Zemfira Əliyeva (aktrisa)

Zemfira Əliyeva
Doğum tarixi	25 dekabr 1941(1941-12-25)
Doğum yeri	Kirovabad, Azərbaycan SSR, SSRİ
Vəfat tarixi	16 noyabr 1995(1995-11-16) (53 yaşında)
Vəfat yeri	Bakı, Azərbaycan
Həyat yoldaşı	Vaqif Əsədov
Anası	Firuzə Bədirbəyli
Fəaliyyəti	aktrisa

Zemfira Əliyeva — Azərbaycan aktrisası.

Həyatı

Zemfira xanım 25 dekabr 1941-ci ildə Gəncə şəhərində doğulub. Anası Firuzə Bədirbəyli Gəncə DDT-nin aktrisası olub. Kiçik yaşlarından teatrın tamaşalarında uşaq rollarını oynayıb. İstedadı, ehtiraslı və emosional ifadə vasitələri erkən formalaşdığı üçün 17 yaşında ona Cəfər Cabbarlının "Solğun çiçəklər" melodramasında Sara rolu tapşırılıb. Gənc aktrisa gözlənildiyindən çox uğur qazınıb. Bundan sonra aktrisa teatra götürülüb və qısa müddətdə Səməd Vurğunun "Vaqif" (Gülnar), Viktor Rozovun "Sabahın xeyir" (Liza), Evripidin "Medeya" (Medeya), Əfqan Əsgərovun "Qız atası" (Məryəm) əsərlərinin tamaşalarında mürəkkəb rollar oynayıb, "Böyük dayaq" filmində Pərişan obrazına çəkilib. Zemfira Məmmədəli qızı Əliyeva 1972-ci ildə Naxçıvan DMDT-nin truppasına daxil olub. Bu teatrda qazandığı sənətkarlıq nailiyyətlərinə görə 1 iyun 1974-cü ildə Azərbaycan Respublikasının əməkdar artisti və 1 dekabr 1982-ci ildə xalq artisti fəxri adları ilə təltif edilib. Aktrisa 1988-1995-ci illərdə Akademik Milli Dram Teatrında işləyib. 16 noyabr 1995-ci ildə Bakıda vəfat edib. Füsunkar səhnə görkəmi, məlahətli danışığı, zəngin və əlvan ifadə vasitələri, coşqun daxili ehtirası vardı. Bu yaradıcılıq keyfiyyətləri aktrisanın yaratdığı səhnə surətlərinə xüsusi emosional təravət, psixoloji dərinlik və fəlsəfi bütövlük verirdi. Zemfira Əliyevanın Naxçıvan teatrında ifa etdiyi baş rolların yığcam siyahısını belə ümumiləşdirmək mümkündür: Almaz, Sara, Firəngiz, Yaqut ("Almaz", "Solğun çiçəklər", "Oqtay Eloğlu" və "Yaşar", Cəfər Cabbarlı), Səlma, Roza, Xumar, Anjel ("Ana", "Şeyda", "Şeyx Sənan" və "Uçurum", Hüseyn Cavid), Sona ("Hacı Qara", Mirzə Fətəli Axundzadə), Reyhan ("Yağışdan sonra", Bəxtiyar Vahabzadə), Maral ("Sənsiz", Şıxəli Qurbanov), Mədinə, Azadə ("Mənim nəğməkar bibim" və "Bir cüt bədmüşk ağacı", Əkrəm Əylisli), Pırpız Sona ("Dəli yığıncağı", Cəlil Məmmədquluzadə), Zinyət ("Toy", Sabit Rəhman), Söylü ("Bəxt üzüyü", Vaqif Səmədoğlu ,) Nərmin, Anjel ("Unuda bilmirəm" və "Məhv olmuş gündəliklər", İlyas Əfəndiyev), Kleya ("Tülkü və üzüm", Gilerma Fiqeyredu), Pəricahan və Zöhrə ("Laçın yuvası" və "Eşq və intiqam", Süleyman Sani Axundov), Zəhra ("Bayramın birinci günü", Nazim Hikmət), Elektra ("Elektra", Sofoki), Dilbər ("Yenə o bağ olaydı...", Mlkayıl Müşfiqin şeirləri əsasında bədii kompozisiya), Vəfa ("Siz xoşbəxt yaşayın", Əlyar Yusifli). Televiziya tamaşalarında ("Yad qızı", Orxan Kamal; "Manas" və s.) da yaddaqalan obrazlar yaratmışdır. "Azərbaycanfilm"in "Böyük dayaq", "Pəncərə", çoxserialı "İtkin gəlin" filmlərində çəkilmişdir. Xalq artisti , rejissor Vaqif Əsədovun həyat yoldaşı olub.

Mükafatları

• Azərbaycan SSR xalq artisti — 01.12.1982

Filmoqrafiya

1. Böyük dayaq (film, 1962)
2. Doğma sahillər (film, 1989)
3. Gedərsən bizə... (film, 1990)
4. Yad qızı (film, 1990)
5. Qəzəlxan (film, 1991)
6. Pəncərə (film, 1991)
7. Mənim ağ şəhərim (film, 1993)
8. İtkin gəlin (film, 1994)
9. Yurd yeri (film, 1994)
10. Güllələnmə təxirə salınır!... (film, 2002)

Həmçinin bax

Portal:Azərbaycan Kinosu

Xarici keçid

Videolar

İzlə