Rəhman Əlizadə

Rəhman Əlizadə
Doğum tarixi	19 dekabr 1947(1947-12-19)
Doğum yeri	Bakı, Azərbaycan SSR, SSRİ
Vəfat tarixi	16 mart 2013(2013-03-16) (65 yaşında)
Fəaliyyəti	tərcüməçi
Təhsili	Azərbaycan Dövlət Mədəniyyət və İncəsənət Universiteti

Rəhman Balarza oğlu Əlizadə — Azərbaycan teatr rejissoru, Azərbaycanın əməkdar incəsənət xadimi, A.Şaiq adına Azərbaycan Dövlət Kukla teatrının sabiq baş rejissoru.

Həyatı

Rəhman Balarza oğlu Əlizadə 19 dekabr 1947-ci ildə Bakıda doğulub. 237 saylı orta məktəbdə oxuyub. Azərbaycan Dövlət İncəsənət İnstitutunun mədəni-maarif fakültəsini bitirib (1972).

1968-ci ildən 1993-cü ilədək Mərdəkan Xalq teatrında rejissor işləyib. İşlədiyi müddət ərzində «Xırs quldurbasan», «Müsyö Jordan və dərviş Məstəlişah» (M.F.Axundov), «Ölülər» (C.Məmmədquluzadə), «Jorj Danden», «Zorən Nigah» (J.B.Molyer), «Əvvəlinci şərabçı» (L.Tolstoy), «Pəri Cadu» (Ə.Haqverdiyev) və s. tamaşalar hazırlayıb.

1993-cü ildən 2006-cı ilədək Abdulla Şaiq adına Azərbaycan Dövlət Kukla teatrında baş rejissor vəzifəsində çalışıb. Bu müddətdə dramaturq tək özünün qələmə aldığı «Sindibadın xoşbəxtlik adasına səyahəti», «Tıq-tıq xanım», «Bilqamıs əfsanəsi», «Keçəlin toyu», «Dəli Domrul», «Damdabaca», «Maymaq», «Eramızdan milyon il əvəl», «Ay dəli», «Ələkbər əmi gülüş planetində», «Dəcəl çəpişlər, belə-belə işlər» pyeslərinə quruluş verməklə «Kuraj ana» (B.Brext), «Pırpız Sona» (C.Məmmədquluzadə), «Qızıl xoruz» (A.S.Puşkin), «Göyçək Fatma» (K.Ağayeva) və s. tamaşaları hazırlayıb.

Ümumiyyətlə, 2006-cı ilədək Abdulla Şaiq adına Azərbaycan Dövlət Kukla teatrında hazırlanmış 32 tamaşanın quruluşçu rejissorudur.

1983-cü ildən Azərbaycan Teatr Xadimləri İttifaqının və 1988-ci ildən Azərbaycan Yazıçılar Birliyinin üzvüdür.

28 oktyabr 2000-ci ildə Əməkdar İncəsənət xadimi fəxri adı ilə təltiflənib, 2002-ci ildən Prezident mükafatçısıdır.

2006-2009-cu illərdə Azərbaycan Gənclər teatrında baş rejissor işləyib. Orada «Mürafiə vəkilləri» (M.F.Axundov), «İblis» (H.Cavid), «Dünyanın axırı» (R.Əlizadə), «Tülkünün uçuşu» (A.Şaiq), «Saraxatun» (H.Saraclı), «Su pərisi» (F.Mustafa) tamaşalarını hazırlayıb. 2009-cu ilin aprel ayından yenidən Abdulla Şaiq adına Azərbaycan Dövlət Kukla teatrına baş rejissor təyin olunub. V.Şekspirin «Yay gecəsində yuxy» ,Nizami Gəncəvinin"Xeyir və Şər" tamaşalarını hazırlayıb.

Bir dramaturq kimi 25-dən artıq pyesi Dövlət teatrlarında tamaşaya hazırlanıb.

2008-ci ildə «Komediyalar», 2009-cu ildə isə «Pyeslər» kitabları nəşr olunub.

Rəhman Əlizadə 15 mart 2013-cü ildə, 66 yaşında, ağ ciyər çatışmazlığından vəfat edib.

Ailəsi

AMEA-nın Tətbiqi Fizika İnstitutunun elmi işçisi Fazilə Əlizadə ilə ailə həyatı qurub. İki övladı, 3 nəvəsi var.

İstinadlar

• Rəhman Əlizadə