Tədris-İnnovasiya Mərkəzi

Vikipediya, azad ensiklopediya
Jump to navigation Jump to search

Tədris-İnnovasiya Mərkəzi - AMEA İnformasiya Texnologiyaları İnstitutunun nəzdində 2003-cü ildə yaradılmışdır və üç sektordan ibarətdir: Doktorant və dissertantlarla iş sektoru, Tədrisin təşkili sektoru və Layihələrin idarə edilməsi sektoru. Bunlardan başqa, Tədris-İnnovasiya Mərkəzinin nəzdində iki mərkəz fəaliyyət göstərir: Distant Tədris Mərkəzi və Wiki-Mərkəz.

Kadr təminatı[redaktə | əsas redaktə]

Hazırda mərkəzdə pedaqoji fəaliyyətlə məşğul olan əməkdaşların sayı 40 nəfərdən artıqdır. Bunlar institutun elmi işçiləri və İT üzrə yüksək ixtisaslı mütəxəssislərdir.

Mərkəzin maddi-texniki təminatı və tələbələrə yaradılmış şərait[redaktə | əsas redaktə]

Mərkəz institutun 1-ci mərtəbəsində yerləşir və 11 otaqdan ibarətdir.

  • Mərkəz 60-a yaxın müasir tipli kompüter, proyektor, çap qurğusu və digər texniki avadanlıqlarla təmin olunmuşdur;
  • Bütün kompüterlərin İnternetə fasiləsiz çıxışı təmin edilmişdir;
  • Dərs otaqlarının hamısında interaktiv elektron lövhələr quraşdırılmışdır.
  • Mərkəzdə tədris olunan dərslərin keyfiyyətinə nəzarət etmək üçün videonəzarət sistemi mövcuddur;
  • Mərkəzin daxili televiziyası fəaliyyət göstərir. Burada mütəmadi olaraq mərkəzin fəaliyyəti və təklif olunan xidmətlər, eləcə də İKT yenilikləri, təhsil xəbərləri, tədrisdə tətbiq * olunan yeni texnologiyalar və s. barədə məlumatlar verilir.

Mərkəzin əsas fəaliyyət istiqamətləri[redaktə | əsas redaktə]

Respublika üzrə bütün doktorant və dissertantlara informatika fənninin tədrisi və doktorluq imtahanının qəbulu;

AMEA-nın magistrlərinə ümumi fənnlərin tədrisi və imtahanların qəbulu;

Müəssisə və təşkilatların əməkdaşları, eləcə də digər şəxslər üçün informasiya texnologiyalarının müxtəlif istiqamətləri üzrə kursların təşkili;

Distant kursların, seminar və konfransların təşkili;

Ölkədə həyata keçirilən təhsilin informasiyalaşdırılması prosesinə elmi-metodoloji dəstək göstərilməsi;

İnformasiya texnologiyaları sahəsində bilik və bacarıqların yüksəldilməsi məqsədinə xidmət edən müxtəlif innovativ layihələrin həyata keçirilməsi;

İnformasiya texnologiyaları sahəsində biliklərin sertifikatlaşdırılması.

Mərkəzin əsas nailiyyətləri[redaktə | əsas redaktə]

