Sadıq Rəhimov

Vikipediya, açıq ensiklopediya
Jump to navigation Jump to search
Sadıq Rəhimov
Sadıq Hacıyarəli oğlu Rəhimov
Sadıq Rəhimov.jpg
bayraqAzərbaycan SSR Nazirlər Sovetinin 4-cü sədribayraq
1 mart 1954 — 8 iyul 1958
Sələfi Teymur Quliyev
Xələfi Vəli Axundov
bayraqAzərbaycan SSR Yüngül Sənaye Naziribayraq
1949 — 1952
20 oktyabr 1965 — 11 iyun 1975
Sələfi Nəbibə Həsənova
Xələfi Nəsrulla Nəsrullayev
bayraqGəncə vilayəti İcraiyyə Komitəsinin sədribayraq
may 1952 — aprel 1953
bayraqBakı Baş Tikinti İdarəsinin rəisibayraq
aprel 1961 — oktyabr 1965
bayraqAzərbaycan SSR Toxuculuq Sənayesi naziribayraq
1946 — 1949
bayraqAzərbaycan SSR Toxuculuq Sənayesi nazirinin müavinibayraq
1942 — 1946

Doğum tarixi 27 sentyabr 1914(1914-09-27)
Doğum yeri Balaxanı, Bakı qəzası, Bakı quberniyası, Rusiya İmperiyası
Vəfat tarixi 11 iyun 1975 (60 yaşında)
Vəfat yeri Bakı, Azərbaycan SSR, SSRİ
Vəfat səbəbi İnfarkt
Dəfn yeri
Döyüşlər

Təltifləri "Lenin" ordeni "Şərəf Nişanı" ordeni "Qırmızı Bayraq" ordeni "Qırmızı Əmək Bayrağı" ordeni (SSRİ)

Sadıq Hacıyarəli oğlu Rəhimov (27 sentyabr 191411 iyun 1975) — Azərbaycan SSR dövlət xadimi, Azərbaycan SSR Nazirlər Sovetinin Sədri (1954-1958). Azərbaycan SSR Ali Soveti Rəyasət Heyətinin üzvü.

Həyatı[redaktə | əsas redaktə]

1914-cü il sentyabrın 27-də Bakının Balaxanı kəndində neftçi fəhlə ailəsində anadan olmuşdur. Atası Yarəli Balaxanıda neft mədənlərində əvvəllər fəhləlik etmiş, sonralar qazmaçı və qazma ustası olmuşdur.

Usta Hacıyarəli oğlunu savadlı və dövrünün ziyalı adamlarından olmasını istəyirdi. O, bu məqsədlə də oğlu Sadığı Balaxanıda yeni açılmış kənd 7 illik məktəbinə oxumağa qoyur. S.Rəhimov 1929-cu ildə Balaxanı kənd məktəbini bitirmiş və Bakı neft texnikumuna daxil olmuşdur. 1931-ci ildə texnikumu müvəffəqiyyətlə bitirən S.Rəhimov Bakı maşınqayırma zavodunda texnik vəzifəsində əmək fəaliyyətinə başlamışdır.

S.Rəhimov 1932-1936-cı illərdə Azərbaycan Yüngül Sənaye komissarlığının 2 saylı Bakı ayaqqabı fabrikində əvvəl texnik, sonra isə mexaniki emalatxananın müdiri olmuşdur. Elmə, təhsilə, savadını artırmağa daima can atan S.Rəhimov fabrikdə işləməklə yanaşı, 1932-ci ildə Azərbaycan Sənaye İnstitutunun maşınqayırma fakültəsinə daxil olmuşdur. O, 1936-cı ildə diplom işini yazmaq və buraxılış imtahanlarını müvəffəqiyyətlə başa çatdırmaq məqsədi ilə müvəqqəti olaraq işdən çıxır.

1937-ci ildə diplom işini əla qiymətlə müdafiə etmiş S.Rəhimov yenə də 2 saylı Bakı ayaqqabı fabrikinə diplomlu mühəndis kimi baş mexanikin müavini vəzifəsinə göndərilir. S.Rəhimov 1937-1938-ci illərdə 2 saylı Bakı ayaqqabı fabrikində baş mexanikin müavini, 1938-1939-cu illərdə baş mexanik, 1939-cu ildə isə həmin fabrikin direktoru vəzifələrində çalışmışdır.

Müharibə illərində[redaktə | əsas redaktə]

Respublika hökuməti 1939-cu ildə onu Moskvaya Ali Partiya məktəbinə oxumağa göndərir. O, 1941-ci ildə Böyük Vətən müharibəsinin başlanması ilə əlaqədar təhsilini yarımçıq qoyub cəbhəyə gedir. 1941-1942-ci illərdə S.Rəhimov sovet ordusunun Qərb cəbhəsində vuruşan 160-cı atıcı diviziyasında siyasi şöbənin rəisi olmuş, Moskva, Smolenski ətrafında gedən döyüşlərdə fəal iştirak etmiş, Vyazma şəhəri yaxınlığındakı vuruşlarda yaralanmış və arxaya göndərilmişdir.

