Kəpəz TV

Kəpəz TV
Ölkə	Azərbaycan
Yayım ərazisi	Gəncə
Dil	Azərbaycan dili
Baş qərargah	C. Rəfibəyli küçəsi 66 Gəncə, Azərbaycan
Yaranma tarixi	6 may 1994
Rəhbərlik	Fuad Cabbarov
Keçmiş adları	ARB Kəpəz (19 sentyabr 2016 - 3 mart 2019)
Şüar	Zirvənin fəthi
Qardaş kanallar	ARB Kəpəz FM ARB Ulduz ARB Şimal ARB Cənub ARB Şəki ARB Aran ARB 24 ARB Günəş
Sayt	www.kepeztv.az

Kəpəz TV — 1994-cü ildə Gəncə şəhərində Əsgərov Rüfət Razim oğlu tərəfindən yaradılmışdır.

Tarixi

"Kəpəz Müstəqil Teleradio Şirkəti" 1993-cü ildə Əsgərov Rüfət Razim oğlı tərəfindən yaradılıb və Gəncə şəhərində 6-cı kanalla yayımlanıb. 2002-ci ildə 46 kanalda yayımı davam edib.

2008-ci ilin iyunun 4-də "Kəpəz TV"-də yeni dövr başlanıb. Təşkilati-hüquqi forması dəyişdirilən televiziyaya yeni kadrlar cəlb olundu, yeni verilişlər hazırlandı. Bu gün “Kəpəz”in efirində cəmiyyətdə aktuallığını saxlayan mövzularla yanaşı, mədəniyyət və tariximizlə bağlı maarifləndirici xarakterli verilişlər də yayımlanır.

Hazırda 24 saat efirdə olmaqla telekanalda 20-dən artıq veriliş yayımlanır. “Bu səhər” informasiya kanalı, “Tac şou” əyləncəli veriliş, “Piyada” intellektual proqramı, “Zirvə” bilik yarışı, “Duyğulu könüllər” kimi verilişlər tamaşaçıların ixtiyarındadır. Xəbərlər Xidmətinin istehsalı olan “Kəpəz xəbər”, “İdman xətti”, “Kapital”, “Aqronom”, “Hadisə”, “Bu həftə” isə birbaşa insanların informasiya tələbatını ödəməyə xidmət edir.

Televiziyanın nəzdində Dublyaj redaksiyası da fəaliyyət göstərir ki, bununla da ən son kinoların, cizgi və sənədli filmlərin öz ana dilimizdə səsləndirilməsi həyata keçirilir.

2009-cu ilin 4 iyun tarixindən etibarən telekanalın www.kepeztv.az saytı da istifadəyə verilib ki, izləyicilər həmin vebsayta daxil olaraq istədikləri verilişləri izləyə bilərlər.

2008-ci ildən başlanan və tamaşaçıların da çoxdan gözlədiyi dəyişikliklərin davamı olaraq Kəpəz televiziyası üçün yeni bina inşa edildi, 2012-ci ilin sentyabr ayından istifadəyə verilən möhtəşəm binada fəaliyyətinə davam edən "Kəpəz TV" ən müasir televiziya avadanlıqları ilə təchiz olunub və “Cinegy” texnologiyası əsasında Azərbaycanda ən böyük avtomatlaşdırılmış yayım sisteminə malikdir.

Televiziyada çalışanların sayı isə 220-dən artıqdır və onların burada keyfiyyətli iş ortaya qoyması üçün hər cür şərait yaradılıb. İşçilər peşəkarlıq səviyyəsinin daha da artırılması məqsədi ilə tez-tez müxtəlif seminar və kurslarda iştirak edir, Türkiyə, İngiltərə, Almaniya kimi xarici ölkələrdə təcrübə keçirlər.

Əhatə dairəsini də genişləndirən "Kəpəz" Televiziyası, 2015-ci ilin mart ayından etibarən Qərb bölgəsində analoq yayımından tam olaraq rəqəmsal yayıma keçib. Rəqəmsal yayımda Gəncə şəhəri və ətraf rayonlarda 24-cü kanalda, Qazax, Tovuz və Ağstafa rayonlarında isə 56-cı kanalda və Tovuz şəhərində 36-cı kanalda Kəpəz televiziyasını izləmək mümkündür.

"Kəpəz TV" MTRŞ MMC-də daha bir yenilik isə 93.3 MHz tezliyində Kəpəz FM-in istifadəyə verilməsi oldu. 2013-cü ilin fevral ayından yayımına başlayan regionun ilk radiosu bu gün kifayət qədər dinləyici auditoriyasına malikdir. Eyni zamanda radionun www.kepezfm.az saytı da istifadəçilərin ixtiyarına verilib.

Böyük inkişaf yolu keçən “Kəpəz” Müstəqil Teleradio Şirkəti 2014-cü ilin mart ayının 14-də bölgələrdə yerləşən digər 5 televiziya ilə birləşərək (ARB Şimal (Xaçmaz), ARB Cənub (Lənkəran), ARB Aran (Yevlax), ARB Şəki (Şəki) və ARB 24-ün (Tovuz) Milli Teleradio Şurasının keçirdiyi tenderdə iştirak edib. Nəticələrə əsasən Azərbaycan üzrə yayım hüququ əldə olunaraq Region TV-nin yaradılmasına nail olundu. "ARB" 2014-cü ilin may ayından ümumrespublika yayımına başlayıb. Televiziya Bakı və Abşeron yarımadası ərazisində 37-ci tezlikdə (11 sektor) yayımlanır. ARB-nin yayım mərkəzi Kəpəz TV-in bazasında yaradılıb və Gəncə şəhərində yerləşir. Açıq yayımla yanaşı Region TV Azərbaycanın ilk peyki olan AzerSpace1-in Avropa seqmentində, kabel tv-lər, həmçinin internet vasitəsilə də yayımlanır. “ARB” günə “Kəpəz TV” televiziyasının istehsalı olan “Bu səhər” canlı informasiya proqramı ilə başlayır. “Kəpəz TV”dən bu veriliş də olmaqla 14 proqram ARB-nin tamaşaçılarına təqdim olunur.

19 sentyabr 2016-cı il tarixində "Kəpəz TV" olan telekanalın adı dəyişdirələrək "ARB Kəpəz" olmuşdur.

4 mart 2019-cu il tarixində "ARB Kəpəz" olan telekanalın adı dəyişdirilərək yenidən "Kəpəz TV" olmuşdur.

Xarici keçidlər

• Kəpəz TV | Web səhifəsi
• Kəpəz TV | Facebook səhifəsi
• Kəpəz TV | YouTube kanalı
• Kəpəz TV | Canlı Yayım