Vikipediya:Kateqoriyalaşdırma

Bu səhifə Vikipediya kateqoriyalaşdırma funksiyasından istifadə üçün təlimat xarakteri daşıyır. Funksiyanın mexanizmi üçün Kömək:Kateqoriya səhifəsinə baxın. Hər hansı kateqoriyaların qarışıq kateqoriyalaşdırılması zamanı və ya kütləvi şəkildə yeni kateqoriyalar yaradarkən bu səhifəyə baxın.

Kateqoriya sisteminin əsas məqsədi kateqoriyaların iyerarxiyası ilə Vikipediya səhifələrinə naviqasiya keçidləri təmin etməkdir. Bununla mövzu barədə müəyyən xarakteristikaları bilən oxucu həmin mövzuya aid səhifələr toplusunu tez tapa bilər.

Lakin kateqoriyalar istifadəçilərə əlaqəli səhifələri tapmağa kömək edən yeganə vasitə deyil. Siyahılar və naviqasiya qutuları da bənzər funksiyaya malikdir.

Adlandırma

Kateqoriyanı adlandırarkən diqqətli olmalı və düzgün adı seçmək lazımdır. Hansısa kateqoriyanın adını dəyişərkən ona daxil olan səhifələri və altkateqoriyalarında da dəyişiklik etmək lazımdır.

Ümumi müddəalar

• Məqalə adlarına tətbiq olunan adlandırma kateqoriyalara da aiddir. Ümumi isimlər (başlığın əvvəlindəki istisna olmaqla) böyük hərflə yazılmır.
• Mövzu kateqoriyaları tək halda olmalıdır. Məsələn: "Hüquq", "Fransa", "Donald Tramp".
• Qrup kateqoriyaları cəm halda olmalıdır. Məsələn: "Yaponiya şəhərləri", "Yazıçılar".
• Qısaltmalardan qaçınmaq lazımdır. Məsələn: "Azərbaycan Respublikası" əvəzinə, "AR" adlandırılmamalıdır. Lakin ABŞ, NATO kimi geniş istifadə olunan və qəbul olunmuş qısaltmalar istifadə oluna bilər.
• Adlarda kateqoriya strukturu yazmayın. Məsələn, "Şəxslər - Monarxlar" yox, sadəcə "Monarxlar" olmalıdır.
• Unikal, digər kateqoriyalarla bağlana biləcək adlar seçin. Məsələn, "Geologiya terminləri qaralamaları" olmalıdır, təkcə "Terminologiya" yox.
• Adlarda "məşhur", "əhəmiyyətli", "görkəmli" kimi nisbi sifətlərdən qaçının.
• Texniki mövzular üçün etibarlı mənbələrdən istifadə edin.

Xüsusi müddəalar

• Mövzu kateqoriyaları və qrup kateqoriyaları bənzər adlara sahibdir. Lakin Mövzu kateqoriyalarının adları təkdə, qrup kateqoriyalarının adları isə cəmdə olur. Məsələn, "Opera" mövzu kateqoriyası, "Operalar" qrup kateqoriyasıdır. Məqalələri kateqoriyalaşdırarkən mövzu və ya qrup kateqoriyasına daxil edilmə zamanı diqqətli olmaq lazımdır.
• Əgər hansısa mövzu üzrə çoxlu siyahı varsa, onları eyni kateqoriya altında toplamaq olar. Məsələn, "Ölkə siyahıları". Siyahı kateqoriyalarına ancaq siyahılar daxil edilə bilər. "Siyahılar:Ölkə" kimi adlandırmadan istifadə etməyin.
• Şablon kateqoriyaları üçün "Kateqoriya:Şablonlar:Nümunə", naviqasiya şablonları üçün "Kateqoriya:Naviqasiya şablonları:Nümunə", şablon-kartoçkalar üçün "Kateqoriya:Şablon-kartoçkalar:Nümunə" adlandırmasından istifadə edin. Eləcə də, VikiLayihə kateqoriyaları üçün kateqoriyanın başlığının əvvəlində mütləq "VikiLayihə" sözü işlədilməlidir, lakin VikiLayihənin məqalə qiymətləndirmə kateqoriyalarında bu şərt vacib deyil.
• Vikipediya adlar fazasında olan səhifələr üçün "Kateqoriya:Vikipediya:Nümunə" adından istifadə edin. Lakin məzmun kateqoriyaları ilə qarışdırılmamalıdır. Məsələn, "Kateqoriya:Alətlər" kateqoriyası məzmun, "Kateqoriya:Vikipediya:Alətlər" vikipediya alətləri ilə bağlı kateqoriyadır.
• İstifadəçi ad fazasında olan kateqoriyalar üçün "Kateqoriya:İstifadəçi:Nümunə", şəkil ad fazasında olan kateqoriyalar üçün "Kateqoriya:Şəkillər:Nümunə" adından istifadə olunmalıdır.