Ağır yaralanması ilə əlaqədar hərbi qulluqdan tərxis edilən S.Rəhimov Bakıya qayıdır və Azərbaycan toxuculuq sənayesi nazirinin müavini təyin olunur.

Xidməti fəaliyyəti[redaktə | əsas redaktə]

Sadıq Rəhimov və İmam Mustafayev birlikdə xarici nümayəndə heyətini yola salırlar.

Sadıq Rəhimov 1942-1946-cı illərdə bu vəzifədə, 1946-1949-cu illərdə isə Azərbaycan SSR toxuculuq sənayesi naziri vəzifəsində çalışmışdır. 1949-cu illərdə respublikada bir sıra nazirliklər ləğv edilmiş, bəziləri birləşdirilmişdir. Bu zaman Toxuculuq Sənayesi Nazirliyi ilə Yüngül Sənaye Nazirliyi birləşmiş və S.Rəhimov Azərbaycan SSR yüngül sənaye naziri vəzifəsinə təyin edilmişdir. O, bu vəzifədə 1949-1952-ci illərdə işləmişdir.

1952-ci ildə Azərbaycan iki vilayətə: Bakı və Gəncə vilayətlərinə bölündü. 1952-ci ilin aprelində Azərbaycan SSR Ali Soveti rəyasət heyətinin qərarı ilə Gəncə Vilayət İcraiyyə Komitəsinin sədri vəzifəsinə S.Rəhimov təyin olunur. O, bu vəzifədə 1952-1953-cü illərdə işləmişdir. Lakin vilayət quruluşu Azərbaycanda çox fəaliyyət göstərməmiş və bir ildən sonra ləğv edilmişdir. S.Rəhimov Gəncə vilayəti ləğv edildikdən sonra Bakıya qayıtmış, Azərbaycan SSR kommunal təsərrüfatı və mülki tikinti naziri, sonra isə çox işlənən sənaye malları naziri olmuş və 1953-1954-cü illərdə bu vəzifələrdə çalışmışdır.

S.Rəhimov 1954-1958-ci illərdə Azərbaycan SSR Nazirlər Sovetinə sədrlik etmişdir.

1958-1961-ci illərdə S.Rəhimov respublika Nazirlər Sovetinin Sənayedə Təhlükəsiz İş Aparılması Üzərində Nəzarət və Dağ-Mədən Nəzarəti Dövlət Komitəsinə sədrlik etmişdir, 1961-1965-ci illərdə isə o, Bakı Baş Tikinti İdarəsinin rəisi olmuşdur.

S.Rəhimov 1965-1975-ci illərdə Azərbaycan SSR Yüngül Sənaye Nazirliyinə başçılıq etmişdir.

S.Rəhimov dəfələrlə Azərbaycan KP MK və onun bürosunun, Azərbaycan SSR Ali Soveti və onun rəyasət heyətinin üzvü olmuş, Azərbaycan, SSRİ Ali sovetlərinin deputatı, keçirilmiş plenum, konfrans, qurultay və sessiyalarda nümayəndə kimi iştirak etmişdir.

Onun xidmətləri Lenin ordeni, Qırmızı Bayraq, Qırmızı Əmək Bayrağı, Şərəf nişanı ordenləri və medallarla qeyd olunmuşdur.

S.Rəhimov 1975-ci il iyunun 11-də Bakı şəhərində vəfat etmiş və Fəxri xiyabanda dəfn olunmuşdur.

Azərbaycan Respublikasının Gənclər və idman naziri Azad Rəhimovun babasıdır.

Xatirəsi[redaktə | əsas redaktə]

2014-cü ildə S.H.Rəhimovun 100 illik yubileyinin keçirilməsi haqqında Azərbaycan Respublikası Prezidenti Sərəncam imzalamışdır[1].

Həmçinin bax[redaktə | əsas redaktə]

Ədəbiyyat[redaktə | əsas redaktə]

  • Musa Qasımlı, Cavid Hüseynov. Azərbaycanın baş nazirləri. Bakı, 2005

Xarici keçidlər[redaktə | əsas redaktə]

İstinadlar[redaktə | əsas redaktə]

  1. "S.H.Rəhimovun 100 illik yubileyinin keçirilməsi haqqında Azərbaycan Respublikası Prezidentinin Sərəncamı" (azərb.). Azərbaycan Respublikası Prezidentinin rəsmi internet saytı. president.az (08 avqust 2014, 18:15).