Fırtına (Marvel Comics)

Fırtına (ing. Storm) — Marvel Comics nəşriyyatı tərəfindən yaradılmış super qəhrəman personajı. X-Menin ən tanınmış üzvlərindən biridir. 20th Century Fox tərəfindən çəkilən 5 X-Men filminin 4-ündə yer almışdır. Len Veyn və Deyv Kokrum tərəfindən yaradılmış və ilk dəfə "Böyük ölçülü X-Men" komiksinin ilk sayında (may, 1975) görünmüşdür.

Bioqrafiya

Əsl adı Ororo Munroedir. Anası Keniyadakı bir qəbilənin şəhzadəsi, atası ABŞ fotoqrafıdır. Onlar evləndikdən sonra Manhettendə yaşamağa başlayırlar. Ororo burada anadan olur. Amma ailəsi ilə çox vaxt keçirmir. Ororo 6 aylıq ikən ailə Misirin paytaxtı Qahirəyə köçür. 5 yaşında ikən evlərinə düşən bomba nəticəsində Ororonun ata və anası həyatını itirir.

Kimsəsiz qalan Ororo uşaq ikən bir oğru dəstə başçısı olan Əhməd əl-Qibar tərəfindən tapılır və ona oğurluq etmək öyrədilir. Yaşadığı yerin ən yaxşı oğrularından birinə çevrilir. Uzun müddət Qahirədə yaşadıqdan sonra anasının vətəninə — Serenqeti ovalığına yola düşür. Saxara səhrasından keçərkən az qala öləcəkkən mutant gücləri ortaya çıxır və bunun sayəsində həyatda qalır. Bu hadisədən qısa müddət sonra evlənəcəyi və ölkəsinin kraliçası olacağı Qara pantera ilə tanış olur.

Afrikada yaşadığı müddətdə yerli qəbilələr ona daim hörmət və qorxu ilə yanaşırlar. İsti iqlimə sahib Afrikada istənilən an yağış yağdıra bilən Ororonu ilahə kimi görürlər. Həm gözəlliyi, həm güclərinə görə bərəkətin simvolu olur, özünə Fırtına adını götürür, X-Menin üzvü kimi Afrikadan ayrılana qədər ilahə kimi xatırlanır.

Bir gün Fırtına Professor X-dən telepatik mesaj alır. X-Menə qatılmaq qərarına gəlir və komandanın ən sadiq üzvlərindən biri olur. Nyu Yorkun kanalizasiya sistemində yaşayan Morlokların lideri Kallistonu təkə-tək döyüşdə məğlub edir, Morlokların lideri olur, amma liderliyi Kallistoya qaytarır.

Strom X-Men komandasının ən etibarlı üzvlərindən biridir. Çətin anlarda qərar alma bacarığı, xarizmatik şəxsiyyətə sahib olması onu Kiklopsdan sonra X-Menin ikinci lideri etmişdir.

Gücləri

Fırtına omeqa səviyyəli mutantdır və omeqa səviyyəli mutantlar ən güclü mutantlar hesab olunurlar. Fırtınanın əsas mutant gücü havanı idarə etməsidir. İqlimi idarə edə bilir, yağış, qar, dolu yağıdırır, çən və duman yaradır, fırtınalara səbəb olur. Havanın temperaturuna nəzarət edə və ildırım çaxdıra bilir. Zəif də olsa telepatik bacarığı vardır. Hava axını ilə cisimləri hərəkət etdirə və özü uça bilir. Suyun içində özü üçün lazımı qədər oksigen yaradıb nəfəs alır. Güclərindən istifadə edərkən gözləri ağ rəngdə olur. Bundan başqa əla döyüşçü və oğrudur.

Maraqlı faktlar

• Uşaq yaşlarında itirdiyi anası ilə birlikdə dağıntılar altında qalması üzündən Fırtınada qapalı yerlərdən qorxmaq fobiyası — klaustrofobiya yaranmışdır.
• Fırtınanın Vakanda kralı Qara pantera ilə olan evliliyi "Qisasçılar vs. X-Men" adlı komiks seriyasında bitmişdir. Bu seriyada Qara panter Fırtınaya evliliklərinin Vakanda baş rahibi tərəfindən bitirildiyini bildirir. Vakandanın baş rahibi isə elə Qara panteradır.
• Fırtına mutant irqinin gələcəyi üçün X-Menin üzvü Kiklops ilə döyüşməyə məcbur olmuşdur və güclərindən istifadə etmədən ona qalib gəlmişdir.
• Loki bir dəfə Fırtınaya yeni İldırım ilahəsi olmağı təklif etmişdir və hətta ona "Stormkaster" adlı çəkic vermişdir. Amma bunun Lokinin hiyləsi olduğunu görən Ororo təklifi rədd etmişdir.
• Qara panteradan başqa Dəmirçi və Porsuqla münasibətlər yaşamışdır.

Digər mediada

Helli Berri "X-Men: Son dirəniş" (2006) filmində Fırtına rolunda.

Filmlər

Fırtına indiyə qədər 20th Century Fox tərəfindən çəkilmiş 4 X-Men filmində yer almışdır: "X-Men" (2000), "X2" (2004), "X-Men: Son Dirəniş" (2006), "X-Men: Gələcəyin keçmiş günləri" (2014). Bütün bu filmlərdə Fırtına rolunda Helli Berri çıxış etmişdir. Lakin 2016-cı ildə tamamlanacaq "X-Men: Apokalipsis" filmində Fırtına rolunu Aleksandra Şipp oynayacaqdır.

Televiziya

• "Porsuq və X-Men"
• "Hörümçək-adam və onun heyranedici dostları"
• "X-Men"
• "X-Men: Təkamül"
• "Marvel super qəhrəman heyəti"
• "Qara pantera"
• "Marvel anime"
• "X-Men: X-Men praydı"
• "Hörümçək-adam: Anime edilmiş seriyalar"
• "Növbəti Qisasçılar: Sabahın qəhrəmanları"
• "Marvel Disk müharibələri: X-Men"
• "Mükəmməl Hörümçək-adam"

Video oyunlar

• "X-Men"
• "Spider-Man/X-Men: Arcade's Revenge"
• "X-Men: Children of the Atom"
• "X-Men vs. Street Fighter"
• "Marvel vs. Capcom"
• "Marvel vs. Capcom 2: New Age of Heroes"
• "X-Men: The Ravages of Apocalypse"
• "X-Men: Mutant Academy"
• "X-Men: Mutant Academy 2"
• "X-Men: Next Dimension"
• "X-Men Legends"
• "X-Men Legends II: Rise of Apocalypse"
• "Marvel Nemesis: Rise of the Imperfects"
• "X-Men: The Official"
• "Marvel: Ultimate Alliance"
• "The Amazing Spider-Man 2"
• "Spider-Man: Web of Shadows"
• "Marvel: Ultimate Alliance 2"
• "Marvel Super Hero Squad"
• "LittleBigPlanet"
• "Marvel vs. Capcom 3: Fate of Two Worlds"
• "Ultimate Marvel vs. Capcom 3"
• "Marvel Super Hero Squad Online"
• "Marvel: Avengers Alliance"
• "Marvel Avengers: Battle for Earth"
• "MMORPG Marvel Heroes"
• "Lego Marvel Super Heroes"