Vikipediya:Ensiklopedik əhəmiyyətlilik (şəxslər)

Ensiklopedik əhəmiyyətlilik
Xüsusi mövzularla bağlı qaydalar
Astronomik obyektlər Kitablar Hadisələr Filmlər Coğrafi xüsusiyyətlər Musiqi Rəqəmlər Şirkətlər və təşkilatlar Şəxslər Elm xadimləri İdman və idmançılar Futbolçular Veb kontent

İstənilən universal ensiklopediya kimi Vikipediyada da vacib tarixi və müasir şəxslərin bioqrafiyaları yer alır. Vikipediya kağız ensiklopediya deyil və buna görə də burada biorafiyasına yer verilə biləcək şəxslərin siyahısı kifayət qədər genişdir. Amma bu o demək deyil ki, Vikipediyada yer üzündəki bütün insanlar haqqında məlumat yerləşdirmək olar.

Yadda saxlayın ki, Vikipediya ensiklopedik məlumatların toplandığı 2-ci dərəcəli mənbədir. Belə ki, daxil etdiyiniz məlumatın doğruluğunu sübut etmək üçün 1-ci dərəcəli mənbə sayılan etibarlı mənbələrə istinad etmək vacibdir.

Tarixi şəxslər

Tarixi şəxslər haqqında məlumatlar adətən daha az mübahisələr doğurur. Belə ki, tarix özü bir qayda olaraq onların əhəmiyyətini dəqiq müəyyənləşdirir. Zaman bəşəriyyətin inkişafı üçün o qədər də əhəmiyyətli işlər görməyən şəxsləri özü çıxdaş edir. Tarixi şəxslərin əhəmiyyətlilik səviyyələri təhlil edilərkən ən çox aşağıdakı suallar meydana çıxır:

1. Bu şəxs özündən sonra hansısa bir sahənin mütəxəssisləri tərəfindən dəyərli töhfə hesab olunan nə isə qoyubmu?
2. Vəfat etdikdən sonra onun haqqında hər hansısa bir mənbədə məlumat verilirmi? (genealoji tədqiqatlar bu mənbələrə aid edilmir)
3. Onun adı hər hansısa bir sahəvi və ya yerli (o cümlədən, diyarşünaslıq), etibarlılığı şübhə doğurmayan sorğu kitablarında, məlumat nəşrlərində xatırlanırmı?

Tarixi şəxslə bağlı internet mənbələrində az məlumatın verilməsi onun haqqında yaradılan məqalənin silinməsinə tutarlı əsas ola bilməz: hələ ki, qlobal şəbəkədə insan fəaliyyətinin bütün sahələri haqqında, xüsusilə də şəxslərin tərcümeyi-hallarına dair tam informasiya təqdim edilməyib.

Bundan başqa tarixi şəxslərin əhəmiyyətliliyi yaxşı olardı ki, müasir şəxslər üçün müəyyənləşdirilmiş daha komkret meyarlarla da əsaslandırılsın (sonrakı bölməyə bax).

Müasir şəxslər

Həyatda olan (və ya yaxın dövrlərdə vəfat edən) şəxslərin əhəmiyyətlilik dərəcəsini müəyyənləşdirmək bir qədər çətindir: onların barələrində Vikipediyada məqalə yaradılmasına layiq olub-olmadıqlarını müəyyən etmək üçün aşağıdakı meyarlara nə dərəcədə uyğun gəldiklərini yoxlamaq lazımdır.

Ümumi prinsiplər

1. Məlumatın yoxlanılması: məqalədəki məlumatın həqiqiliyini müstəqil mənbələrə əsaslanaraq yoxlamaq mümkündürmü? Bunu uzun müddət (məsələn, on il) keçdikdən sonra da etmək mümkün olacaqmı?
2. Məqalənin zənginləşdirilməsi: məqalə nə vaxtsa qəlibdən daha böyük həcmə sahib ola bilərmi? Məqalə nə vaxtsa inkişaf etdirilərək seçilmiş məqaləyə çevrilə bilərmi?

