Mənuçöhr İqbal — İranın dövlət xadimi, 1957–1960-cı illərdə İran Baş naziri. Mənuçöhr İqbal Şah Məhəmməd Rza Pəhləvinin sadiq silahdaşı və görkəmli dövlət xadimi kimi tanınmışdır. Onun çoxşaxəli fəaliyyəti yüksək inzibati vəzifələri əhatə etmişdir. O, Baş nazir, saray naziri, daxili işlər naziri və digər mühüm idarələrin rəhbəri, Azərbaycan valisi, Tehran Universitetinin prezidenti, senator, "Milliyun" partiyasının lideri və Milli İran Neft Şirkətinin icraçı direktoru vəzifələrində çalışmışdır. İqbal həmçinin, qeyri-rəsmi siyasi həyatda da fəal rol oynamış, mason lojalarının üzvü olmuşdur.
Dövrünün digər dövlət xadimlərindən fərqli olaraq, Mənuçöhr İqbal diplomatik mürəkkəblikdən uzaq, birbaşa siyasi üslubu ilə seçilmişdir. Onun öz mövqeyini açıq şəkildə ifadə etmək meyli yüksək ambisiyaları, statusa və xidməti vəzifələrə verdiyi önəmlə uzlaşmışdır.
