Tatsuya Nakadai

Vikipediya, azad ensiklopediya
Jump to navigation Jump to search
Tatsuya Nakadai
yap. 仲代達矢
Nakadai.jpg
Doğum tarixi 13 dekabr 1932(1932-12-13) (87 yaş)
Doğum yeri
Vətəndaşlığı
Fəaliyyəti aktyor, Seyü, müğənni
Fəaliyyət illəri 1954–indiyə kimi
Commons-logo.svg Vikianbarda əlaqəli mediafayllar

Tatsuya Nakadai (yaponcaː 仲代 達矢, 13 dekabr, 1932-ci il, Yaponiya, Tokio şəhəri) - aktyor, rejissor.

Haqqında[redaktə | əsas redaktə]

1932-ci ilin dekabr ayının 13-də Tokio şəhərində Motohisa Nakadai (仲代 元久) adı ilə dünyaya gəlib.

Nakadai çox kasıb bir ailədə dünyaya gəldiyi üçün ali təhsil ala bilməmişdi və aktyor olmağa qərar vermişdi. O, Amerika filmlərini izləyir, Con Ueyn (ing. John Wayne) və Marlon Brando kimi aktyorlara pərəstiş edirdi.

Günlərin birində, Tokioda geyim mağazasında kargüzarlıq edən bir gənc Masaki Kobayaşinin diqqətini cəlb edir və “Qalın divarlar arxasında” (“Qalın divarlı otaq”/ “Qalın divar”) filmində baş rolu ifa etmək üçün dəvət alır. Beləcə, çox illər davam edəcək dostluğun başlanğıcı qoyulur.[1]

Növbəti, 1954-cü ildə Nakadai “Yeddi samuray” filmində bir neçə saniyəlik şəhərdə gəzən samuray obrazını canlandıraraq qarşımıza çıxır. Texniki olaraq “Yeddi samuray” filmi onun debütü hesab olunur. Çünki “Qalın divar” filminin buraxılması (release) mübahisli məsələlərin nəticəsində 3 il müddətinə saxlanılır. Bir aktyor kimi onun böyük uğuru Kobayaşinin rejissorluğu ilə ekranlaşdırılan “Qara nehr” filmində canlandırdığı gənc bir yakuza – Co obrazı ilə gəlir. Nakadai 1960-cı illərdə Kobayaşi ilə işləməyə davam edir və “Harakiri”dəki yaşlı ronin Hanşiro Tsuqumo roluna görə ilk “Blue Ribbon” mükafatını qazanır.

Nakadai Masaki Kobayaşi ilə birgə “Harakiri”, “Kvaydan”, “Samuray üsyanı” və “İnsan yaşamının şərtləri” trilogiyası kimi şah əsərlər də daxil olmaqla 11 film ərsəyə gətirir. Karyerası dövründə Nakadai Yaponiyanın məşhur rejissorlarının filmlərində rol alıb. O, Kihaçi Okamotonun (岡本 喜八) (o cümlədən, məşhur “Taleyin qılıncı”, “Öldür!”) 9, Qoşa Hideonun (五社 英雄) 9 (“Qoyokin”), İçikava Konun (市川崑) 6 (“Alov”, “Açar”), Akira Kurosavanın 6 (“Cangüdən”, “Cəsur samuray”, “Cənnət və cəhənnəm”, “Döyüşçünün kölgəsi” (影武者 ⌈Kagemuşa⌉), “Ran”), Mikio Narusenin (成瀬 巳喜男) 5 (“Qadın pilləkənla qalxanda”) və Hiroşi Teşiqaharanın (勅使河原 宏) 2 filmində (“Yadın üzü”) çəkilmişdir. Bunun başlıca səbəbi isə o idi ki, Nakadai Yaponiya kino sənayesinin heç bir nəhəng şirkəti ilə uzunmüddətli layihələrini imzalamır və istədiyi təklifi qəbul etməkdə sərbəst idi.[1]

O, Koci Yakuşo, Mayumi Vakamura, Toru Masuoka, Azusa Vatanabe, Kenişi Takitō və s.  kimi gələcək perspektivli gənc aktyorların müəllimidir.

Mükafatları[redaktə | əsas redaktə]

  • “Harakiri”dəki yaşlı ronin Hanşiro Tsuqumo roluna görə ilk “Blue Ribbon” mükafatını qazanır.
  • 1980-ci ildə Akira Kurosavanın “Döyüşçünün kölgəsi” filmində oğru və daimyo Takeda Şingen obrazını canlandırır və bu iki obraz ona ikinci, ən yaxşı kişi roluna görə “Blue Ribbon Award” mükafatını qazandırır.
  • 2015-ci ildə Mədəniyyət Ordeni ilə təltif olunub.[2][3]

İstinadlar[redaktə | əsas redaktə]

  1. 1 2 Tatsuya Nakadai - Internet Movie Database saytında
  2. Tokyo: Tatsuya Nakadai Set to Receive Lifetime Achievement Honor
  3. Two Nobel scientists to receive Order of Culture award