The Beatles

Beatles 1964-cü ildə
Soldan sağa
Yuxarıda: Con Lennon, Pol Makkartni
Aşağıda: Corc Harrison, Rinqo Star

Bitlz, "Beatles" (qrupun üzvlərini ayrı-ayrılıqda bitllar və ya bitlzlar adlandırırlar) - Liverpul şəhərindən olan Con Lennon, Pol Makkartni, Corc Harrison və Rinqo Starı (əsl adı - Riçard Starki) özündə birləşdirən, 60-cı illərin məşhur ingilis rok qrupu. Beatles rok-pop musiqisinə misilsiz töhfələr verməklə onu köklü surətdə dəyişdirmişdir. Ötən əsrin 60-cı illərində görünməmiş populyarlıq qazanan qrup XX əsrin musiqi mədəniyyətində ən parlaq fenomenlərdən birinə çevrilir.

Beatles bir çox satış rekordlarını qıraraq 50-dən artıq mahnısı ilə dünyanın müxtəlif ölkələrinin musiqi çatlarına liderlik etmişdir. Amerika Səsyazmalar Sənayesi Assosiasiyasının məlumatına görə Beatles ABŞ-da bütün dövrlərin səsyazmaları ən çox satılmış qrupudur. Öz səsyazma studiyalarının, EMİ-nin yaydığı məlumatlara görə isə 1985-ci ilə qədər dünyada qrupun 1 milyarddan artıq diski satılmışdır. 2004-cü ildə tanınmış Rolling Stone jurnalının apardığı sorğular əsasında tərtib edilən "Bütün dövrlərin 100 ən yaxşı sənətçisi" siyahısında Beatles-i I yerə layiq görmüşdür.

Yaradıcılığının ilkin dövrlərində 50-ci illərin rok&roll və lokal skiffl janrlarına üstünlük verən qrup, sonrakı illərdə Tin Pan Alleydən başlamış psixodelik janrlarına kimi yeni musiqi cərəyanlarını təqdim etmişdir. Qrupun əksər mahnılarını Lennon-Makkartni dueti bəstələmişdir.

1963-cü il qrupun tarixində əlamətdar olur. Belə ki məhz həmin il, sonralar bütün dünyaya yayılacaq "Beatlomania" kabusu Amerika sahillərinə yönəlir. Musiqi fəaliyyətlərinə "She loves you" və "I want to hold your hand" kimi bir o qədər də məşhurluq qazana bilməyən mahnıları sonradan dünya şöhrətli "Sgt. Pepper's Lonely Hearts Club Band ve Abbey Road" albomları ilə əvəzlənir. Qrup 5 filmdə çəkilməyə də müəyssər olmuşdur (A Hard Day's Night, Help!, Magical Mystery Tour, Yellow Submarine, Let It Be).

Qrup üzvləri 1970-ci ildə bütün dünyanı heyrət içində buraxacaq qərar qəbul edirlər. Az müddət sonra dünya mətbuatı "Beatles" üzvlərinin ayrılması xəbərini yayır.

1980-ci ildə Con Lennonun Nyu-Yorkda öldürülməsi ilə fanatların ümid etdiyi - qrupun nə vaxtsa bir yerə toplanması arzuları da gerçəkləşmədi. 2001-ci ildə qrupun digər bir üzvü Corc Harrison xərçəng xəstəliyindən dünyasını dəyişdi.

Hazırda sağ qalan qrup üzvləri - Pol Makkartni və Rinqo Star ayrı-ayrılıqda öz solo karyeralarını davam etdirirlər. Bu sahədə Pol Makkartni daha böyük uğurlara imza atıb.