Tövlə pavilyonu — Türkiyədə, İstanbulunÜsküdar rayonundakı Bəylərbəyi sarayı kompleksinin tərkibində yerləşən tövlə. 1864-cü ildə tikintisi başa çatmış Bəylərbəyi sarayı ilə birlikdə inşa edildiyi güman edilir. Tikildiyi dövrdə padşahın tövləsi və buraya məsul olan miraxurun yaşayış yeri kimi istifadə edilmişdir. 1924-cü ildə Türkiyə Respublikanın elan edilməsindən sonra qəbul edilən qanunla bina milliləşdirilmiş və idarəçiliyi Türkiyə Böyük Millət Məclisinə verilmişdir. 1925-ci ildən etibarən sarayın digər hissələri kimi Milli Saraylar Müdirliyinin tabeliyinə keçmişdir. 1950-ci illərdə pavilyonun arxa hissəsində yerləşən tövlə mətbəxi və samanlıq Milli Saraylar Müdirliyinə bağlı Mühafizə Bölüyünün şəxsi heyəti üçün yataqxanaya çevrilmişdir. 1964-cü ildə sarayla birlikdə ziyarətə açılmış, lakin 1971-ci ildə bağlanmışdır.
