Sahat Muradov

Sahat Muradov
Sahat Muradov
	türkm. Sahat Nepesowiç Myradow
Türkmənistan Milli Məclisinin sədri
	18 noyabr 1990 – 7 may 2001
Şəxsi məlumatlar
Doğum tarixi	7 may 1932
Doğum yeri	İvanovo, RSFSR, SSRİ;
Vəfat tarixi	29 oktyabr 2011 (79 yaşında)
Vəfat yeri	Aşqabad, Türkmənistan;
Partiya	Sovet İttifaqı Kommunist Partiyası,; Türkmənistan Demokrat Partiyası;
Fəaliyyəti	siyasətçi, akademik[d], mühəndis, dövlət qulluqçusu
Dini	sünnilik
Elmi fəaliyyəti
Elmi dərəcəsi	texnika elmləri doktoru;
Təltifləri

Sahat Nepesoviç Muradov (türkm. Sahat Nepesowiç Myradow; 7 may 1932, İvanovo – 29 oktyabr 2011, Aşqabad) — Türkmənistan dövlət və siyasi xadimi, 1990–2001-ci illərdə Türkmənistan SSR Ali Sovetinin (1995-ci ildən Türkmənistan Məclisinin) sədri. O, "parlamentin təşəkkül tapmasındakı xidmətlərinə və uzunmüddətli dövlət fəaliyyətinə görə" minnətdarlıq elan edilməklə təqaüdə göndərilmişdir.

1951-ci ildən Sovet İttifaqı Kommunist Partiyasının (SİKP), 1991-ci ildən isə Türkmənistan Demokratik Partiyasının üzvü olmuşdur.

Həyatı

Sahat Muradov İvanovo şəhərində qulluqçu ailəsində anadan olmuşdur. Əslən axaltəkə tayfasındandır. 1956-cı ildə Türkmənistan Kənd Təsərrüfatı İnstitutunu mühəndis-hidrotexnik ixtisası üzrə bitirmişdir.^[1]

Əmək fəaliyyətinə 1952-ci ildə, təhsil aldığı M. İ. Kalinin adına Türkmənistan Kənd Təsərrüfatı İnstitutunun komsomol komitəsinin azad katibi kimi başlamışdır. Eyni zamanda, həmin institutun həmkarlar ittifaqı komitəsinin sədri olmuş, 1956–1957-ci illərdə isə kafedralardan birində baş laborant və assistent vəzifələrində çalışmışdır.^[2]

1957–1960-cı illərdə Antiseymik Tikinti İnstitutunun aspirantı olmuşdur. 1960–1964-cü illərdə Türkmənistan SSR Elmlər Akademiyasının Seysmik Tikinti İnstitutunda kiçik elmi işçi, Su Problemləri və Hidrotexnika Elmi-Tədqiqat İnstitutunda şöbə müdiri vəzifələrini tutmuşdur. 1964–1965-ci illərdə Türkmənistan SSR Elmlər Akademiyasının Elmi Fəaliyyətin Koordinasiyası Şurası sədrinin müavini, 1965-ci ildən isə Türkmənistan Kommunist Partiyası Mərkəzi Komitəsinin aparatında elm və tədris müəssisələri şöbə müdirinin müavini və şöbə müdiri işləmişdir.

Sahat Muradov 1970–1979-cu illərdə Türkmənistan Dövlət Universitetinin rektoru, 1979–1985-ci illərdə Türkmənistan SSR ali və orta ixtisas təhsili naziri, 1985–1990-cı illərdə isə Türkmənistan Politexnik İnstitutunun rektoru vəzifələrində fəaliyyət göstərmişdir.

1990-cı ilin may ayından Türkmənistan Kommunist Partiyası Mərkəzi Komitəsinin, 1991-ci ilin aprelindən isə Mərkəzi Komitənin Bürosunun üzvü olmuşdur. 1990-cı ilin yanvar ayında Türkmənistan SSR Ali Sovetinə keçirilən seçkilərdə seçicilərin 35 % səsini toplamışdır. 1990-cı ilin yanvar-noyabr aylarında Ali Sovet sədrinin birinci müavini, 1990-cı ilin noyabrından 2001-ci ilin may ayına qədər isə Türkmənistan SSR Ali Sovetinin (1995-ci ildən Məclisin) sədri vəzifəsini icra etmişdir.

2001-ci ildən fərdi təqaüdə çıxmışdır. Professor elmi adını daşıyan Sahat Muradov üç kitabın müəllifidir.

Təltifləri

Sahat Muradov dövlət qarşısındakı xidmətlərinə görə iki dəfə "Qırmızı Əmək Bayrağı" ordeni, Türkmənistan SSR Ali Soveti Rəyasət Heyətinin medalları və Fəxri fərmanı, habelə müstəqil Türkmənistanın müxtəlif orden və medalları ilə təltif edilmişdir. O, "Türkmənistanın ali məktəb əməkdar işçisi" fəxri adına layiq görülmüşdür. 21 oktyabr 2016-cı il tarixində neytral dövlətin müstəqilliyinin 25 illik yubileyi münasibətilə Sahat Muradov ölümündən sonra "Vətənə olan sevgisi üçün" medalı ilə təltif olunmuşdur. Bu mükafat ona Türkmənistanın müstəqilliyinin və suverenliyinin möhkəmləndirilməsindəki böyük uğurlarına, ölkənin iqtisadi potensialının və beynəlxalq nüfuzunun artırılmasındakı xidmətlərinə görə verilmişdir. Həmçinin, sənaye, neft-qaz, nəqliyyat-kommunikasiya, kənd və su təsərrüfatı sahələrinin inkişafı üzrə dövlət proqramlarının icrasındakı fəaliyyəti, elm, texnika, mədəniyyət, təhsil və səhiyyə sahələrinə verdiyi töhfələr, gənc nəslin vətənpərvərlik və dürüstlük ruhunda tərbiyə olunmasındakı nümunəvi dövlətçilik fəaliyyəti və çoxillik fədakar əməyi bu təltifdə xüsusi qeyd edilmişdir.^[3]

İstinadlar

↑ МУРАДОВ Сахат Непесович — ЦентрАзия
↑ Постсоветская Центральная Азия: потери и обретения [Post-Soviet Central Asia: Losses and Gains] (Russian). Восточная лит-ра. 1998. səh. 164.
↑ "Указ Президента Туркменистана от 21 октября 2016 года «О награждении государственными наградами Туркменистана»". 29 oktyabr 2020 tarixində arxivləşdirilib. İstifadə tarixi: 28 sentyabr 2020.

[1] МУРАДОВ Сахат Непесович — ЦентрАзия

[auto-2] Постсоветская Центральная Азия: потери и обретения [Post-Soviet Central Asia: Losses and Gains] (Russian). Восточная лит-ра. 1998. səh. 164.

[3] "Указ Президента Туркменистана от 21 октября 2016 года «О награждении государственными наградами Туркменистана»". 29 oktyabr 2020 tarixində arxivləşdirilib. İstifadə tarixi: 28 sentyabr 2020.

[1]

[2]

[3]