK-nun ilk azarkeş qrupu olan "Qarabağ Ordu"nun əsası 14 aprel 2004-cü ildən qoyulub. 2004-cü ildən bu yana fəaliyyət göstərir. Komandanın bir digər azarkeş qrupu olan İmarət 2009-cu ilin noyabr yaranıb. Adını Qarabağın Ağdamdakı stadionun adından götürən azarkeş qrupunun məqsədi yalnız Qarabağı dəstəkləmək deyil, həm də Qarabağ həqiqətlərini dünyaya çatdırmaqdır. İmarət azad azarkeş qrupunun İmarət Avropa və İmarət Türkiyə kimi bölmələri var. Əsas idaredici orqan İdarə Heyətidir.

PES üzvü

Göstərdiyi nəticələrlə diqqət cəlb edən "Qarabağ" 2014-cü ildə dünyanın ən məşhur oyunlarından sayılan "Pro Evolution Soccer"in (PES) üzvünə çevrilib. Oyunun məxsus olduğu "Konami"nin mühəndisləri 2014-cü il üçün nəzərdə tutulan "PES 2015"ə və 2015-ci il üçün nəzərdə tutulan "PES 2016"a "Qarabağ"ın da adını daxil ediblər.

Heyəti

Sonuncu dəfə 2 fevral 2026 tarixində yeniləndi:

Nömrə Ölkə Mövqeyi Futbolçu 1 GK Şahrudin Məhəmmədəliyev 2 DF Mateus Silva 3 DF Sami Mmae 6 MF Kris Kuaku 8 MF Marko Yankoviç 9 MF Joni Montiel 10 MF Abdullah Zubir (Kapitan) 11 FW Emmanuel Addai 12 GK Sadiq Məmmədzadə 13 DF Bəhlul Mustafazadə 15 MF Leandro Andrade 18 DF Dani Bolt 20 MF Kadi Borqes 21 MF Aleksey Kaşşuk 22 FW Musa Qurbanlı

Nömrə Ölkə Mövqeyi Futbolçu 24 DF Jeremi Qnali 27 MF Toral Bayramov 29 DF Marko Veşoviç 30 DF Abbas Hüseynov 32 MF Hikmət Cəbrayılzadə 35 DF Pedro Bikalyo 44 DF Elvin Cəfərquliyev 55 DF Bədavi Hüseynov 66 MF Patrik Andrade 77 FW Ramil Şeydayev 81 DF Kevin Medina 89 GK Amin Ramazanov 7 FW Nəriman Axundzadə 97 GK Fabian Buntiç 99 GK Mateuş Koxalski

2025-ci ilin sonuna olan məlumatına əsasən Qarabağ FK heyət dəyəri 28.5 milyon avro təşkil edir.

İndividual rekordlar

Ən çox oyun keçirən futbolçular

22.05.2026 tarixinə

sıra	Ölkə	Oyunçu	Mövsümlər	Çempionat	Kubok	Avropa kubokları	Cəmi
1	Azərbaycan	Maksim Medvedev	2006–2024	376 (12)	50 (2)	126 (3)	552 (17)
2	Azərbaycan	Qara Qarayev	2008–2023	308 (5)	41 (0)	120 (0)	469 (5)
3	Azərbaycan	Bədavi Hüseynov	2013–…	267 (6)	36 (0)	97 (0)	400 (6)
4	Braziliya	Riçard Almeyda	2012–2018 2018–2019 2021–2025	254 (51)	31 (5)	91 (8)	376 (64)
5	Fransa	Abdullah Zubir	2018–….	217 (55)	31 (6)	114 (17)	362 (78)
6	Azərbaycan	Müşfiq Hüseynov	1989–1999 2003–2004 2005–2007	320 (109), (16)	? (?)	12 (2)	332 (127)
7	Azərbaycan	Yaşar Hüseynov	1989–2002	325 (44)	? (?)	6 (0)	331 (44)
8	Albaniya	Ansi Aqolli	2010–2019	224 (3)	24 (0)	69 (1)	317 (4)
9	Azərbaycan	Səttar Əliyev	1989 1990–2004	306 (17)	? (?)	8 (0)	314 (17)
10	Azərbaycan	Aslan Kərimov	1993–1997 2003–2011	268 (12)	? (?)	20 (0)	288 (12)