Siyasətçilər və ictimai xadimlər

1. Mövcud olan bütün dövlətlərin və ölkələrin, o cümlədən tanınmayan dövlətlərin, eləcə də insanlar tərəfindən məskunlaşmış və ya yaşayış üçün yararlı olan ərazilərin nominal və faktiki rəhbərləri.
2. Beynəlxalq təşkilatların və dövlətlərarası təsisatların (BMT, YUNESKO, MAQATE, Ümumdünya bankı, NATO, MDB və s.) ali rəhbərləri (sədr, baş katib və s.) və xüsusi məsul şəxsləri (xüsusi təmsilçi və s. statusu olan şəxslər).
3. Bütün ölkələrin qanunverici (milli məclis, parlament, duma, konqress və s.), icraedici (hökumət, nazirlər kabineti və ya şurası və s.) və məhkəmə (ali məhkəmə, konstitusiya məhkəməsi və s.) orqanlarının rəhbərləri və üzvləri.
4. Bütün ölkələrin nüfuzlu siyasi partiyalarının, hərəkatlarının rəhbərləri və ictimai fəaliyyət baxımından fəal nümayəndələri (siyasi təşkilatın nüfuzu onun ölkədə keçirilən seçkilərdə müntəzəm iştirak etməsi, eləcə də aktiv və sistemli şəkildə parlamentdənkənar fəaliyyəti - nümayiş və etiraz yürüşləri, mitinqlər təşkil etməsi, qanunvericilik təşəbbüsləri ilə çıxış etməsi və s. ilə müəyyənləşdirilir).
5. Ölkələrin birinci dərəcəli inzibati-ərazi vahidlərinin (vilayət, ştat, rayon və s.) müxtəlif hakimiyyət qollarının rəhbərləri.
6. Bütün ölkələrin əhalisinin sayı 100 mindən az olmayan şəhərlərinin və digər yaşayış məntəqələrinin, o cümlədən paytaxtların və birinci dərəcəli inzibati-ərazi vahidlərinin rəhbərləri.
7. Konkret fəaliyyətləri (ictimai çıxışları, qanunvericilik təşəbbüsləri və s.) geniş ictimaiyyətin diqqət mərkəzində olmuş (KİV-lərə istinadlarla təsdiq edilməlidir) və regionun, ölkənin, dünyanın həyatına əhəmiyyətli dərəcədə təsir göstərmiş beynəlxalq, ölkə, əyalət miqyaslı digər siyasi xadimlər.
8. Ölkədaxili və ya beynəlxalq miqyasda fəaliyyət göstərən kifayət qədər nüfuzlu siyasi, ictimai, qeyri-siyasi təşkilatların rəhbərləri və ictimai fəaliyyət baxımından fəal nümayəndələri (təşkilatın nüfuzu onun fəaliyyətinin sistemli şəkildə yüksək dərəcədə etibarlı mənbələrdə - ümummili KİV-lərdə, ensiklopediyalarda, elmi işlərdə və s. işıqlandırılması ilə müəyyənləşdirilir).
9. Fərdi şəkildə regionun, ölkənin, dünyanın həyatı üçün vacib hadisələrdə iştirak edən hüquq müdafiəçiləri, sülhməramlılar və digər şəxslər.
10. Dövlətlərin digər dövlətlərdə və beynəlxalq təşkilatlarda müstəqil diplomatik nümayəndliklərinin rəhbərləri, fövqəladə və səlahiyyətli səfir dərəcəsinə və ya analoji ali diplomatik dərəcəyə malik diplomatik nümayəndələr, habelə peşəkar fəaliyyəti beynəlxalq münasibətlərə əhəmiyyətli təsir göstərmiş digər diplomatlar.

İdmançılar

Burada "idman növü" dedikdə, Beynəlxalq Olimpiya Komitəsinin tanıdığı idman növləri, habelə beynəlxalq federasiya və/və ya milli federasiya(lar) (əgər konkret idman növü üzrə yarışların təşkili bir-biri ilə rəqabət aparan bir neçə federasiya tərəfindən də keçirilə bilər) tərəfindən vahid qaydalar əsasında keçirilən dayanıqlı yarış sisteminə malik olan digər idman növləri nəzərdə tutulur.