  • 2003-2013-cü illər ərzində 13 min nəfərə yaxın doktorant və dissertant üçün informatika fənnindən kurslar təşkil edilmiş və imtahan qəbul olunmuşdur;
  • Naxçıvan MR-da yaşayan doktorant və dissertantlar, eləcə də Naxçıvan Dövlət Universitetinin tələbələri və magistrləri üçün 2011-ci ildən başlayaraq distant dərslər keçilir. 2014-cü ilin sentyabrından isə Gəncə şəhəri və ətraf bölgələrdə yaşayan gənc elmi tədqiqatçılar da mərkəzin distant tədris xidmətlərindən istifadə edəcəklər;
  • Bir sıra nazirlik, komitə və müəssisələrin, məsələn AR Auditorlar Palatası, AR Müdafiə Sənayesi Nazirliyi, AR Fövqəladə Hallar Nazirliyi, AzərTAC, AR Qaçqın və Məcburi Köçkünlərin * İşləri üzrə Dövlət Komitəsi, “Sağlam ailə” Tibb Mərkəzi, Azərbaycan Dövlət Pedaqoji Kollecinin və s. əməkdaşları üçün müxtəlif proqramlar üzrə kurslar təşkil edilmişdir;
  • Müxtəlif illərdə mərkəzin əməkdaşları tərəfindən respublikanın bir sıra rayonlarında (Goranboy, Tərtər, Qax, Ağstafa, Göyçay, Astara və s.) məktəb müəllimləri üçün kompüter kursları təşkil olunmuş və onların biliklərinin sertifikatlaşdırılması işləri həyata keçirilmişdir;
  • Vətəndaşların kompüter savadının artırılması məqsədi ilə həyata keçirilən innovativ layihə çərçivəsində 2008-ci ildə “İTV” kanalı, 2010-2011-ci illərdə isə “Günaz.tv” peyk televiziyası vasitəsi ilə tele-dərslər keçilmişdir;
  • Mərkəz H.Əliyev Fondu, AR Rabitə və Yüksək Texnologiyalar Nazirliyi, AR Təhsil Nazirliyi və AMEA İnformasiya Texnologiyaları İnstitutunun birgə təşkilatçılığı ilə 2007-ci ildən başlayaraq hər il keçirilən “Ali məktəb tələbələri arasında informatika üzrə Ümumrespublika Olimpiadası”nın təşkilində yaxından iştirak edir və qaliblərin beynəlxalq olimpiadaya hazırlaşdırılmasına dəstək göstərir;
  • Qazax, Ağstafa, Mingəçevir, Şirvan, Hacıqabul, İsmayıllı, Qax, Balakən, Şəki, Zaqatala rayonlarında yerləşən bir sıra Kompüter Tədrisi Mərkəzlərinə metodiki dəstək göstərilmiş, eyni zamanda həmin mərkəzlərdə tədris alan 2000 nəfərə yaxın dinləyicinin biliklərinin yoxlanılıb sertifikatlaşdırılması işləri həyata keçirilmişdir;
  • Mərkəzin innovativ layihəsi çərçivəsində 2008-2012-ci illərdə BDU-nun Jurnalistika fakültəsinin tələbələrinə “İnformasiya cəmiyyətinin əsasları” kursu tədris edilmişdir;
  • AMEA Rəyasət Heyətinin 15 yanvar 2014-cü il tarixli ““Wikipedia” ensiklopediyasında Azərbaycan həqiqətlərinin, milli-mənəvi dəyərlərin təsbit olunması, qorunması və inkişafında alimlərin vəzifələri haqqında” qərarına əsasən yaradılmış Wiki-Mərkəz tərəfindən wiki-kurslar tədris olunur.

“İnformatika”dan doktorluq imtahanları[redaktə | əsas redaktə]

Azərbaycan Respublikası Prezidenti yanında Ali Attestasiya Komissiyası Kollegiyasının 25 oktyabr 2002-ci il tarixli 06 saylı, 16 dekabr 2002-ci il tarixli 17 saylı qərarlarına, həmçinin AMEA Rəyasət Heyətinin 15 yanvar 2003-cü il tarixli 2/5 saylı qərarına əsasən respublika üzrə bütün elm və təhsil müəssisələrinin doktorant və dissertantları üçün "İnformatika" fənni üzrə müntəzəm fəaliyyət göstərən kursların təşkili və doktorluq imtahanının qəbulu AMEA İnformasiya Texnologiyaları İnstitutuna həvalə edilmişdir.

  • Bu qərarlara əsasən 1 mart 2003-cü ildən etibarən doktorant və dissertantlara "İnformatika" fənninin tədrisi institutun Tədris-İnnovasiya Mərkəzində həyata keçirilir.
  • Dərslər AMEA Rəyasət Heyəti, AR Təhsil Nazirliyi və AR Prezidenti yanında Ali Attestasiya Komissiyası tərəfindən təsdiq edilmiş tədris proqramı əsasında aparılır;
  • Doktorant və dissertantlar haqqında olan bütün məlumatlar (məktublar, anketlər, imtahan protokolları və s.) “Tədris-İnnovasiya Mərkəzi” İnformasiya Sisteminin verilənlər bazasında saxlanılır. Bu məlumatlar respublikada elmi kadr hazırlığının vəziyyəti ilə bağlı müəyyən təhlillər aparmağa imkan verir;
  • İmtahanlar elektron test üsulu ilə həyata keçirilir;
  • İmtahanların nəticələri haqqında məlumatlar hesabat şəklində Ali Attestasiya Komissiyasına və AMEA Rəyasət Heyətinə təqdim edilir.

