Korrupsiya

Korrupsiya - dövlətin hər hansı qurumunda çalışan və ona etibar edilərək verilmiş səlahiyyətdən şəxsi mənfəəti üçün istifadə etmə halları adlanır. Bu termin əsasən bürokratik aparat və siyasi elita ilə bağlı işlənir.

Qurani-Kərimdə bu haqda buyurulur: "Bir-birinizin mallarını haqqınız olmadığı halda yeməyin. Xalqın malının bir qismini (onun sizə haram olduğunu) bilə-bilə günah yolu ilə yeməyiniz üçün onu (malınızı) hakimlərə (rüşvət) verməyin!" (Bəqərə surəsi, 188)

Adətən, əhalimizin əksəriyyəti korrupsiyanı məmurlara rüşvət verilməsi və ya məmurların rüşvət alması kimi başa düşür. Bəziləri korrupsiyanı oğurluq, dövlət pulunun və ya malının mənimsənilməsi və ya fərdin tutduğu vəzifəsindən şəxsi mənfəəti üçün sui-istifadə etməsi kimi təsəvvür edirlər.

Korrupsiya rüşvətxorluq, hədə ilə pul almaq, və satqınlıq kimi izah edilməkdədir. Rüşvət təkcə alan üçün yox, verən və vasitəçilik edən üçün də haramdır.

Rüşvətin dövlət qurumlarına və xüsusilə də məhkəmələrə girməsi çox ağır bir cinayətdir. Peyğəmbərimiz (s): "Rüşvəti alana da verənə də Allah lənət etsin." (Tirmizi, Əhkam, 9)-deyə qarğış etmişdir, Bir dövlət məmurunun rüşvət alıb haqsız hökm verməsi, çox murdar bir əməldir. Dövlət məmuru öz vəzifə borcunu yerinə yetirməyə borcludur. Hətta dövlət məmurlarının hədiyyə alması da dinimizdə haramdır. Peyğəmbərimiz (s) bir məmuru zəkat yığmağa göndərmişdi, o da qayıdanda Peyğəmbərə (s): "Bu sizindir, bu da mənə verilən hədiyyədir"-demişdi. Pəyğəmbər (s) qəzəblənmiş və ona belə cavab vermişdi: "Sən evində otursan sənə hədiyyə verən olar ya yox" (Müslim). Bununla da O, demək istəmişdir ki, məmura ancaq və ancaq rüşvət niyyəti ilə hədiyyə verilə bilər. Bu isə haramdır.