1. Olimpiya, Paraolimpiya oyunlarının, istənilən idman növü üzrə dünya, qitə, ölkə çempionatlarının və kuboklarının qalibləri və mükafatçıları.
2. İstənilən idman növü üzrə olimpiya, dünya, qitə və ölkə rekordçuları.
3. İstənilən idman növü üzrə ölkə milli komandalarının üzvləri.
4. Ən məşhur idman növləri üzrə əhəmiyyətli beynəlxalq yarışların iştirakçıları.
5. Ən məşhur idman növləri üzrə ölkələrin yüksək liqasında çıxış edən klubların üzvləri.
6. Yuxarıdakı şərtlərə cavab verən idmançıların məşqçiləri və komandaların baş məşqçiləri.
7. İdman tarixində adları ilə bu və ya digər əhəmiyyətli hadisələrin bağlı olduğu idmançılar.
8. Aparıcı idman funksionerləri (olimpiya komitələrinin, idmanın müxtəlif növləri üzrə milli və beynəlxalq federasiyaların rəhbərləri və s.), əhəmiyyətli idman tədbirlərinin təşkilatçıları, beynəlxalq səviyyədə tanınmış görkəmli idman hakimləri.
9. Məşhur idman həvəskarları.

Mədəniyyət və incəsənət xadimləri

Kütləvi mədəniyyət və incəsənət xadimləri

Kütləvi mədəniyyət və incəsənət xadimi dedikdə, onların xidmətləri və ya istedadları haqqında mütəxəssislər və digər şəxslərdə mənfi və ya müsbət rəyin olub olmamasından asılı olmayaraq, məşhur şou-biznes xadimləri, o cümlədən dəb industriyası və model biznesi və məşhur kütləvi incəsənət (kino, estrada musiqisi, kütləvi ədəbiyyat və s.)xadimləri və onlara uğur qazanmaqda kömək edən prodüserlər, promouterlər, mahnıların söz və musiqi müəllifləri nəzərdə tutulur. Bu zaman aşağıdakı məşhurluq meyarları tətbiq edilə bilər:

1. Kitab və disklərin tirajları, konsert və kinoprokatdan gələn gəlirlər və kommersiya uğurunun bu kimi digər göstəriciləri (o cümlədən, nüfuzlu təşkilatlar tərəfindən verilən status və mükafatlar).
2. Ən məşhur xit-parad, reytinq, siyahı və ictimai rəy sorğularında yerlər.
3. Kütləvi mədəniyyət və incəsənət xadiminin həyat və fəaliyyətinin ümummilli informasiya, peşəkar və əyləncəli dövri nəşrlərdə, ensiklopediyalarda, kütləvi tele və redioverilişlərdə ("Yeni ulduz" və bunun kimi karyerasına yeni başlayan və məşhur olmayan şəxslərin yetişdirilməsi ilə məşğul olan digər oxşar verilişlər istisna olmaqla)və nüfuzlu internet saytlarda dəfələrlə işıqlandırılması.

Pornoindustriyada fəaliyyət göstərən şəxslər bu bəndin tələblərinə cavab vermiş sayılmırlar.

Qeyri-kütləvi mədəniyyət və incəsənət xadimləri

Qeyri-kütləvi ("yüksək", ciddi və ya klassik) mədəniyyət və incəsənət xadimi dedikdə, geniş kütləyə məlum olub olmamasından asılı olmayaraq peşəkar ictimaiyyətdə sabit və ya təzadlı-qalmaqallı şöhrətə malik olan yazıçılar, ədəbi tərcüməçilər, musiqiçilər, aktyorlar, rejissorlar, rəssamlar, fotoqraflar, heykəltəraşlar və s., habelə qeyd edilən xadimlərlə işləyən naşirlər, redaktorlar, muzey əməkdaşları, tənqidçilər və s. nəzərdə tutulur. Şöhrətə malik olmanın sübutu kimi aşağıdakılar çıxış edə bilər:

