Rustov məscidi

Rustov Kənd Məscidi
Rustov Kənd Məscidi
Ölkə	Azərbaycan
Yerləşir	Quba rayonu
Sifarişçi	Hacı Zeynalabdin Tağıyev
Tikilmə tarixi	1903
Material	Bişmiş kərpic
Vəziyyəti	Yaxşı

Rustov kənd məscidi — Azərbaycanın Quba rayonunun ərazisində yerləşən tarixi-memarlıq abidəsi.

Rustov kənd məscidi 1903-cü ildə Azərbaycanın böyük xeyriyyəçisi Hacı Zeynalabdin Tağıyevin köməyi ilə tikilmişdir. Sovet hakimiyyəti illərində məscid bağlanaraq taxıl anbarı kimi istifadə olunmuşdur. Bu möhtəşəm dini və tarixi abidə Azərbaycan müstəqilliyini bərpa etdikdən sonra dindarların istifadəsinə verilmişdir. Məscid 2008-ci ildə Mədəniyyət və Turizm Nazirliyi tərəfindən yenidən bərpa edilmiş, ətrafında köməkçi binalar tikilmişdir. Məsciddə dövlət qeydiyyatından keçmiş dini icma fəaliyyət göstərir.^[1]

Azərbaycan Respublikası Nazirlər Kabinetinin 2001-ci il 2 avqust tarixli Qərarına əsasən Rustov kəndindəki məscid yerli əhəmiyyətli memarlıq abidəsi kimi dövlət tərəfindən mühafizə olunur. Bununla əlaqədar Mədəniyyət və Turizm Nazirliyinin sifarişi ilə «Azərbərpa» Elmi-Tədqiqat Layihə İnstitutunun layihəsi əsasında «Azər-İnşaat» Məhdud Məsuliyyətli Cəmiyyət tərəfindən pilləkənlər, müəyyən yerlərdə kərpic divar, pəncərələr, qapılar, pəncərə şəbəkələri, taxta tavan, dam örtüyü, çardaq nərdivanı, suvaq örtüyü, ornamentlər, güldəstənin taxta döşəməsi, taxta divarlar və tavan, pəncərələr və s. bərpa olunmuşdur. İbadətə gələnlərə şərait yaradılması məqsədilə məscidin həyətində yeni köməkçi bina tikilmiş, abidə ətrafında abadlıq işləri aparılmışdır.^[2]