Süleyman Rəhimov

Süleyman Rəhimov
Süleyman Hüseyn oğlu Rəhimov
Doğum tarixi	9 (22) mart 1900
Doğum yeri	Əyin, Zəngəzur qəzası, Yelizavetpol quberniyası, Rusiya İmperiyası
Vəfat tarixi	11 oktyabr 1983(1983-10-11) (83 yaşında)
Vəfat yeri	Bakı, Azərbaycan SSR, SSRİ
Dəfn yeri	Fəxri Xiyaban
Uşaqları	oğulları: Oqtay, Şamo, Arif, Aqil qızları: Şəfiqə, Rəfiqə
Təhsili	Bakı Dövlət Universiteti
Fəaliyyəti	yazıçı, siyasətçi
Fəaliyyət illəri	1930–1983
Əsərlərinin dili	Azərbaycan dili
Janrlar	nəsr, publisistika, poeziya
Mükafatları

Süleyman Hüseyn oğlu Rəhimov (9 (22) mart 1900, Əyin, Zəngəzur qəzası – 11 oktyabr 1983, Bakı) — Azərbaycan-sovet yazıçısı, nasiri, siyasətçisi, 1938-ci ildən Azərbaycan Yazıçılar Birliyinin üzvü, Azərbaycan SSR xalq yazıçısı (1960), Sosialist Əməyi Qəhrəmanı (1975).

Həyatı

Süleyman Rəhimov 1900-cü ilin 22 martında Zəngəzur mahalının (hazırkı Qubadlı rayonu) Əyin kəndində anadan olmuşdur. İbtidai təhsilini ikisinifli rus məktəbində almışdır. İlk təhsilini kənddə almış, sonralar texnikum və ali məktəb bitirmişdir. 1921-ci ildə Xanlıq kəndində yeni açılmış məktəbdə müəllim işləməyə başlamışdır. Şuşada pedaqoji kursda oxuduqdan sonra uzun müddət Zəngəzur mahalının müxtəlif rayonlarında müəllimlik etmişdir.

1928-ci ilin payızında dostu Əli Vəliyevlə Bakıya gələrək Azərbaycan Dövlət Universitetinin tarix fakültəsində təhsil almış, eyni zamanda Qaraşəhərdə ikinövbəli savad kursunda yaşlı fəhlələrə dərs demişdir.

Ədəbi fəaliyyətə 1930-cu ildən başlayan Süleyman Rəhimovun ilk əsəri "Şamo"dur. Bununla belə o 50 il bu əsərinin üzərində işləmiş və ona əlavələr etmişdir. Onun ən tanınmış əsərlərindən biri də "Qara torpaq və sarı qızıl"dır. İndi bu əsər 5-ci sinif ədəbiyyatlarda istifadə olunur.

Süleyman Rəhimov 1939–1940, 1944–1946 və 1954–1958-ci illərdə Azərbaycan Yazıçılar Birliyinin sədri olmuşdur. Azərbaycanın Laçın, Samux, Şahbuz və Noraşen rayonlarında rəhbər partiya işlərində çalışmışdır (1934–1937). Azərbaycan K(b)P Bakı şəhər komitəsində təbliğat üzrə katib (1940–1941), Azərbaycan K(b)P MK-da təbliğat və təşviqat şöbəsinin müdir müavini (1941–1944), Azərbaycan Nazirlər Soveti yanında Mədəni-Maarif İşləri Komitəsinin sədri (1945–1958) vəzifələrində işləmişdir.

1983-cü il oktyabrın 11-də vəfat etmiş, Fəxri xiyabanda dəfn olunmuşdur.

Ailəsi

• Yazıçı Şamo Arifin atasıdır.
• Seysmoloq Şamo Rəhimovun atasıdır.

Mükafatları

• "Şərəf Nişanı" ordeni — 6 fevral 1942
• "Qırmızı Əmək Bayrağı" ordeni — 9 iyun 1959
• "Azərbaycan SSR xalq yazıçısı" fəxri adı — 1960
• "Qızıl qələm" mükafatı — 1972
• 3 dəfə "Lenin" ordeni — 25 fevral 1946; 20 mart 1970; 4 dekabr 1975
• Sosialist Əməyi Qəhrəmanı — 4 dekabr 1975
• "Xalqlar Dostluğu" ordeni — 5 mart 1980

Əsərləri

• Süleyman Rəhimov. Seçilmiş əsərləri. İki cilddə. I cild. Bakı, "Şərq-Qərb", 2005, 288 səh.
• Süleyman Rəhimov. Seçilmiş əsərləri. İki cilddə. II cild. Bakı, "Şərq-Qərb", 2005, 312 səh.

Filmoqrafiya

• Qanun naminə (film, 1968)
• Ayrıldıq ki, qovuşaq

Xarici keçidlər

• "Qarabağın görkəmli şəxsiyyətləri:Süleyman Rəhimov (1900-1983)". "Virtual Qarabağ" İKT Mərkəzinin rəsmi portalı (az.). virtualkarabakh.az. 2013. İstifadə tarixi: 2014-10-14.

Həmçinin bax

• Şamo (roman)