1. Ən nüfuzlu və tanınmış peşə mükafatları, o cümlədən Nobel mükafatı, Pulitser mükafatı, Qonkur mükafatı, fəxri təqaüdlər, nüfuzlu akademiyalarda üzvlük və sair.
2. Qeyri-kütləvi mədəniyyət və incəsənət xadiminin fəaliyyət göstərdiyi sahədə mövcud olan ən nüfuzlu təsisatlar (məsələn, nəşriyyatlar, muzeylər, festivallar, universitetlər, dövri nəşrlər) tərəfindən dəstəklənməsi.
3. Fəaliyyət göstərdiyi sahədə nüfuza malik olan nəşrlərdə qeyri-kütləvi mədəniyyət və incəsənət xadiminin yaradıcılığına həsr edilmiş rəy və analitik materialların dərc edilməsi.
4. Qeyri-kütləvi mədəniyyət və incəsənət xadiminin, onun fəaliyyət göstərdiyi sahədə nüfuza malik olan mükafatları təltif edən jürinin (komissiyanın)üzvü seçilməsi.

Jurnalistlər

Jurnalist dedikdə, çap və elektron kütləvi informasiya vasitələrində dərc edilən xəbər, məqalə və analitik materialların müəllifləri, habelə televiziya və radio verilişlərin aparıcıları olan və aşağıdakı meyarlardan azı birinə cavab verən şəxslər nəzərdə tutulur:

1. Ən nüfuzlu ümummilli KİV-lərin (məsələn, AzTV, The New York Times, gazeta.ru və s.) aparıcı jurnalistləri, o cümlədən, ştatda olan köşə yazarları, daimi müxbirlər, populyar verilişlərin aparıcıları.
2. Vikipediya qaydalarına uyğun olaraq əhəmiyyətli sayılan KİVlərin baş redaktorları və bir neçə il bu vəzifəni tutmuş şəxslər.
3. Ən nüfuzlu peşə mükafatlarına (Pulitser mükafatı, Avropa Mətbuat Mükafatı, Dünya Qəzetlər Asossasiyasının Azadlığın Qızıl Qələmi mükafatı, UNESCO/Gilyermo Kano beynəlxalq mətbuat azadlığı mükafatı, Albert Londres Mükafatı və s.) layiq görülənlər.
4. Müstəqil nüfuzlu mənbələr tərəfindən peşəkar fəaliyyəti geniş işıqlandırılmış digər jurnalistlər.

Digər şəxslər

Bu kateqoriyaya ayrı-ayrı əsərləri (şer, rəsm, mahnı, memarlıq nümunələri və sair) sayəsində bu və ya digər səbəbdən dünyanın və ya ölkənin ictimai və ya mədəni həyatında əhəmiyyətli hadisəyə çevrilmiş şəxslər aid edilir (məsələn, cəmi bir roman müəllifi olan Harper Li).

Əlavə meyarlar

İstifadəçinin özü haqqında məqalə

Vikipediyada istifadəçinin özü və ya şəxsi münasibətləri olduğu şəxs (yaxın qohumlar, rəis və müdirlər, rəqiblər və s.) haqqında məqalə yaratması təqdirəlayiq hal sayılmır. Əgər siz özünüz və ya şəxsi münasibətləriniz olan şəxs haqqında Vikipediyada məqalə yaradılmasında maraqlısınızsa - öz adınızı və ya həmin şəxsin adını Vikipediya:Məqalə istə/Bioqrafiya səhifəsinə əlavə edin: bununla siz Vikipediya layihəsinin bütün iştirakçılarına bu məqaləni yaratmağı təklif etmiş olursunuz.

Axtarış sistemləri vasitəsilə yoxlama

Hər hansısa bir şəxsin əhəmiyyətlilik dərəcəsi ilə bağlı qərar verməmişdən əvvəl onun adını (adının bir neçə yazılış variantını) əsas iki-üç axtarış sistemində axtarmaq lazımdır: neçə keçid tapılır, bu keçidlərdə hansı növ informasiyalar yer alır? Hansısa bir şəxsin adının internetdə tez-tez xatırlanması hələ onun əhəmiyyətli şəxs olması (şəxs, məsələn, hansısa forumun daimi iştirakçısı da ola bilər) və ya adın internetdə yer almaması şəxsin əhəmiyyətli şəxs olmaması (insan fəaliyyətinin bütün sahələri haqqında dolğun məlumat hələ ki, internetdə tam əksini tapmayıb) demək deyil. Bununla belə, əksər hallarda şəxsin adının internet səhifələrində tez-tez xatırlanması yaxşı göstərici sayılır.

