Kayzen.az

Kayzen.az
URL	kayzen.az
Kommersiya	Bəli
Tipi	Bloq
Qeydiyyat	Oxumaq üçün tələb olunmur, yazmaq üçün tələb olunur
Dilləri	Azərbaycan

Kayzen.az - xoşbəxt olmaq istəyən, uğur qazanmaq üçün çalışan, həyatında yaxşılığa doğru dəyişikliklər etməyə can atan insanlar üçün veb-saytdır. Bu veb-sayt istifadəçilərə fərdi və kollektiv bloq yazmaq imkanı verir.

Kayzen nə deməkdir?

Kayzen yapon dilində "kai" və "zen" sözlərindən (改善) əmələ gəlib mənası yaxşılığa doğru dəyişmək, inkişaf etmək deməkdir.

Saytın fəlsəfəsi

Kayzen.az saytının fəlsəfəsinə görə:

• İnsan xoşbəxt olmaq üçün yaranıb. Əgər o, buna nail ola bilmirsə, deməli günah onun özündədir;
• İnsan həyatda uğur qazanmaq üçün çalışmalı, öz gələcəyini istədiyi kimi qurmaq üçün səy göstərməli, dayanmadan və davamlı olaraq inkişaf etməlidir;
• İnsan özü ilə bərabər başqalarının da inkişafına nail olmalı, onların arzularının həyata keçməsinə yardım etməlidir.

Məzmunu

Kayzen.az saytında mütəmadi olaraq həyatını mənalı, maraqlı yaşamaq istəyənlər üçün seçilmiş mövzularda materiallar verilir. Onlar əsasən maarifləndirici, məsləhətverici funksiya daşıyır. Materiallar həm sayt administrasiyası tərəfindən, həm də bloqqerlərin özü tərəfindən yaradılır, redaktə edilir və yayımlanır. Saytda hər bir kəsin bloq açması, öz şəxsi gündəliyini aparması, həyatda qarşılaşdığı maraqlı məqamları qeyd etməsi təmin olunub.

Öz fikirlərini bölüşmək, maraqlı bir məlumatı insanların nəzərinə çatdırmaq, digərlərinə daha yaxşı həyat qurması üçün kömək etmək, populyar müəllif olub qonorar almaq istəyənlər sadəcə olaraq qeydiyyatdan keçməli və Kayzen.az saytında xoşbəxt həyat üçün lazımlı mövzularda kontent yerləşdirməlidir. Siyasət, skandala meylli şou-biznes sahələrini çıxmaq şərtilə geniş mövzularda kontent yerləşdirmək olar. Kontent dedikdə aşağıdakılar nəzərdə tutulur.

• gündəlik məqalə;
• elmi, ictimai, aktual yeniliklər;
• elektron kitablar;
• bədii əsərlər (roman, povest, poeziya, hekayə), publisistik oçerklər;
• araşdırma, analizə əsaslanan reportaj;
• istənilən növ elmi əsər, dissertasiya, diplom işi, səmərələşdirici təklif, kurs işi;
• xarici dillərdə olan resursların tərcüməsi;
• foto, audio və video-informasiya paylaşımı;
• məsləhət, tövsiyə və s.

Yerləşdirilən kontentin Azərbaycan dilində olması vacibdir (xarici dil öyrənməyə aid və bəzi spesifik mövzular istisnadır).

Sayt həmçinin öz istifadəçilərinə mikrobloq, fotoqalereya, istədikləri bloqlara abunə olmaq, RSS, axtarış kimi servislər təklif edilir. Biznes-tərəfdaşlıq üçün də sayt əlverişli imkanlar yaradır. Sayt administrasiyası isə istifadəçilərin istəklərinə diqqətlə yanaşması, liberal siyasəti, operativ reaksiyası ilə seçilir.

İşəmə prinsipi

Kayzen.az bloqo-sosial servisdir. Yəni, o həm internet forumu, həm də bloqosferanı özündə birləşdirir. Kayzen.az sosial sayt olduğu üçün cəmiyyətin kiçik bir modelini xatırladır. Həyatda tez-tez yaxşını pisdən ayırmağa çalışan insanlar bu saytda da hər bir şeyə öz münasibətlərini reytinq sistemi vasitəsilə bildirir. Qeydiyyatdan keçən hər kəs digər insana, mövzuya, şərhə mənfi və ya müsbət səs verir. Ədalət prinsipini qorumaq üçün verilən səslər istifadəçinin reytinqindən asılı olur: reputasiyası yüksək olan istifadəçinin verdiyi səs daha böyük təsir göstərir. Reytinqi aşağı olan istifadəçi isə məhdudiyyətlərlə qarşılaşır. Saytda abu-havanı məhz istifadəçilər yaradır, kimin yaxşı, kimin pis olduğunu seçir. Bir sözlə, saytı demokratik quruluşa malik onlayn cəmiyyət kimi xarakterizə etmək olar.

Sərt qaydaları

• Yazılarda translitdən istifadə etmək, milli əlifbaya məxsus hərfləri (ə, ş, ğ, ı, ö, ü, ç) düzgün yazmamaq olmaz;
• Yerləşdirilən kontentdə müəllif hüquqlarına riayət olunması mütləqdir;
• Kontent xoşməramlı məqsədlərlə yerləşdirilməli, qəbul olunmuş ictimai və saytdaxili normalar çərçivəsindən kənara çıxmamalıdır;
• Yerləşdirilən kontentdə Azərbaycan Respublikasının dövlət quruluşunu dəyişmək, onun milli rəmzlərinə, ümumilikdə Azərbaycan xalqına, böyük ictimai nüfuzu olan şəxslərə (Məhəmməd peyğəmbər, ölkə prezidenti və s.) qarşı fikirlər bildirmək, onları təhqir etmək qadağandır;
• Yerləşdirilən kontentdə ədəb-ərkan qaydalarından kənara çıxılmamalıdır və fiziki qüsurları, dili, irqi, seksual oriyentasiyası, milli mənsubiyyətinə görə digər şəxsləri təhqir etmək olmaz;
• Millətlər, dinlər, ictimai qruplar arası münasibətləri qızışdıran təbliğat aparmaq qadağandır. Mübahisəli faktlardan, tarixin qaranlıq məqamlarından, konflikt doğuran məsələlərdən yalnız tarixi həqiqətləri aşkara çıxartmaq, elmi araşdırma aparmaq, bəzi suallara cavab almaq, konstruktiv müzakirə aparmaq məqsədi ilə istifadə etmək olar;
• Yerləşdirilən kontentdə dövlət və kommersiya sirlərinin açılmaması, müəyyən arzuolunmaz məqamların, o cümlədən intim hisslərin, şəxsi maliyyə göstəricilərinin və s. gizli saxlanması tövsiyə olunur;
• Kontentdə ictimai nəzakət qaydalarını pozmaqdan, söyüş, ədəbsiz sözlər, vulqar ifadələr işlətməkdən çəkinmək məsləhət görülür.

Həmçinin bax

• Kayzen
• Bloq
• Bloqosfera