Xeybər İgidəliyev

Vikipediya, azad ensiklopediya
Naviqasiyaya keçin Axtarışa keçin
İgidəliyev Xeybər Zəfər oğlu
Xeybər Zəfər oğlu İgidəliyev
Doğum tarixi
Doğum yeri Hacıqabul şəhəri
Vəfat tarixi (65 yaşında)
Vəfat yeri Hacıqabul şəhəri
Vətəndaşlığı Azərbaycan vətəndaşı
Milliyyəti Azərbaycanlı
İxtisası jurnalist
Təhsili ali

Xeybər İgidəliyev (Xeybər Zəfər oğlu İgidəliyev; 1937 – 2002) — Azərbaycan yazıçısı.[1]

Həyatı[redaktə | mənbəni redaktə et]

Xeybər İgidəliyev 1937-ci il fevral ayının 17-də Hacıqabul şəhərində anadan olmuşdur. Atası Igidəliyev Zəfər 1896-cı ildə doğulmuşdur. 1941-ci ildə Böyük Vətən müharibəsinə ilk gedən hacıqabullulardandır. Dörd il müharibədə şərəfli döyüş yolu keçmişdir. Cəbhədən qayıdandan sonra öz şəxsi təsərrüfatında çalışmışdır. Ailəsini alnının təri, əlinin zəhməti ilə dolandıran İgidəliyev Zəfər 1953-cü ildə vəfat etmişdir. Anası İzzə Comərd qızı 1915-ci ildə anadan olmuşdur. İzzə əvvəllər həyat yoldaşı ilə fermada işləmiş, sonralar evdar qadın olmuşdur. O, 73 yaşında – 1988-ci ildə vəfat etmişdir. Xeybərin məktəb illəri Böyük Vətən müharibəsinin son illərinə düşmüşdür. Amma həyatın çətinliyinə, əzab- əziyyətinə baxmayaraq o, əlaçı şagirdlərdən olmuşdur. Doğmalarının dediyinə görə, Xeybər VI-VII siniflərdən şeirə həvəs göstərmiş, məktəbdə keçirilən tədbirlərə böyük həvəslə qatılmışdır… Haşiyə: Belə bir hadisəni həm Xeybər müəllim, həm d ə onun yaşıdları vaxtaşırı həvəslə danışardılar… "1955-ci il idi. Rayonun keçmiş rəhbərliyi görkəmli şair S.Vurğunun sakinlərlə görüşə gələcəyi xəbərini bildirir. Bütün rayon həmin görüşə hazırlaşmağa başladı. O cümlədən Xeybərin oxuduğu məktəbin kollektivi də. Bu ərəfədə orta məktəb şagirdi Xeybər S.Vurğuna şeir həsr etdiyini sinif rəhbərinə bildirdi. Şeirlə bütün müəllim kollektivi tanış oldu. Şeir bəyənildi. Nəhayət, çıxışa Xeybəri d ə yazdılar. Görüş zamanı 18 yaşlı Xeybərin oxuduğu şeiri bütün görüş iştirakçıları alqışladı. Görkəmli şair şagirdin boynunu qucaqlayıb üzündən öpdü, onun gələcəkdə böyük şair olacağına zəmanət də verdi. Bu görüş demək olar ki, Xeybərin istedadına güc, qol-qanad verdi, daha da ruhlandırdı. Xeybər İgidəliyev 1957-ci ildə orta məktəbi fərqlənmə attestatı ilə bitirdi. Qazıməmməddəki 13 saylı məktəbdə kitabxanada əmək fəaliyyətinə başladı. Məktəbdə işləyə-işləyə 1960-cı ildə ADU-nun Jurnalistika-filologiya fakültəsinə daxil oldu. Bu vaxtdan sonra X.İgidəliyev yazdığı şeirləri, məqalələri ilə tez-tez mətbuatda çıxış etməyə başladı. O, Qazıməmməd stansiyasındakı 13 saylı məktəbdə üç il işləmişdir. Ali təhsilini başa vurduqdan sonra rayon qəzetində ədəbi işçi kimi əmək fəaliyyətinə başlamışdır. Sonra şöbə müdiri, mətbəənin direktoru vəzifələrində çalışmışdır. Onun rayon qəzetində işıq üzü görən şeirləri v ə məqalələri artıq rayon ziyalılarının diqqətini cəlb etmişdi. Ona görə də, rayon rəhbərliyi əvvəlcə onu "Mayak" qəzetinin redaktor müavini, sonra isə "İşıq" qəzetinin məsul katibi vəzifəsinə irəli çəkmişdir. Bu vəzifələrdə işlədiyi müddətdə Xeybər müəllimin həmin qəzetlərin səhifələrində işıq üzü görən maraqlı, orijinal yazılarının (məqalə, rəy, felyeton, müsahibə oçerk və s.) sayı yüzdən artıqdır. Bütün yaxşı işinə - çalışdığı sahələrdə qazandığı uğurlarına görə Əlibayramlı (indi Şirvan) şəhər rəhbərliyi onu 1971-ci ildə Şəhər Partiya Komitəsi təbliğat və təşviqat şöbəsinin müdiri vəzifəsinə irəli çəkmişdir. Bacarıqlı mütəxəssis kimi o, 1974-cü ilə qədər bu vəzifədə çalışmış, ona olan etimadı doğrultmuşdur. Bir jurnalist kimi əldə etdiyi nailiyyətlərə görə Xeybər İgidəliyev 1981-ci ild ə SSRİ Jurnalistlər İttifaqına üzv qəbul edilmişdir. Respublikamız müstəqillik əldə etdikdən sonra, Hacıqabul yenidən rayon statusunu bərpa edir. Yeni yaradılmış rayonun rəhbərliyi bacarıqlı, vəzifəsinin öhdəsindən layiqincə gələn mütəxəssis olduğunu nəzərə alıb onu Hacıqabul Rayon İcra Hakimiyyətində Ümumi işlər üzrə şöbə müdiri vəzifəsinə təyin edir.