İkinci variant

Vikipediyada “məşhurluq” — məqalənin ensiklopedik yararlılığını müəyyən edən daxili meyardır. Məqalənin mətni “dəyərli” və ya “diqqətəlayiq” olmalıdır, yəni əhəmiyyətli, maraqlı və ya qeydə alınmaq üçün kifayət qədər qeyri-adi olmalıdır. “Tanınmış” və “populyar” anlamındakı “məşhur” ifadəsi heç də ikinci dərəcəli deyil.

Bioqrafiyalar üçün nəzərdə tutulmuş bu qaydalar Vikipediyanın siyasəti deyil, bu qaydaların tətbiqi şəxs haqqında məqalənin yazılması, birləşdirilməsi, silinməsi və ya genişləndirilməsi barədə qərarları ifadə edən, müzakirələr yolu ilə nail olunan və qəbul olunmuş praktika ilə təsdiqlənən konsensusdan asılıdır.

Bioqrafik məqalələri necə yazmaq barədə məlumat üçün Vikipediya:Yazı stili (şəxslər) və Vikipediya:Həyatda olan şəxslərin bioqrafiyası səhifələrinə müraciət edin.

Əsas meyar

Əgər şəxs haqqında etibarlı, müstəqil və predmetdən asılı olmayan ikinci dərəcəli mənbə mövcuddursa o məşhur hesab oluna bilər.

• Əgər mövzu kifayət qədər dərin əhatə edilmirsə onda, məşhurluğu sübut etmək üçün çoxsaylı müstəqil mənbəyə ehtiyac var.

• İlkin mənbə – məqalənin məzmununu dəstəkləmək üçün istifadə edilə bilər, lakin o mövzunun dəyərliliyini sübut etmir.

Əlavə meyarlar

Şəxs aşağıdakı şərtlərdən birinə uyğun gəlirsə o adətən “məşhur” hesab olunur. Lakin, bu şərtlərə uyğun gəlməmək şəxs haqqında məqalə yaradılmamalı olduğunun sübutu deyil, necə ki, bu şərtlərdən birinə və ya bir neçəsinə uyğun gəlmək şəxs haqqında məqalə yaradılması üçün zəmanət vermir.

Alimlər

Bir çox elm xadimləri, tədqiqatçılar, filosoflar və başqa alimlər (rahatlıq üçün ümumilikdə “alimlər” adlandıracağıq) öz ideya və ixtiraları ilə məşhurdurlar, onların həyatı isə ikinci dərəcəli mənbələrin mövzusudur.

• Elmlər doktorları ensiklopedik şəxs hesab edilirlər. Lakin məqalədə onların elmi fəaliyyətləri barədə məlumat yoxdursa və ya məqaləyə daxil edilən məlumatlar mötəbər mənbələrə söykənmirsə məqalənin silinməsi labüddür.
• Elm üzrə fəlsəfə doktorları (elmlər namizədləri) yalnız o halda ensiklopedik şəxs hesab edilə bilərlər ki, onların elmi fəaliyyətləri barədə, həmçinin, 10-dan artıq elmi məqaləsi və minimum 2 kitabı haqqında məlumat verilsin. Daxil edilən məlumatlar mötəbər mənbələrə söykənmirsə məqalənin silinməsi labüddür.

İdmançılar

1. Yüksək professional səviyyədə idman yarışlarında çıxış edən şəxslər.
2. Yüksək həvəskar səviyyədə idman yarışlarında çıxış edən şəxslər. Adətən, Olimpiya Oyunları və ya Dünya Çempionatlarında iştirak nəzərdə tutulur.

