Yasif Kərimov adına Yeni Daşkənd kənd tam orta məktəbi

Vikipediya, açıq ensiklopediya
Jump to navigation Jump to search
Picto infobox université.png
Yeni Daşkənd kənd orta məktəbi
Yeni Daşkənd məktəbi.jpg
Əsası qoyulub 1953-cü il
Direktor Elgün Qocamanov
Şəhər Bərdə
Ölkə Flag of Azerbaijan.svg Azərbaycan
Ünvan AZ-0943, Yeni Daşkənd, Bərdə rayonu
Tel:(+99420)205-83-24

Yasif Kərimov adına Yeni Daşkənd kənd tam orta məktəb[1] — Azərbaycan Respublikasının Bərdə rayonunun Yeni Daşkənd kəndində ümumi təhsil müəssisəsi.

Haqqında[redaktə | əsas redaktə]

1953-cü ildə Bərdə rayonu Yeni Daşkənd kənd orta məktəbi kimi fəaliyyətə başlamışdır. Ətrafdakı 15-ə qədər kənddə tam orta məktəb olmadığından və yeni təşkil olunan bu kənddə ali təhsilli müəllimlərin çoxluğuna görə 1953/1954-cü tədris ilində burada tam orta məktəb açılmışdır. Bu sahədə ən böyük təşəbbüskar və fədakar fəaliyyət göstərən Əliyev Tapdıq Xıdır oğlu olmuşdur. Elə o özü də məktəbin ilk direktoru olmuşdur. İlk tədris ilində kənd sakinlərinin əməyi ilə palçıq-saman qarışığından hazırlanan kərpicdən beş sinif otağı inşa edilmişdir. Hətta sinif çatışmazlığı olduğundan məktəbə yaxın olan 4-5 evdə də (Mustafanın, İbrahimin, Məhərrəmin) dərslər keçirilmişdir. Məktəbdə Bərdə rayonunun Şatırlı, Kürdborakı, Çəmənli, İmamqulubəyli, Zümürxan eləcə də Tərtər çayının sağ sahilində yerləşən Qasımbəyli, Körpüqıran, Muğanlı kəndlərindən Tərtər rayonunun isə Sarıcalı, Kürdlər həmçinin Ağdam rayonunun kəndlərindən məktəblilər tam orta təhsil almışlar. Məktəb regionda yaxşı məktəb kimi ad-san çıxarmışdır. Beləki məktəbdə digər rayonların məktəbliləri ilə yanaşı Göyçə mahalının Daşkənd, Aşağı və Yuxarı Şorca kəndlərindən də uşaqlar gələrək təhsil almış, ali məktəblərə qəbul olmuşlar.

Yeni Daşkənd kənd tam orta məktəbinə adı verilən şəhid Yasif Kərimov

Məktəb 1992-ci ildən Qarabağ müharibəsində 22 avqust 1992-ci ildə şəhid olmuş həmin məktəbin məzunu Yasif Kərimovun adını daşıyır.

Yasıf Kərimov adına Yeni Daşkənd kənd tam orta məktəbi[2] Yeni Daşkənd kənd inzibati ərazi vahidində yerləşir[3]. Məktəb 419 şagird və 60 nəfərlik müəllim heyyətinə malikdir.

Məktəbin komsomol təşkilat katibi 1988-1989-cu illərdə Piriyeva Laçın Məzahim qızı, 1989-1990-cı illərdə isə Hacıyev Araz Yaqub oğlu olmuşdur.

Heydər Əliyev Fondunun təşəbbüsü ilə 2006-cı ildə[4][5][6] Fondun həyata keçirdiyi "Yeniləşən Azərbaycana yeni məktəb" Proqramına uyğun olaraq, Bərdə rayonunun Yeni Daşkəndində 240 yerlik təzə orta məktəb binası tikilmişdir[7]. 2 mart 2006-cı ildə Heydər Əliyev Fondunun prezidenti Mehriban xanım Əliyeva Bərdə rayonunun Yeni Daşkənd kəndinə gəlmişdir. Şəhid Yasif Kərimovun adını daşıyan 240 yerlik kənd məktəbi Heydər Əliyev Fondunun təşəbbüsü ilə inşa olunmuşdur. Uzun illər ağır şəraitdə kənd uşaqlarının təlim-tərbiyəsi ilə məşğul olmuş müəllimlər rahat, yaraşıqlı, bütün dərsliklər və tədris ləvazimatları ilə təchiz olunmuş məktəbin tikilməsini Heydər Əliyev Fondunun, onun prezidentinin kənd camaatına çox böyük hədiyyəsi kimi qiymətləndirmişlər. Mehriban xanım Əliyeva müəllimlərin qayğıları, onları düşündürən məsələlərlə də maraqlanmışdır. Müəllimlər Heydər Əliyev Fondunun müxtəlif sahələrdə həyata keçirdiyi genişmiqyaslı layihələrin Azərbaycanın tərəqqisində, milli-mənəvi dəyərlərimizin qorunmasında, gənc nəslin təlim-tərbiyəsində, sağlamlığının qorunmasında əhəmiyyətli rolundan razılıqlarını ifadə etmişlər[8].

2008-ci il dekabrın 11-də 1974-1976-cı illərdə bu məktəbdə təhsil almış, xeyriyyəçi Lətif Əsədov Bərdə rayonunun Yasif Kərimov adına Yeni Daşkənd kənd tam orta məktəbində olmuş, öz yardım əlini uzadaraq məktəbin istilik sistemini əsaslı təmir etdirmişdir[9].

