Vəli Əsmətov

Vikipediya, azad ensiklopediya
Jump to navigation Jump to search
Vəli Əsmətov
Vəli Yadulla oğlu Əsmətov
Doğum tarixi 2 iyun 1963 (1963-06-02) (56 yaş)
Elmi dərəcəsi Professor

Vəli Əsmətov — Professor

Vəli Yadulla oğlu Əsmətov 2 iyun 1963-cü ildə rayonun Çayüzü kəndində dünyaya gəlib.

1970-1980-cı illərdə Çayüzü kənd orta məktəbində təhsil alıb. 1981-1984-cü illərdə keçmiş Sovetlər Birliyinin nəzarətində olan Qarşılıqlı İqtisadi Yardım Şurasına daxil olan Avropa dövlətlərinin ərazisində kəşfiyyatçı kimi hərbi xidmətdə olub, burada nümunəvi xidmətinə görə keçmiş SSRİ-nin Müdafiə Naziri, Sovet İttifaqi Marşalı D.M.Ustinovun adından, nümunəvi vətəndaş tərbiyə etdiklərinə görə, Azərbaycan SSR-nin Mərkəzi Komitəsinə və anadan olduğu rayonun partiya komitəsinə təşəkkür məktubu göndərilib.

1984-1990-cı illərdə Azərbaycan Dövlət Tibb İnstitutunun I müalıcə profilaktika fakultəsində təhsil alıb, həmin fakultəni fərqlənmə diplomu ilə bitirib. Ali təhsil aldığı illərdə yüksək intellekti, zəhmətsevərliyi ilə tələbə yoldaşlarından fərqləndiyinə görə, V kursda oxuyan zaman Respublikamızda keçirilən terapiya olimpiadasının qalibi olub və bu uğur onun Semferepol şəhərində keçirilən Ümumittifaq terapiya olimpiadasına göndərilməsi ilə nəticələnib. Ümumittifaq olimpiadanın qalibi olması onun gələcək koryerası üçün bünövrə olub. Onu olimpiadadan sonra qəbul edən rektor, onun universitetin farmakologiya kafedrasında qalmasını təklif etmiş və bu təklif Vəli Əsmətov tərəfindən qəbul olunmuşdur. O, 1990-cı ildə də Böyük Elmi Şuranın qərarı ilə təhsil aldığı ali məktəbin "Farmakologiya" kafedrasında baş laborant vəzifəsinə təyin olunduqdan sonra, 1991-ci ildə Farmakologiya ixtisası üzrə əyanı aspiranturaya daxil olmuş və 1994-cü ildə oranı müvəffəqiyyətlə bitirmişdir. Aspiranturada oxuduğu illərdə Rusiya Federasiyası Bioloji Aktiv Maddələrin Təhlükəsizliyi Elmi-Tədqiqat Mərkəzinin Ürək-Damar sistemi laboratoriyasında Mərkəzin Elmi işlər üzrə direktor müavini akademik Qatsura Vladimir Vasilyeviç və professor Zəkiyyə Cəbrayıl qızı İsmayılovanın rəhbərliyi altında "Kəskin koronar qan dövranı pozğunluğu zamanı antihistamin dərman maddələrinin kardioprotektor təsiri" mövzusunda namizədlik dissertasiyasının üzərində işləmiş və 1994-cü ildə müvəffəqiyyətlə müdafiə edərək tibb elmləri namizədi elmi dərəcəsinə layiq görülmüşdür.

1995-ci ildə Rusiya Federasiyası Tibb Elmləri Akademiyasının V.V.Zakusov adına Elmi-Tədqiqat Farmakologiya İnstitutuna ezam olunan Vəli Əsmətov elə həmin ildən həmin İnstitutun doktorantı olub.

1995-2005-ci illərdə üzərində işlədiyi "Uzunmüddətli neyrolepterapiya zamanı əmələ gələn əlavə effektlərin farmakoloji korreksiyası" mövzusunda doktorluq dissertasiyasını akademik Kiril Serqeyeviç Rayevski və professor Musa Mehdi oğlu Qəniyevin elmi məsləhətçiliyi ilə tamamlayaraq müdafiə etmiş və tibb üzrə elmlər doktoru elmi adına layiq görülmüşdür.

1992-ci ildə Tomsk şəhərində keçirilən Ümumittifaq kardioloqların elmi konfransının, 1993-cü ildə Moskva şəhərində "Psixotrop preparatlara qarşı fərdi həssaslığın bioloji əsasları" mövzusunda keçirilən beynəlxalq konfransın, 2006-cı ildə Moskva şərərində keçirilən 4-beynəlxalq konfransın "Psixotrop preparatlara qarşı fərdi həssaslığın bioloji əsasları", 2007-ci ildə Moskva şəhərində keçirilən Rusiya Federasiyası Farmakoloqlarının III qurultayının məruzəçi iştirakçısı olmuşdur.

2002-ci ildə Vektor Beynəlxalq Elm Mərkəzinin keçirdiyi sorğunun nəticəsi olaraq XXI əsrin gənc alimləri nominasiyasının qalibi olmuşdur.

Respublika farmakoloqlar, patofizioloqlar, fizioloqlar cəmiyyətinin və Tibb üzrə İxtisaslaşdırılmış Müdafiə Şurasının üzvüdür.

100-dən artıq elmi məqalələri yerli və xarıcı elmi jurnallarda nəşr olunmuş, beş tədris vəsaiti, farmakologiya fənnindən tədris proqramı, beş dərs vəsaiti, beş kitab, bir səmərələşdirici təklif və iki kəşfin müəllifidir. Professor Musa Qəniyevin tərtib etdiyi "Ən müasir farmakologiya" dərsliyinin elmi redaktorudur.

Azərbaycan Respublikasının tarixində ilk dəfə kliniki farmakologiya ixtisası üzrə verilmiş elmlər doktoru diplomunun sahibidir. Bir çox avtoreferat və dissertasiyalara mütəxəsis rəyi vermiş və aparılan elmi-tədqiqat işlərinə rəhbərlik edir.

Onun rəhbərliyi altında elmi-tədqiqat işi aparan tələbələr də həmişə elmi konfranslarda I dərəcəli diploma layiq görülmüşdür. 2010-cu ildə bütün dünyanın qəbul etdiyi BEYNƏLXALQ DƏRƏCƏLİ TİBB ELMLƏRİ DOKTORU diplomuna layiq görülmüşdür.

2008-ci ildə yerli və xarici tələbələrə verdiyi dərin biliyə, oxuduğu mühazirələrə və səmimi rəftara görə İran İslam Respublikasının Mədəniyyət Mərkəzi tərəfindən fəxri fərmanla təltif olunmuşdur.

Hal-hazırda Azərbaycan Tibb Universitetinin farmakologiya kafedrasının professoru, kafedra müdirinin elmi-işlər üzrə müavinidir.

Evlidir, 3 övladı var.