Yaradıcı mütəxəssislər

Alimlər, akademiklər, iqtisadçılar, professorlar, müəlliflər, redaktorlar, jurnalistlər, kinorejissorlar, fotoqraflar, rəssamlar, memarlar və digər yaradıcı mütəxəssislər aşağıdakı hallarda “məşhur” hesab olunurlar:

1. Şəxs vacib adam hesab olunur və ya öz həmkarları və ya davamçıları tərəfindən geniş şəkildə istinad edilir.
2. Şəxs yeni konsepsiya, nəzəriyyə, elmi yenilik və ya texniki üsulların yaradıcısı kimi tanınır.
3. Şəxs müstəqil kitabın, filmin və ya çoxsaylı dövri nəşrlərin mövzusunu təşkil etmiş əhəmiyyətli və ya məşhur bir işin icraçısı və icrasında iştirakçı olmuşdur.
4. Şəxsin işi əhəmiyyətli abidə, mühüm bir sərginin vacib hissəsi olmuş, tənqidçilərin diqqətini əhəmiyyətli dərəcədə cəlb etmiş, yaxud bir neçə məşhur muzey və ya qalereyanın daimi kolleksiyaları arasında təmsil olunmuş, yaxud işləri bir sıra məşhur kitabxanada yer almışdır.

Cinayətkarlar və cinayət qurbanları

Cinayət qurbanları

Hər bir cinayət qurbanı “məşhur” kimi dəyərləndirilə bilməz. Adətən cinayət qurbanı “məşhurluq” meyarına uyğun gələn hansısa məqalənin və ya cinayət hadisəsindən əvvəl yaradılmış məqalənin predmeti ola bilər. Lakin, əgər məşhurluğu göstərən başqa əlamətlər varsa şəxs haqqında məqalənin yaradılmasının qarşısı alınmamalıdır.

Məşhurluğu göstərən başqa əlamətlər dedikdə nəzərdə tutulur:

• Cinayət işi beynəlxalq səviyyədə törədilibsə
• Cinayətkar haqqında 3 və daha artıq beynəlxalq səviyyəli kütləvi informasiya vasitələrində (KİV) məlumat verilibsə

Cinayətkarlar

Hər bir cinayətkar “məşhur” kimi dəyərləndirilə bilməz. Bunun üçün o aşağıdakı şərtlərdən birinə uyğun gəlməlidir:

1. Cinayətkar yalnız törətdiyi cinayətə görə tanınmamalıdır. Məsələn, Fil Spektor.
2. Cinayətin hədəfi və ya qurbanı tanınmış insan və ya haqqında Vikipediya məqaləsi olan şəxs olmalıdır. Məsələn, Sərxan Sərxan, Qavrilo Prinsip.
3. Cinayətin motivi və ya icra forması qeyri-adi olmalı və ya cinayət tarixi fakt kimi diqqətəlayiq olmalıdır.

Diplomatlar

1. Haqqında etibarlı ikinci dərəcəli mənbələr olan xüsusi əhəmiyyətli hadisələrdə vacib rol oynamış diplomatlar.
2. Diplomatların xüsusi diplomatik əhəmiyyətə malik olan hadisələrdəki əhəmiyyətli rolu adətən kifayət qədər geniş şəkildə işıqlandırılmamasına baxmayaraq, onların rolunu təsdiq edən etibarlı mənbəyə istinad edilməsinə ehtiyac var.

Sənətçilər

Aktyorlar, gülüş ustaları, musiqiçilər, bəstəkarlar, müğənnilər, tənqidçilər, modellər, televiziya aparıcıları və s.:

1. Müxtəlif məşhur filmlərdə, teleşoularda, teatr tamaşalarında və ya digər sənət növlərində əsas rolları ifa etmişlər.
2. Böyük azarkeş qrupu və ya davamçıları var.
3. İncəsənətdə özünəməxsus, məhsuldar və ya yenilikçi töhfələri var.

Pornoqrafik aktyorlar

1. Kateqoriya:Pornoqrafik film mükafatları və ya Kateqoriya:Kino mükafatları kateqoriyasına daxil olan məşhur film mükafatına layiq görülmüşdür.
2. Müxtəlif illərdə məşhur mükafatlara namizəd göstərilmişdir.
3. “Playboy” jurnalının üz qabığında şəkli yayımlanıb.
4. Əsas media yayımlarında dəfələrlə haqqında danışılıb.
5. Pornoqrafiya janrında müxtəlif yeniliklər edib, məsələn, pornoqrafiyada yeni istiqamətin əsasını qoyub, həddən artıq məşhur filmdə oynayıb və ya Şərəf zalı tipli layihələrin iştirakçısıdır.