Ən çox qol vuran futbolçular

22.05.2026 tarixinə

Sıra	Ölkə	Oyunçu	Mövsümlər	Çempionat	Kubok	Avropa kubokları	Cəmi
1	Azərbaycan	Müşfiq Hüseynov	1989–1999 2003–2004 2005–2007	109 (244)	? (?)	2 (12)	111 (256)
2	Fransa	Abdullah Zubir	2018–h. h.	55 (217)	6 (31)	17 (114)	78 (362)
3	Azərbaycan	Mahir Emreli	2015–2021	59 (126)	7 (21)	5 (49)	71 (216)
4	Braziliya	Riçard Almeyda	2012–2018 2018–2019 2021–2025	51 (254)	5 (31)	8 (91)	64 (376)
5	Braziliya	Reynaldo	2012–2017 2019	44 (92)	7 (9)	11 (35)	62 (139)
6	Kabo-Verde	Leandro Andrade	2022–h. h.	45 (137)	2 (20)	13 (56)	60 (213)
7	Azərbaycan	Musa Qurbanlı	2023–h. h.	44 (98)	4 (15)	1 (24)	49 (137)
8	Azərbaycan	Samir Musayev	2002–2006	44 (85)	? (?)	2 (4)	46 (89)
9	Azərbaycan	Yaşar Hüseynov	1989–2002	44 (226)	? (?)	? (6)	44 (232)
10	İspaniya	Dani Kintana	2015–2020	33 (98)	3 (12)	8 (44)	44 (154)

Komandanın keçmişində əməyi olanlar

Əvvəlki baş məşqçiləri

Əsas məqalə: Qarabağ FK-nın baş məşqçilərinin siyahısı

• Allahverdi Bağırov
• Ağasəlim Mircavadov
• Böyükağa Ağayev
• Elşad Əhmədov
• Şahin Diniyev
• İqor Ponomaryov
• Elxan Abdullayev
• Rasim Kara

Əvvəlki prezidentləri

• Yunis İldırımzadə

İndiki rəhbərlik

Vəzifəsi	Adı
Fəxri prezident
Prezident	Tahir Gözəl
Klub direktoru	Əmrah Çəlikəl
Maliyyə direktoru	Murat Karaman
İdarə və Maliyyə işlər üzrə menecer	Asif Əsgərov
İdarə Heyətinin Üzvü	Rafiq Şahverdiyev
Mətbuat katibi	Anar Hacıyev
Baş məşqçi	Qurban Qurbanov
Məşqçi	Çudomir Çakarov
Məşqçi	Müşfiq Hüseynov
Məşqçi	Elxan Həsənov
Məşqçi	Elçin Rəhmanov
Məşqçi	Zaur Tağızadə

Tənqidlər

Quzanlı Olimpiya İdman Kompleksinin təməlinin qoyulması mərasimi 1 mart 2006-cı il tarixində Azərbaycan Prezidenti İlham Əliyevin iştirakı ilə keçirilmişdir. Stadionun tikintisinin iki il ərzində başa çatdırılacağı planlaşdırıldı. Kompleksi "Alıbəyli" MMC şirkəti inşa etmişdir. Stadion 17 yanvar 2008-ci il tarixində istifadəyə verilmiş, 3 may 2009-cu il tarixindən "Qarabağ" FK-nın ev stadionlarından biri kimi istifadə edilir. Stadiondakı ilk matç "İnter" Bakı FK-ya qarşı keçirilmişdir. Oyundan əvvəl konsertin keçirilməsi planlaşdırılsa da, bu baş tutmamış, əvəzinə rəsmi mərasim keçirilmişdir. Bu mərasimdə Ağdam rayonunun icra başçısı Həsən Sarıyev, Ağdamda Milli Məclisə deputat seçilmiş Aqil Abbas, Peşəkar Futbol Liqasının Prezidenti Ramin Musayev, AFFA-nın birinci vitse-prezidenti, deputat Rauf Əliyev, AFFA-nın baş katibi Elxan Məmmədov, Azərbaycan milli futbol komandasının baş məşqçisi Berti Foqts, "Qarabağ" FK-nın baş direktoru Əmrah Çəlikəl iştirak etmişdir. Matç 1:1 hesabla heç-heçə nəticələnmiş, "Qarabağ"ın yeganə qolunu 34-cü dəqiqədə 17 nömrəli futbolçu Sedat Saini vurmuşdur.