1955-ci ildən poeziya aləminə qədəm qoyan X.İgidəliyev Salyan, Əlibayramlı və Hacıqabulda olan poeziya maraqlılarını bir araya gətirmiş, "İşıq" qəzeti redaksiyası nəzdində "Ədəbi birlik" təşkil etmişdir. Birlik üzvlərinin əsərlərinin çap olunmasına, poeziya məclislərinin vaxtaşırı keçirilməsinə öz köməyini əsirgəməmişdir. Qısa bir zaman kəsiyində birlik üzvlərinin sayı əlli nəfərə çatmışdır. İlk addımı bu birlikdə atan şairlərin bir çoxunun sonralar şeir kitabları nəşr edilmiş və onlar respublikamızda tanınan şairlərdən olmuşlar: Mehman Əliyev, Arif Quliyev, Böyükağa Sadıqov, Novruz Dumanlı, Allahverdi Eminov, Cavad Məmmədov, Mirzəbaba Xələfov, Əbülfəz Quliyev, Əfsəl Babayev, Cənnət Muğanlı, MirYusif MirNəsir oğlu və başqaları ədəbi birliyin vaxtaşırı keçirilən məclislərində iştirak etmiş, şeirləri müzakirə olunmuş, bəyənilən əsərlər qəzetdə çap olunub oxuculara çatdırılmışdır. *** Altmış beş illik mənalı ömrünün yarıdan çoxunu xalqına, vətəninə həsr edən şair-jurnalist Xeybər İgidəliyevin zəhməti, əməyi dövlətimiz tərəfindən qiymətləndirilmiş, müxtəlif mükafat və təltiflərə layiq görülmüşdür. Elin-obanın məclislərinin bəzəyi olan gözəl şair, dəyərli jurnalist, əvəzsiz ziyalı Xeybər İgidəliyev uzun sürən xəstəlikdən sonra 2002-ci il iyun ayının 2-də dünyasını dəyişmiş, Hacıqabul rayon qəbristanında dəfn edilmişdir.

Ailəsi[redaktə | mənbəni redaktə et]

Xeybər İgidəliyevlə Şükufə Ağaquluqızının izdivacından iki oğlu, iki qızı olmuşdur. Şairin on bir nəvəsi, iki nəticəsi vardır.

Həyat yoldaşı Şükufə Ağaqulu qızı isə 2013-cü il noyabr ayının 16-da vəfat etmişdir.

İstinadlar[redaktə | mənbəni redaktə et]

  1. Xeybər İgidəliyev. Vaxt gələr, axtarıb gəzərsiz məni (PDF) (az.). Bakı: "Elm və təhsil". 2014. 2017-11-25 tarixində arxivləşdirilib (PDF). İstifadə tarixi: 2017-11-25.