Siyasətçilər

1. Beynəlxalq, milli və ya birinci dərəcəli altmilli siyasi qurumların, o cümlədən qanunverici hakimiyyətin nümayəndələri və məhkəmə hakimləri.
2. Mətbuatda geniş işıqlandırılan əsas yerli siyasətçilər.
3. Yerli səviyyədə rəsmi şəxs və ya seçilməmiş “namizəd” olmaq məşhurluğa zəmanət vermir, lakin həmin şəxslər digər meyarlara görə məşhur hesab oluna bilərlər.

Yanlış meyar

• “A” şəxsinin çox məşhur olan “B” şəxsi ilə əlaqəyə malik olması, məsələn, onun həyat yoldaşı olması “A” şəxsi haqqında məqalə yaradılması üçün kifayət deyil. “A” haqqında məlumat “B” məqaləsində ayrıca başlıq altında verilə bilər. Məsələn, ingilis vikipediyasında Bruklin Bekxem və Ceyson Allen Aleksandr haqqında məlumat müvafiq olaraq Devid Bekxem və Britni Spirs haqqındakı məqalələrdə verilib və onların adı axtarış zamanı bu məqalələrə yönəldilir.
• Axtarış saytlarının çıxardığı statistik göstəriciləri və şəkilləri istifadə etməkdən çəkinin. Çünki, bu saytlar linklərin faydalılığını tam əks etdirə bilmirlər.

Bütün meyarlar üzrə uyğunsuzluq

Əgər məqalə və ya hansısa məqalənin bölməsi bu qaydaların heç bir meyarına uyğun gəlmirsə və əgər onu təkmilləşdirmək üçün heç bir cəhd edilməyibsə və yaxud kifayət səviyyədə olmayıbsa onda məqaləni və ya bölməni silməyin 3 metodu var:

• Əgər Dərhal silmə meyarlarına uyğun gəlirsə "Şablon:Dərhal sil" şablonunu istifadə edin;
• Dərhal silmə meyarlarına uyğun gəlməyən, lakin silinməyə mübahisəsiz namizəd olan məqalələr üçün {{ts}} şablonunu tətbiq edin. Bu şablon Silmə təklifi qaydalarına uyğun olaraq, əgər heç kim etiraz etməzsə məqalənin və ya bölmənin 7 gün sonra silinməsini nəzərdə tutur;
• Silinməsinə tərəddüd etdiyiniz və ya başqalarının etiraz edə biləcəyini düşündüyünüz hallarda {{ms}} şablonunu tətbiq edin. Bu Silinməyə çıxarılmış məqalələr qaydalarına uyğun olaraq 7 gün ərzində silinmə səbəblərinin müzakirəsini nəzərdə tutur.

Xüsusi hallar

Əsas meyara uyğunsuz olub, ikinci dərəcəli meyara uyğun gəlmə

Əgər məqalə ilə bağlı həm qaneedici izah, həm də müvafiq mənbə tapılmırsa, lakin şəxs əlavə meyarlardan birinə və ya bir neçəsinə uyğun gəlirsə:

• Məqaləni mövzu ilə bağlı daha əhatəli məqaləyə birləşdirin.
• Məqaləyə {{birləşdir}} şablonunu yerləşdirin və mövcud məqaləni birləşdirmək istədiyiniz məqalənin adını yazın.
• Əgər hazırda birləşdirilməsi mümkün olan məqalə mövcud deyilsə, onda məqaləni özünüz yaradın və ya Vikipediya:Məqalə istə səhifəsində digər istifadəçilərin diqqətini çəkmək üçün istədiyiniz məqalənin adını qeyd edin.

Mövzunun əhəmiyyətliliyini izah etmədə çətinlik

Əgər məqalə aid olduğu mövzunu tam izah etmirsə, onda onu inkişaf etdirmək üçün:

• Özünüz yenidən yazın;
• Məqalənin müəllifi ilə məsləhətləşin.

