Mehriban Ələkbərzadə

Mehriban Ələkbərzadə
Doğum tarixi	5 avqust 1965(1965-08-05) (58 yaş)
Doğum yeri	Kirovabad, Azərbaycan SSR, SSRİ
Vətəndaşlığı	SSRİ  Azərbaycan
Fəaliyyəti	kinorejissor, ssenarist, rejissor
Fəaliyyət illəri	1988-ci ildən
Təhsili	Azərbaycan Dövlət Mədəniyyət və İncəsənət Universiteti
Mükafatları
IMDb	ID3062495

Mehriban Ələkbərzadə — Azərbaycan rejissoru, ssenari müəllifi, film direktoru. Naxçıvan MR-nın Əməkdar İncəsənət Xadimi (2003).

Həyatı

Mehriban Zaur qızı Ələkbərzadə 1965-ci il avqust ayının 5-də Gəncə şəhərində doğulub. Uşaq yaşlarından ailəsi Sumqayıt şəhərinə köçüb və o, buradakı 17 saylı orta məktəbi 1982-ci ildə bitirib. Bir il Sumqayıt Dövlət Dram Teatrında rejissor köməkçisi işləyib. Mirzağa Əliyev adına Azərbaycan Dövlət İncəsənət İnstitutun rejissorluq fakültəsinə 1983-cü ildə daxil olub və 1988-ci ildə oranı bitirmişdir. Təyinatla Lənkəran Dövlət Dram Teatrına göndərilmişdir.

İxtisas təhsilini görkəmli rejissor Mehdi Məmmədovun kursunda alan Mehriban Ələkbərzadə hələ tələbəlik illərində institutun Tədris teatrında Tennessı Uilyamsın "Sökülən yurd", Eduard de Filipponun "Silindr", Dövlət televiziyasında Elçinin "Ömrün son səhəri" pyeslərini tamaşaya hazırlayıb. Elçinin bu əsəri televiziya tamaşası kimi də çəkilib.

1990-cı ildə Lənkərandan Bakıya qayıdandan sonra "Azərbaycanfilm" kinostudiyasında "Güzgü" qısametrajlı bədii filmini çəkmişdir.

1991-ci il yanvar ayının 28-də Akademik Milli Dram Teatrına rejissor köməkçisi ştatına işə götürülmüşdür. 1 aprel 1994-cü ildən isə həmin teatrda quruluşçu rejissordur.

Ali savadlı rejissor diplomu almaq üçün o, 1998-ci il iyunun 11-də Akademik Milli Dram Teatrının Kiçik səhnəsində Jan Pol Sartın "Dəfn edilməmiş ölülər" dramını tamaşaya hazırlayıb. "Əla" qiymət alan gənc rejissor təyinatla Lənkəran Dövlət Dram Teatrına göndərilib. Burada Şıxəli Qurbanovun "Sənsiz" (2 noyabr 1989), Bəxtiyar Vahabzadənin "Yağışdan sonra" (25 mart 1989), Stanislav Stratiyevin "Avtobus", ("Çarəsiz sərnişinlər". 24 aprel 1990)pyeslərinə quruluş verib. 1990-cı ildə Lənkərandan Bakıya qayıdandan sonra "Azərbaycanfılm" kinostudiyasında "Güzgü" qısametrajlı bədii filmini çəkib. Rejissor Mehriban Ələkbərzadə 1991-ci il yanvar ayının 28-də Akademik Milli Dram Teatrına rejissor köməkçisi ştatına işə götürülüb. 1 aprel 1994-cü ildən isə bu kollektivdə quruluşçu rejissordur. O, Akademik teatrda "Dəfn edilməmiş ölülər", "Min illərin işığı", "Müəmmalı bir gəlin üç versiyası", "Poçt şöbəsində xəyal", "Afət" və başqa tamaşalar hazırlamışdı.

Mehriban Ələkbərzadə Azərbaycan Dövlət Televiziyasında Nahid Hacızadənin "Yaşa, ey haqq!", Jan Koktonun "İnsan səsi", Marşa Normanın "Gecən xeyrə qalsın, ana", Mehriban Vəzirın "İlğım", Afaq Məsudun "Cəza" əsərlərini tamaşaya hazırlayıb.

"Space" televiziyasında özünün həm rejissoru, həm müəllif-aparıcısı olduğu "Dünən, bu gün, sabah, "Telebenefıs", "Fövqəl dünya və mən" bədii kompozisiyaları silsilə proqramlar arasında xüsusi yer tutur. Bu televiziya kanalında dörd seriyalı "Qırmızı Terror və ya Mircəfər Bağırov", "Azərbaycan xanlıqları" bədii-sənədli fılmlərin rejissorudur.

2003-cü ildə Naxçıvan MR-nın Əməkdar İncəsənət Xadimi fəxri adına layiq görülmüşdür.

2008-ci ilin əvvəllərində mətbuata açıqlamasında rejissor televiziya fəaliyyətinə son qoyduğunu bildirib.

Filmoqrafiya

1. Addım, addım (film, 2002)(qısametrajlı sənədli film)(Space tv)
2. Azərbaycan naminə! (film, 2004)
3. Azərbaycan xanlıqları. Naxçıvan və İrəvan xanlıqları. 5-ci film (film, 2003)
4. Azərbaycan Xanlıqları-I Film (film)
5. Azərbaycan Xanlıqları-II Film (film)
6. Azərbaycan Xanlıqları-III Film (film)
7. Azərbaycan Xanlıqları-IV Film (film)
8. Cəza (film, 1996)
9. Dəfn edilməmiş ölülər (film, 1988)
10. Dünən, Bu Gün, Sabah (veriliş)
11. Fövqəldünya və Mən (veriliş)
12. Gecən xeyrə qalsın, ana (film, 1995)
13. Güzgü (film, 1990)(II)
14. İflas (film, 2004)
15. İlğım
16. İnsanın səsi (film, 1989)
17. Qırmızı Terror və ya Mircəfər Bağırov (film)
18. Məhkumlar (film, 2007)
19. Ömrün sarı rəngi (film, 2002)
20. Telebenefıs (veriliş)
21. Yaşa, ey haqq (film, 1993)

Həmçinin bax

• Mehriban Ələkbərzadə ilə “Ustad dərsi”