Silahlı Qüvvələrə İctimai Nəzarət Mərkəzi

Vikipediya, azad ensiklopediya
Jump to navigation Jump to search

Silahlı Qüvvələrə İctimai Nəzarət Mərkəzi - Azərbaycanda fəaliyyət göstərən İctimai Birlik, QHT.

22 oktyabr 2009-cu ildə Bakı şəhərində "Silahlı Qüvvələrə İctimai Nəzarət Mərkəzi" İctimai Birliyi təsis olunmuşdur.

Birliyə Tərxis Olunmuş Hərbçilərin Gəncləri Maarifləndirmə İctimai Birliyinin[1] sədri Emin Həsənli sədr seçilmişdir.

Birliyin İdarə Heyətində Ehtiyatda olan Zabitlər Konfederasiyasının sədri, general-mayor Dadaş Rzayev, Milli Məclisin Təhlükəsizlik və müdafiə komitəsinin sədr müavini Aydın Mirzəzadə, millət vəkili Həvva Məmmədova, millət vəkili Aydın Həsənov, Milli Elmlər Akademiyasının Kibernetika İnstitutunun direktoru Telman Əliyev, Qarabağ Müharibəsi Əlilləri, Veteranları və Şəhid Ailələri İctimai Birliyinin sədri Mehdi Mehdiyev, Çernobıl Əlilləri Cəmiyyətinin sədri Mirhəsən Həsənov, digər QHT rəhbərləri və KİV nümayəndələri təmsil olunurlar.

Emin Həsənli bildirib ki, "Silahlı Qüvvələrə İctimai Nəzarət Mərkəzi" İctimai Birliyi son bir neçə ildə ATƏT-in Bakı Ofisinin təşəbbüsü, Azərbaycanda fəaliyyət göstərən hərbiyönümlü QHT-lərin iştirakı ilə aparılan davamlı müzakirələrin, keçirilən tədbirlərin yekun nəticəsi olaraq təsis edilib.

"Silahlı Qüvvələrə İctimai Nəzarət Mərkəzi" İctimai Birliyinin əsas məqsədi Silahlı Qüvvələrimizdə əsas insan hüquq və azadlıqlarının müdafiəsi, hərbçilərin sosial rifahının yaxşılaşdırılması istiqamətində dövlət hakimiyyət orqanları ilə əməkdaşlıq etməkdir.

Birlik bu məqsədlərinə çatmaq üçün Silahlı Qüvvələrdə insan və vətəndaş hüquq və azadlıqlarının qorunması sahəsində ictimai fəallığın artırılmasına çalışacaq, bu sahədə mövcud problemləri araşdıracaq və qanunvericiliyin təkmilləşdirilməsinə dair təkliflər verəcək, KİV-lə sıx əməkdaşlıq edəcək, Silahlı Qüvvələrdə insan və vətəndaş hüquqlarının, azadlıqlarının qorunması sahəsində monitorinqlər keçirəcək, o cümlədən hərbi mövzulu fəaliyyətlə bağlı ictimai müzakirələr təşkil edəcək.

Birlik nəzərdə tutulan vəzifələri həyata keçirmək üçün müxtəlif kurslar, seminarlar, dəyirmi masa və görüşlər, sərgilər, konfranslar, xeyriyyə marafonları və digər mədəni-kütləvi tədbirlər də keçirəcək.

Emin Həsənli bildirib ki, Birliyin fəaliyyətinin effektivliyini artırmaq üçün qaynar xətt yaradılacaq, internet saytı fəaliyyət göstərəcək, cəbhə bölgələrinə səfərlər təşkil olunacaq: "Bu vaxta qədər də Azərbaycanda Silahlı Qüvvələrə ictimai nəzarət olub. İndi məqsədimiz bu ictimai nəzarəti davamlı şəkildə həyata keçirməkdir. Azərbaycan ordusu Cənubi Qafqazda ən güclü ordudur, elmi əsaslarla qurulub. Dövlət orduya diqqət ayırır. Büdcəmizin imkanları artdıqca bu diqqətin daha da artırılmasına çalışacağıq".

İstinadlar[redaktə | əsas redaktə]

  1. "Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının üzvlərinin təyin edilməsi haqqında Azərbaycan Respublikası Prezidentinin Sərəncamı". president.az (azərb.). Azərbaycan Respublikası Prezidentinin rəsmi internet saytı. 20 aprel 2016. İstifadə tarixi: 21 aprel 2016. Check date values in: |accessdate=, |date= (kömək)

Xarici keçidlər[redaktə | əsas redaktə]