2012-ci il sentyabrın 15-də Beynəlxalq Diaspor Mərkəzinin (BDM) təşkilatçılığı ilə Bərdə rayonunun Yeni Daşkənd kəndində şəhid Yasif Kərimovun adını daşıyan orta məktəbdə şəhidin xatirəsinə ucaldılmış büstün açılışı və eyni zamanda şəhid Y.Kərimovun keçdiyi həyat yolu və qəhrəmanlığından bəhs edən "Ömrün şəhidlik zirvəsi" kitabının təqdimat mərasimi keçirilmişdir[10].

2013-cü il Azərbaycan Respublikası prezidenti seçkiləri məktəbin binasında (33 saylı məntəqə) keçirilmişdir[11].

Məktəbin direktorları[redaktə | əsas redaktə]

№ Direktor İşlədiyi illər Qeyd
1 Əliyev Tapdıq Xıdır oğlu 1953-1965 ilk direktor
2 Həsənov Bostan Yunis oğlu 1965-1972
3 Əliyev Namaz Nurməhəmməd oğlu 1972-1974
4 Əsədova Səmayə Yusif qızı 1974-1984
5 Süleymanov Vidadi Salman oğlu 1984-1999
6 Əsədov Bilal Həbib oğlu 1999-2006
7 Hümbətova Səfurə Kamran qızı 2006-2007
8 Hümbətova Gülbəniz Kamran qızı 2007-2018
9 Qocamanov Elgün Zöhrab oğlu 2018-indi

Qəbul kampaniyalarının nəticələri[redaktə | əsas redaktə]

"Biologiya" fənni üzrə məktəbin orta göstəriciləri respublika üzrə orta səviyədən yüksək, "Ana dili", "Ədəbiyyat", "Riyaziyyat", "Fizika", "Kimya", "Tarix", "Coğrafiya", "İngilis dili", "Ümumi fənn bloku" fənləri üzrə isə aşağı olmuşdur. İlbəil qəbul kampaniyasına nəzərən fənlər üzrə düzgün cavabların faizinin artması müşahidə olunur. Orta hesabla 1995-2012-ci illərdə keçirilmiş qəbul kampaniyalarının nəticələrinə görə məktəbin oğlan məzunlarının göstəriciləri qız məzunlarının göstəricilərindən "Riyaziyyat", "Tarix", "Coğrafiya" fənləri üzrə, qız məzunlarının göstəriciləri isə "Ana dili", "Ədəbiyyat", "Fizika", "Kimya", "Biologiya", "İngilis dili", "Ümumi fənn bloku" fənləri üzrə yüksək olmuşdur[12].

Ən qabaqcıl məzunlar[redaktə | əsas redaktə]

İllər Soyadı, adı, atasının adı Topladığı bal Daxil olduğu təhsil ocağı
2006 Hacıyeva Quba Knyaz qızı 581.286 Azərbaycan Tibb Universiteti
2008 Əmrahov Xeybər Əflatun oğlu 620.000 Bakı Dövlət Universiteti
2011 Müzəffərli Eşqin Şöhrət oğlu 625.000 Azərbaycan Dövlət İqtisad Universiteti
2012 Bayramova Gözəl Zərbəli qızı 539.000 Azərbaycan Dillər Universiteti
2016 Abdullayeva Aytən Abdulla qızı 547.000 Azərbaycan Dillər Universiteti
2017 Hüseynli Nigar Elmar qızı 562.000 Azərbaycan Tibb Universiteti

Məşhur məzunları[redaktə | əsas redaktə]

İstinadlar[redaktə | əsas redaktə]

  1. ↑ Ümumi təhsil müəssisələrinin siyahısı: Bərdə rayonu
  2. ↑ Bərdə rayonu orta məktəbləri
  3. ↑ BƏRDƏ RAYON ÜMUMTƏHSİL MƏKTƏBLƏRİ HAQQINDA MƏLUMAT
  4. ↑ Bərdədə yeni məktəb binası tikilir
  5. ↑ BƏRDƏDƏ YENİ MƏKTƏB BİNASI TİKİLİR. Azər TAc. "Azərbaycan müəllimi" qəzeti, 19 yanvar, 2006-cı il
  6. ↑ Bərdədə yeni məktəb binası tikilir. Azər TAc. "Azərbaycan" qəzeti, 12 yanvar, 2007-ci il
  7. ↑ Bərdədə yeni məktəblər tikilir
  8. ↑ Mehriban Əliyeva Tərtər və Bərdə rayonlarında orta məktəblərlə tanış olub
  9. ↑ Araz Yaquboğlu, "Bitməyən ömür", Bakı, "Nurlar", 2013. səh.231 (azərb.)
  10. ↑ BDM BƏRDƏDƏ TƏDBİR KEÇİRƏCƏK. Milliyyət internet saytı
  11. ↑ Seçki dairələri
  12. ↑ Məktəb məzunlarının göstəricilərinin dinamikasının təhlili (1995-2012-ci illərdə keçirilmiş qəbul kampaniyalarının nəticələri əsasında)
Mənbə — "https://az.wikipedia.org/w/index.php?title=Yasif_Kərimov_adına_Yeni_Daşkənd_kənd_tam_orta_məktəbi&oldid=4564113"