İmtahanların və dərslərin qrafiki

"İnformatika" fənni üzrə doktorluq imtahanlarının qəbulu aşağıdakı müddətlərdə həyata keçirilir:

  • 5 yanvar - 30 yanvar;
  • 15 aprel – 30 aprel;
  • 15 iyun - 15 iyul;
  • 15 oktyabr - 30 oktyabr.

İmtahan vermək istəyən doktorant və dissertantlar üçün Tədris-İnnovasiya Mərkəzində xüsusi kurslar təşkil olunur və kurslarda iştirak vacibdir; Əvvəlki sessiyalarda kurs keçib imtahan verməyən və ya imtahan verib qeyri-məqbul qiymət almış doktorant və dissertantlar kurs keçmədən imtahan verə bilərlər; Aprel və oktyabr aylarında keçirilən imtahanlar müdafiə ərəfəsində olan doktorant və dissertantlar üçün nəzərdə tutulub. Doktorant və dissertantlar üçün kurslar onların informatika üzrə bilik səviyyəsindən asılı olaraq 3 ay, 1 ay və ya 15 gün müddətində təşkil olunur:

Müddət Payız sessiyası Yaz sessiyası
3 aylıq kurs 15 sentyabr – 15 dekabr 1 fevral – 30 aprel
1 aylıq kurs 1 dekabr – 30 dekabr 1 may – 30 may
15 günlük kurs 5 yanvar – 20 yanvar 1 iyun – 15 iyun

Dərslər 90 dəqiqə olmaqla həftədə 3 dəfə keçilir ki, onlardan 1-i mühazirə, 2-si isə praktiki məşğələdir;

Dərslər azərbaycan və rus dillərində aparılır.

Lazımi sənədlər və qeydiyyat

Doktorant və dissertantlar "İnformatika" fənni üzrə təşkil olunmuş kurslarda iştirak etmək və doktorluq imtahanı vermək üçün İnformasiya Texnologiyaları İnstitutunun Tədris-İnnovasiya Mərkəzində qeydiyyatdan keçməlidirlər. Qeydiyyat proseduru aşağıdakı kimidir:

  • Respublikanın elm və təhsil müəssisələrinin rəhbərliyi tərəfindən AMEA İnformasiya Texnologiyaları İnstitutunun rəhbərliyinə rəsmi məktubla müraciət edilməlidir;
  • Məktubda adları qeyd edilən doktorant və dissertantlar Tədris-İnnovasiya Mərkəzində onlara təqdim edilən xüsusi anket formasını doldurmalıdırlar;
  • Anketə əlavə olaraq 1 ədəd 3x4 ölçüdə rəngli fotoşəkil tələb olunur;
  • “İnformatika” fənni üzrə kurslar - Tədris-İnnovasiya Mərkəzinin maddi-texniki bazasının gücləndiriıməsi, müəllimlərin və tədris prosesi ilə məşğul olan digər əməkdaşların əmək haqlarının ödənilməsi məqsədilə ödənişli əsaslarla həyata keçirilir. Təhsil haqqı ödənişləri elmi müəssisələr tərəfindən və ya doktorant və dissertantlar tərəfindən AMEA İnformasiya Texnologiyaları İnstitutunun bank hesabına köçürülür.

AMEA-nın magistrlərinə ümumi fənnlərin tədrisi və imtahanların qəbulu[redaktə | əsas redaktə]

Ölkədə elm və təhsilin inteqrasiyasını təmin etmək məqsədilə AMEA-nın tarixində ilk dəfə olaraq olaraq 2015-ci ildə AMEA-da ali təhsilin magistratura pilləsi təşkil edilmişdir. Azərbaycan Respublikasının Tələbə Qəbulu üzrə Dövlət Komissiyasının 8/Q saylı 7 sentyabr 2015-ci il tarixli əmri ilə 2015/2016- cı tədris ili üçün AMEA-nın magistraturasına 9 ixtisas üzrə 19 nəfər qəbul edilmişdir. Qəbulun uğurla keçdiyini və gənclərin elmə marağının böyük olduğunu nəzərə alaraq AMEA-nın magistraturasına qəbul planı artırılmış və Dövlət İmtahan Mərkəzinin 7/Q saylı 31 avqust 2016-cı il tarixli əmri ilə 2016/2017-ci tədris ili üçün AMEA nın magistraturasına 19 ixtisas üzrə 56 nəfər qəbul edilmişdir.

