Qax Olimpiya İdman Kompleksi

Vikipediya, azad ensiklopediya
Jump to navigation Jump to search

Qax Olimpiya İdman Kompleksi (rəsmi adı: "Qax Olimpiya İdman Kompleksi" MMC) — Azərbaycan Respublikasının Qax rayonunda yerləşən olimpiya idman qurğusu. Azərbaycan Respublikası Gənclər və İdman Nazirliyinin strukturuna daxil olmayan tabeliyindəki təsərrüfathesablı qurumdur[1]

Tarixi[redaktə | əsas redaktə]

Kompleksin təməli 2008-ci il sentyabrın 19-da Prezident İlham Əliyevin iştirakı ilə qoyulmuşdur. Qax Olimpiya İdman Kompleksi 2013-cü il avqustun 16-da istifadəyə verilmişdir. Həmin gün Azərbaycan Respublikasının Prezident İlham Əliyev Qax Olimpiya İdman Kompleksinin açılışında iştirak etmişdir.[2]

Fəaliyyəti[redaktə | əsas redaktə]

Burada Heydər Əliyevin və Prezident İlham Əliyevin Qaxa səfərlərindən və idmanın inkişafına göstərdikləri qayğıdan bəhs edən fotoguşələr yaradılmışdır.[2]

Qax Olimpiya İdman Kompleksinin ümumi tikinti sahəsi 9 min 220 kvadratmetr, tikintialtı sahəsi 6 min 498 kvadratmetr, yaşıllaşdırma sahəsi isə 8 min kvadratmetrdir. Layihəyə əsasən ümumi sahəsi 3 min 655 kvadratmetr olan universal idman zalı binasında tamaşaçı yerlərinin sayı 480-dir. Burada iki soyunub-geyinmə, məşqçi və digər otaqlar vardır. İnzibati binanın birinci mərtəbəsində gənclərin informasiya mərkəzi, məlumat-qeydiyyat bölməsi, 40 nəfərlik kafe, həkim və inventar, eləcə də texniki otaqlar fəaliyyət göstərir. İkinci mərtəbədə şahmat otağı, trenajor zalları, bilyard və stolüstü tennis otağı yaradılmışdır. Universal idman zalında Danimarkanın “Junkers” firmasının istehsalı olan xüsusi döşəmə salınmışdır. Kompleksdə müasir standartlara uyğun 410 yerlik üzgüçülük hovuzu da yaradılmışdır. İkinci mərtəbədə, həmçinin idmançılar üçün istirahət otaqları vardır.[2]

Qax Olimpiya İdman Kompleksinin ərazisində ikimərtəbəli beş ədəd kottec inşa edilmişdir. Müasir mebel və avadanlıqla təchiz olunan hər bir kottec binası dörd otaqdan ibarətdir.[2]

Kompleksdə süni ot ürtüklü futbol stadionu da tikilmişdir. Eyni zamanda, stadionda üstüörtülü min tamaşaçı yerlik tribuna inşa edilmiş, məşqçi və hakim otaqları yaradılmış, müasir işıqlandırma sistemi quraşdırılmışdır.[2]

Kompleksin ərazisində basketbol, voleybol və tennis meydançaları da vardır.[2]

Hazırda kompleksdə idmanın olimpiya növlərindən olan futbol, üzgüçülük, taekvando, sərbəst güləş üzrə yaradılmış qruplarda 150 nəfərədək yeniyetmə və gənc idmanla müntəzəm məşğul olur. Bundan əlavə, əhalinin müxtəlif yaş qrupları da öz sağlamlıqlarının qeydinə qalaraq vaxtaşırı kompleksin xidmətlərindən istifadə edir. Yay aylarında idman kompleksinin xidmətlərindən abunəçi qismində 400, birdəfəlik buraxılışlarla isə 2 min nəfərdən artıq əhali yararlanıb.[3]

İstinadlar[redaktə | əsas redaktə]

Xarici keçidlər[redaktə | əsas redaktə]