Rövşən Yerfi

Vikipediya, açıq ensiklopediya
Jump to navigation Jump to search
Rövşən Yerfi
Rövşən Həsənbaba oğlu Həsənli
Fotoqrafiya
Doğum tarixi 23 aprel 1965 (1965-04-23) (54 yaş)
Doğum yeri Yerfi, Quba
Təhsili
Fəaliyyəti yazıçı

Rövşən Yerfi (tam adı: Həsənli Rövşən Həsənbaba oğlu) — nasir, Penitensiar Xidmətdə işləmiş ilk yazıçı, 2006-cı ildən Azərbaycan Yazıçılar Birliyinin üzvü, Azərbaycan Jurnalistlər Birliyinin üzvü (1993).

Həyatı[redaktə | əsas redaktə]

Rövşən Yerfi 1965-ci ilin aprelin 23-də Quba rayonunun Yerfi kəndində anadan olmuşdur. 1972-1982-ci illərdə orta məktəbi oxumuş, 1982-ci ildən Bakı poçtamtında əmək fəaliyyətinə başlamışdır. 1983-1985-ci illərdə orduda qulluq etmişdir.

1986-1992-ci illərdə Bakı Dövlət Universitetinin Kitabxanaşünaslıq-biblioqrafiya fakültəsində ali təhsil almışdır. 1991-1995-ci illərdə Səhiyyə Nazirliyinin orqanı olan "Şəfqət" qəzetində (indiki "Tibb qəzeti") ilk məsul katib işləmişdir. 1995-2012 -ci illərdə Ədliyyə Nazirliyi Penitensiar Xidmətin zabit əməkdaşı olmuş, müxtəlif rejimli cəzaçəkmə müəssisələrində böyük inspektor vəzifəsində xidmət etmişdir. İstefada olan ədliyyə mayorudur.

2014-2015-ci illərdə kitab redaktorluğu işi ilə məşğul olmuş, altmışadək kitabın nəşrində (redaktə, korrektə, mətn tərtibatı) iştirak etmişdir.

Fəaliyyəti[redaktə | əsas redaktə]

V Bakı Beynəlxalq Kitab Sərgi-Yarmarkasında (28-30 Sentyabr 2017-ci il)

1988-ci ildən Azərbaycan qəzetlərində məqalələri çap olunub. Mətbuatda ilk hekayəsi 1989-cu ildə dərc olunub. Həmin il Azərbaycan Mədəniyyət Fondunun keçirdiyi "Debüt-89" respublika ədəbi yaradıcılıq müsabiqəsinin nəsr üzrə qalibi olub. 2004-cü ildə "Üzdəniraq ada" adlı ilk kitabı işıq üzü görüb. 2008-ci ildə "Qadın düşərgəsi" povesti "Kitab Klubu"nun həyata keçirdiyi "Sınaq nüsxəsi" layihəsində bəyənilərək çap edilmişdir. Yaradıcılığının mühüm hissəsi — "Üzdəniraq ada" romanı, "Qadın düşərgəsi", "Residivist", "Qazamat sanitarları" povestləri, "Sanitarlar", "Həbsxana bənövşəsi" pyesləri və 8 hekayəsi cəzaçəkmə müəssisələrinin həyatından bəhs edir. Əsərlərinin ikinci böyük mövzusu – qadın mövzusunda “Günahsız qatil”, “Sel”, “Müqəssir” povestlərini və beş hekayə yazmışdır. “Lənətə gələnlər”, “HİV qasırğası”, “Ziyarət”, “Baba yurdu” povestləri, qırxdan çox hekayəsi, kiçik esseləri və mənsur şeirləri isə digər müxtəlif mövzuları əhatə edir. “Mənim gündəliklərim” adlı memuarında 1987-1990-cı illərdə Azərbaycan Sovet Respublikasında baş verən şahidi olduğu mühüm ictimai-siyasi hadisələri işıqlandırmışdır.

Azərbaycan nəsrində ilk olaraq, xidmət əməkdaşı kimi məhbəs romanı ("Üzdəniraq ada" (2003)), məhbəs pyesi ("Sanitarlar" (2017)), qadın həbsxanası haqqında povest (“Qadın düşərgəsi” (2006)), pyes (“Həbsxana bənövşəsi”(2013)) və HIV təhlükəsi barədə hekayə (“HIV qasırğası”(2007)) yazmışdır. Eyni zamanda ilk dəfə Azərbaycan məhbəs nəsri haqqında məqalələr (2015) dərc etdirmişdir.

Beş kitab redaktorudur. Əsərləri "Kaspi" qəzetində, "Azərbaycan", "Ulduz", "Yazı" "Mars", "Aran", "Eko-inter" jurnallarında, Dirili Qurbani məclisinin 6 almanaxında və digər müxtəlif 4 topluda çap olunmuşdur. Esse, memuar, hekayə və povestləri onlarla saytda, o cümlədən, Mədəniyyət Nazirliyinin Milli Kitabxana İnformasiya Mərkəzinin virtual kitabxanasında 10 elektron kitabı yayımlanır.

Kitabları[redaktə | əsas redaktə]

  1. "Üzdəniraq ada" Bakı, Şirvannəşr, 2004, 260 səh.
  2. "Qadın düşərgəsi. Sel" Bakı, Kitab Klubu, 2008, 152 səh.
  3. "Residivist" Bakı, Kitab Klubu, 2009, 224 səh.
  4. "Qadın düşərgəsi" Bakı, Kitab Klubu, 2010, 152 səh.
  5. "Günahsız qatil" Bakı, Qanun, 2010, 140 səh.
  6. "Üzdəniraq ada" Bakı, Kitab Klubu, 2012 (təkrar nəşr), 184 səh.
  7. "Penitensiar lövhələr" Bakı, Zero, 2013, 96 səh.
  8. "Lənətə gələnlər" Bakı, Kitab Klubu, 2014, 150 səh.
  9. "Şanssız" Bakı, Xan, 2014, 120 səh.
  10. "Qazamat sanitarları" Bakı, Zero, 2015, 126 səh.
  11. "Müqəssir" Bakı, Elm və Təhsil, 2017, 108 səh.
  12. "Yerfi silsiləsi" Bakı, Kitab Klubu, 2018, 120 səh.

Həmçinin bax[redaktə | əsas redaktə]

Xarici keçidlər[redaktə | əsas redaktə]