AMEA-nın Prezidentinin 480 saylı 10 sentyabr 2015-ci il Sərəncamına əsasən, AMEA-nın magistratura pilləsinə qəbul olmuş bütün magistrantlara ingilis dili, psixologiya, pedaqogika, fəlsəfənin əsasları kimi ümumi fənlər üzrə dərslərin tədris olunması və imtahanların təşkili AMEA İnformasiya Texnologiyaları İnstitutuna həvalə edilmişdir.

  • Bu sərəncama əsasən 15 sentyabr 2015-ci ildən etibarən AMEA-nın magistratura pilləsinin ümumi və seçmə fənlər üzrə nəzəri və praktiki dərslərin tədrisi institutun Tədris-İnnovasiya Mərkəzində həyata keçirilir;
  • “Elm haqqında” və “Təhsil haqqında” Azərbaycan Respublikası Nazirlər Kabinetinin və Azərbaycan Respublikası Təhsil Nazirliyinin magistratura təhsili ilə bağlı qəbul etdiyi normativ-hüquqi sənədlərə uyğun olaraq tədris proqramı əsasında aparılır;
  • İmtahanlar elektron test üsulu ilə həyata keçirilir;
  • İmtahanların nəticələri haqqında məlumatlar hesabat şəklində AMEA Rəyasət Heyəti aparatının Elm və Təhsil İdarəsinin Magistratura şöbəsinə təqdim edilir.

İT üzrə kurslar[redaktə | əsas redaktə]

Tədris-İnnovasiya Mərkəzində müəssisə və təşkilatların əməkdaşları, eləcə də sıravi vətəndaşlar üçün informasiya texnologiyalarının müxtəlif istiqamətləri üzrə kurslar təşkil edilir. Dərslər qrup şəklində və fərdi qaydada aparılır.

Kursların siyahısı:

  • Proqramlaşdırma və verilənlər bazası ( Pascal, Delphi, C, C++, C#, Java, Oracle və s.);
  • Veb-proqramlaşdırma (HTML/CSS, PHP, XML, JavaScript, Asp.net, MySQL);
  • Şəbəkə administratorluğu;
  • Riyazi proqram paketləri (MathLab, MathCad);
  • Kompüter qrafikası və dizayn proqramları (Photoshop, CorelDraw, AutoCad, 3Dmax);
  • Dövlət qulluğuna işə qəbul olunmaq istəyənlər üçün informatika;
  • Magistraturaya hazırlaşanlar üçün informatika;
  • İnformasiya cəmiyyətinin əsasları;
  • Elektron dövlətin formalaşmasının əsasları;
  • İnformasiya təhlükəsizliyi. E-imza;
  • Vikipediya ensiklopediyasının nəzəri və praktiki əsasları;
  • Gənc elmi tədqiqatçılar üçün kurslar (Beynəlxalq elmi bazalarla, e-kitabxana və e-kataloqlarla işləmə prinsipləri, məqalənin tərtibatı qaydaları);
  • Müəllimlər üçün kurslar (Proqramlaşdırma, dərsdə İT-dən istifadə metodikası, elektron lövhələrin tədrisdə tətbiqi, elektron resursların hazırlanması);
  • MS Office proqram paketi (Word, Excel, PowerPoint, Access, Publisher və s.);
  • Kompüterin təmiri və sazlanması, HelpDesk;
  • 1C: Mühasibatlıq;
  • İnternet xidmətləri (informasiya axtarışı, e-kitabxana, e-ensiklopediya, sosial şəbəkə, bloq və s.).

Kursu müvəffəqiyyətlə bitirənlərə imtahan əsasında sertifikat verilir!

Sertifikatlaşdırma[redaktə | əsas redaktə]

Tədris-İnnovasiya Mərkəzində vətəndaşların müraciətləri əsasında onların informasiya texnologiyaları sahəsundə müxtəlif proqramlar əsasında biliklərinin yoxlanılması və sertifikatlaşdırılması həyata keçirilir. Sertifikat almağın şərtləri:

  1. Sertifikat almaq istəyən şəxs hansı proqramlar üzrə biliklərini sertifikatlaşdırmaq istəməsi barədə ərizə ilə İnstitutun rəhbərliyinə müraciət edir
  2. Müraciət əsasında imtahan təyin olunur;İmtahan götürülməsi institutda fəaliyyət göstərən, informasiya texnologiyaları sahəsində yüksək ixtisaslı mütəxəssislərdən təşkil olunmuş sertifikatlaşdırma komissiyasına həvalə olunur;
  3. İmtahanın nəticəsindən asılı olaraq həmin şəxsə Sertifikat verilir.

Mənbə[redaktə | əsas redaktə]

ict.az