"Qarabağ" FK 2011-12 mövsümündə Quzanlını tərk etmək istəyirdi. Lakin "Azərsun" Azərbaycan futbol ictimaiyyətinin, yerli KİV-in təzyiqi ilə komandanı Ağdama qaytarır. Klub rəhbərliyi növbəti mövsüm Quzanlını tərk edərək Mərdəkandakı "Dalğa" Arenaya köçmüşdür. Klubun baş məşqçisi Qurban Qurbanov buna səbəb olaraq, Quzanlı stadionunun vəziyyətinin pis olmasını göstərmişdir. Onun fikrinə görə, "payız aylarında, ümumiyyətlə, meydança bərbad vəziyyətdə olur. Bu, o demək deyil ki, biz Quzanlıda oynamaq istəmirik, yaxud oradakı azarkeşlərə qarşı hörmətsizlik edirik. Sadəcə, dediyimiz kimi, orada oynaya bilmərik, çünki şərait yoxdur. Yol yorğunluğu da əlavə problemdi". "Qarabağ" FK-nın azarkeş qrupu "İmarət Tayfa"nın təsisçilərindən olan Elnur Quliyev qeyd etmişdir ki, "infrastruktur məsələsi orada çıxış edən komandanın inkişafına, formalaşmasına imkan vermirdi". Jurnalist Elçin Cəfərova görə, "Azərsun" şirkəti "hər dəfə müxtəlif bəhanələr gətirərək "Qarabağ"ı Qarabağdan qaçaq salır", komandanın "Ağdam, ağdamlılar üçün nə qədər əziz olduğunu dərk etmir". O, qeyd edir ki, "komandanın rəhbərliyi hələ də zənn edir ki, pulu özü verirsə, deməli, bütün qərarları da heç nəyə məhəl qoymadan yalnız özü verməlidir! Futbol ictimaiyyətinin haqlı iradlarını qulaqardına vuran klub rəhbərliyi, təəssüf ki, "Qarabağ"ın Ağdamdakı minlərlə azarkeşini nəzərə almır. Unutmaq olmaz ki, hər bir komandanı yaşadan, ayaqda saxlayan məhz azarkeşlərdir"!

Deputat Aqil Abbas komandanın Ağdamın deyil, "Azərsun" şirkətinin olduğunu vurğulamış, komandanın harada oynatmaq onun öz hüququ olduğunu qeyd etmişdir. Ancaq onun fikrinə görə, komandadan "Ağdam sözünü çıxarmalıdırlar. Çünki bir komandanın ki, adında Ağdam sözü var, ora getməyə ərinirsə, o adı çıxarmalıdır. Guya yol uzaqdır, elə bil piyada gedirlər"! O həmçinin, "Azərbaycan öz futbolçusunu yetişdirməlidir və Ağdam da buyurub komandasını yetişdirsin. Onun-bunun dalınca düşmək lazım deyil" demişdir. Klub rəhbərliyi növbəti mövsüm Quzanlını tərk etmişdir. Deputat Bəxtiyar Sadıqov da bu yeniliyi "çox böyük təəssüf və təəccüblə hissi" ilə qarşıladığını demişdir. O düşünür ki, "bu insanlar üçün dövlət başçısı İlham Əliyev Azərbaycanda ilk dəfə olaraq kənd yerində olimpiya idman kompleksi tikdirdi. Bu, dövlət başçısının məcburi köçkünlərə və işğal rayonunda idmanın inkişafına qayğısıdır. Amma çox təəssüflər ki, komandaya sponsorluq edənlər müxtəlif bəhanələrlə və oyunbazlıqla çalışırlar ki, "Qarabağ" məcburi köçkün rayonunda, Ağdamın bu gün paytaxtı funksiyasını yerinə yetirən Quzanlı qəsəbəsində, prezident İlham Əliyev tərəfindən tikilmiş olimpiya idman kompleksinin stadionunda oynamasın". Bu açıqlamalara bir cavab olaraq, "Qarabağ" FK-nın direktoru Əmrah Çəlikəl bildirmişdir ki, ""Qarabağ" klubu məşq və oyunlarının harada keçirməyi ilə bağlı qərarı çoxdan verib və o qərar hələ də qüvvədədir". "Qarabağ" rəhbərliyi kompleksi ehtiyat meydançısı kimi istifadə etmək istəsə də, "həmin arenanın rəhbərliyi Quzanlı stadionunun ehtiyat meydança olmasına razılıq vermədi". Peşəkar Futbol Liqasının Prezidenti Ramin Musayev də "Qarabağ"ın bəzi oyunlarını Quzanlı stadionunda keçirmək istəyini geri çevirmişdir.

"Azersun Holding" MMC-nin İdarə Heyətinin sədri və "Qarabağ" FK-nın prezidenti Abdulbari Gözəl 2020-ci ilin fevral ayında demişdir ki, ""Qarabağ"ın oyunlarından biri Quzanlı qəsəbəsində keçirilə bilər, amma bu yenə də Qurban Qurbanovun qərarıdır".

Xarici keçidlər

• Rəsmi saytı (az.)  (ing.) (rus.)
• Qarabağ pfl.az Saytında (az.)
• Qarabağ national-football-teams.com Saytında  (ing.)
• Qarabağ FK FIFA saytında
• "Qarabağ FK – 30 mövsüm səfərdə" (1-ci bölüm), (2-ci bölüm), (3-cü bölüm)