Mirzəağa Əliyev

Mirzəağa Əliyev
Mirzəağa Əli oğlu Əliyev
Doğum tarixi	1883
Doğum yeri	Hövsan, Bakı qəzası, Bakı quberniyası, Rusiya imperiyası
Vəfat tarixi	25 oktyabr 1954
Vəfat yeri	Bakı, Azərbaycan SSR, SSRİ
Dəfn yeri	Fəxri Xiyaban
Milliyyəti	azərbaycanlı
Vətəndaşlığı	Rusiya imperiyası→ SSRİ
Həyat yoldaşı	Gövhər Qazıyeva
Fəaliyyəti	aktyor
Fəaliyyət illəri	1901–1954
Mükafatları
IMDb	ID1135117
Vikianbarda əlaqəli mediafayllar

Mirzəağa Əli oğlu Əliyev (1883, Hövsan, Bakı qəzası — 25 oktyabr 1954, Bakı) — Azərbaycan teatr və kino aktyoru, SSRİ Dövlət mükafatı laureatı (1943, 1948), "Qırmızı Əmək Bayrağı" ordeni laureatı, SSRİ Xalq artisti (1949).

Həyatı

Mirzəağa Əliyev kəndli ailəsində doğulmuşdur. İlk təhsilini mollaxanada almış, Bakıda rus-müsəlman məktəbini bitirmişdir.

1901-ci ildə Nəcəf bəy Vəzirovun "Müsibəti Fəxrəddin" pyesinin tamaşaya qoyulması zamanı Şahmar bəy rolunda ilk dəfə səhnəyə çıxmışdır. Azərbaycan teatr xadimlərindən Nəcəf bəy Vəzirov və Cahangir Zeynalov onun aktyor kimi yetişməsinə təsir göstərmişdir. 1906–1907-ci illərdə "Həmiyyət" teatr truppasının rəhbəri və aktyoru olmuşdur. Bu truppa, əsasən, fəhlə rayonlarında tamaşalar verirdi. 1907–1912-ci illərdə "Nicat" cəmiyyətinin teatr truppasında çıxış etmişdir. 1912-ci ildə mütərəqqi ictimai fəaliyyətinə görə Həştərxana sürgün edilmişdir. 1912–1916-cı illərdə Volqaboyu şəhərlərində, Tbilisidə, İrəvanda, İran və Türkiyənin bir sıra şəhərlərində tamaşalar vermişdi. 1916-cı ildə Bakıda tamaşaya qoyulmuş Cəlil Məmmədquluzadənin "Ölülər" komediyasındakı İsgəndər rolu onun yaratdığı klassik obrazlar silsiləsinə daxildir.

Azərbaycan sovetləşəndən sonra M. Əliyev Bakı Azad Tənqid Təbliğ Teatrının təşkilatçısı olmuş, burada aktual mövzulu kupletlərdə çıxış etmişdir. 1924-cü ildən ömrünün sonuna qədər Azərbaycan Dövlət Dram Teatrında çalışmış, Azərbaycan səhnə realizmi ənənələrini davam etdirmişdir. Mirzəağa Əliyev fitri komediya istedadına, milli koloritə, ifadəli yumor boyaları və zəngin səhnə nüanslarına malik aktyor idi.

M. Əliyev kino aktyoru kimi də məşhur olmuş, "Bismillah", "Hacı Qara", "Məhəbbət oyunu", "Almaz", "Bakının işıqları" və s. filmlərdə çəkilmişdir.

Xatirəsi

• Anadan olduğu Hövsan qəsəbəsində Mirzəağa Əliyev adına Mədəniyyət evi fəaliyyət göstərir.
• Bakının Yasamal rayonunda küçələrdən biri Mirzəağa Əliyevin adını daşıyır.

Mirzəağa Əliyevin Hövsandakı büstü

Mükafatları

• "SSRİ xalq artisti" fəxri adı — 22 iyul 1949
• "Azərbaycan SSR xalq artisti" fəxri adı — 25 aprel 1933
• "Azərbaycan SSR əməkdar artisti" fəxri adı — 26 yanvar 1926
• Stalin mükafatı — 1943, 1948
• "Qırmızı Əmək Bayrağı" ordeni — 1946, 1949
• "Qafqazın müdafiəsinə görə" medalı — 1944
• "1941-1945-ci illər Böyük Vətən müharibəsində rəşadətli əməyə görə" medalı — 1946

Filmoqrafiya

• Arşın mal alan (film, 1917) — rol: Süleyman bəy
• Bismillah (film, 1925) — rol: Molla Mirzə Əbdürrəhim
• Müxtəlif sahillərdə (film, 1926) — rol: Amerikan fəhləsi
• Hacı Qara (film, 1929) — rol: Hacı Qara
• Məhəbbət oyunu (film, 1935) — rol: VVAQ müdiri
• Mavi dənizin sahilində (film, 1935)
• Almaz (film, 1936) — rol: məktəb direktoru Səməndər
• Arşın mal alan (film, 1945)
• Bakının işıqları (film, 1950)

Mənbə

• Кино: Энциклопедический словарь / Гл. ред. С. И. Юткевич; Редкол.: Ю. С. Афанасьев, В. Е. Баскаков, И. В. Вайсфельд и др. — Москва: Советская энциклопедия, 1987. — стр. 17.
• Azərbaycan Xalq Cümhuriyyəti Ensiklopediyası. İki cilddə. Birinci cild. Bakı: Lider, 2004.- səh. 358–359.
• Azərbaycan Respublikası Mədəniyyət Nazirliyi. C.Cabbarlı adına "Azərbaycanfilm" kinostudiyası. Aydın Kazımzadə. Bizim "Azərbaycanfilm". 1923–2003-cü illər. Bakı: Mütərcim, 2004.- səh. 51.

Xarici keçidlər

• Mirzəağa Əliyevin bioqrafiyası www.adam.az