Mənbə çatışmazlığı

Əgər məqalədə kifayət qədər mənbə yoxdursa:

• Mənbəni özünüz tapın.
• Məqalənin müəllifindən və ya redaktorundan mənbəni haradan tapa biləcəyinizi öyrənin.
• Digər istifadəçiləri mənbə çatışmazlığı barədə xəbərdar etmək üçün {{mənbəsiz}} şablonunu istifadə edin.
• Əgər məqalə ixtisaslaşmış sahə üzrədirsə, o zaman məqaləyə {{expert-subject}} şablonunu yerləşdirin. Bu şablon internetdə yerləşdirilməyən informasiyalara çıxışı olan mütəxəssislərin diqqətini cəlb etmək üçündür.

Bir hadisəyə görə məşhur olan şəxslər

Əgər şəxs hər hansı konkret hadisədə əhəmiyyətli rola malikdirsə məqalənin şəxs, hadisə, yoxsa hər ikisi haqqında yazılması qeyri-müəyyən ola bilər. Ayrı-ayrı məqalələr yaratmaq barədə qərar verərkən həm hadisənin əhəmiyyətlilik dərəcəsini, həm də şəxsin bu hadisədə oynadığı rolun dərəcəsini qiymətləndirmək vacibdir. Əksər hallarda ümumi qayda hadisənin işıqlandırılmasından ibarətdir, şəxsin yox. Lakin, həm hadisənin, həm də şəxsin ondakı rolunun əhəmiyyəti artıqda ayrı-ayrı məqalələrin yaradılması əsaslıdır.

Əgər hadisə çox əhəmiyyətlidirsə və şəxsin ondakı rolu çox yüksəkdirsə ayrı-ayrı məqalələr tamamilə labüddür. Əsas siyasi rəhbərlərin qatilləri, məsələn, Qavrilo Prinsip – bu kateqoriyaya uyğundur.

Şəxsin hadisədə oynadığı rol az əhəmiyyətə malik olduqda hər ikisi haqqında məqaləyə ehtiyac olmaya bilər və yönləndirmə funksiyası daha münasibdir. Digər tərəfdən, əgər hadisə xüsusi əhəmiyyətə malikdirsə, onda hadisənin nisbətən az əhəmiyyətə malik olan iştirakçıları haqqında da ayrıca məqalələrə ehtiyac ola bilər.

Digər bir problem şəxsin az əhəmiyyətə malik olan hadisədə əsas rola malik olduğu hallardır. Bu hallarda ayrı-ayrı məqalələrə ehtiyac yoxdur və şəxsin adı hadisə haqqındakı məqaləyə yönləndirilməlidir. Bəzi hallarda isə bir hadisəyə görə məşhur olan şəxs, həmin hadisənin özündən daha populyar ola bilər. Bu hallarda hadisə haqqındakı məlumat həmin şəxs haqqında yaradılan məqalədə verilə bilər.

Şəxslərin siyahısı

Bir çox məqalələrdə şəxslərin siyahısı qeyd olunur və ya ayrıca siyahı səhifələri yaradılır. Şəxslərin həmin siyahılara daxil edilmə meyarları bu qaydalara uyğun olmalıdır. Bundan əlavə, bu tip siyahılara daxil edilə bilmək üçün həmin şəxslərin həqiqətən də sözügedən siyahıya daxil olduğunu təsdiq edən etibarlı mənbə göstərilməlidir.

Ailə

Heç kim yalnız məşhur şəxslə qohumluq əlaqəsinə malik olduğu üçün məşhur hesab edilə bilməz.

Vikipediyaçılar haqqında məqalələr

Bəzi Vikipediyaçılar özləri haqqında məqalə yaratmışlar (bax. Wikipedia:Wikipedians with articles). Lakin, həmin məqalənin şəxsin Vikipediyada iştirakından əvvəl və ya sonra yaradılmasından asılı olmayaraq, məşhurluq həmin şəxslərin Vikipediya iştirakçısı olmaları ilə əlaqəli olmamalıdır. Bu məqalələrin mətnləri Vikipediya qaydalarına uyğun şəkildə qiymətləndirilməlidir.

---