Zülfüqar Quliyev

Vikipediya, azad ensiklopediya
Jump to navigation Jump to search
Zülfüqar Quliyev
Zülfüqar Mustafa oğlu Quliyev
Zulfuqar Quliyev.jpg
Doğum tarixi 3 iyun 1932(1932-06-03)
Doğum yeri Gədəbəy rayonu, Gədəbəy
Vəfat tarixi 12 fevral 2012 (79 yaşında)
Vəfat yeri Bakı, Azərbaycan
Elm sahəsi Zoologiya
Elmi dərəcəsi Elmlər doktoru
İş yeri AMEA Zoologiya İnstitutu

Zülfüqar Mustafa oğlu Quliyev - Azərbaycanın tanınmış ixtioloq alimi.

Həyatı[redaktə | əsas redaktə]

Zülfüqar Mustafa oğlu Quliyev 3 iyun 1932-ci ildə Gədəbəy rayonunun Gədəbəy qəsəbəsində müəllim ailəsində anadan olmuşdur. 1956-cı ildə Azərbaycan Dövlət Universitetini fərqlənmə diplomu ilə bitirdikdən sonra 3 il müddətində qəsəbə orta məktəbində pedaqoji fəaliyyətlə məşğul olmuşdur. Biologiya elmləri doktoru, tanınmış ixtioloq-alim Zülfüqar Mustafa oğlu Quliyev 2012-ci il fevral ayının 12-də Bakı şəhərində vəfat etmişdir[1].

Elmi fəaliyyəti[redaktə | əsas redaktə]

Zülfüqar müəllim 1958-ci ilin dekabrında Azərbaycan Elmlər Akademiyasının Zoologiya İnstitutunda ixtiologiya ixtisası üzrə aspiranturaya daxil olmuşdur. O, akademik A.N. Derjavinin rəhbərliyi altında “Kürətrafı ərazidə külmənin biologiyası və ehtiyatının vəziyyəti” mövzusunda yerinə yetirdiyi dissertasiya işini 1963-cü ildə müvəffəqiyyətlə müdafiə etmişdir. 1981-ci ilədək həmin institutda laborantdan laboratoriya müdiri vəzifəsinədək yüksəlmişdir. Z.M.Quliyev 1997-ci ildə “Cənubi və Orta Xəzər hövzəsinin çəki və xanıkimi balıqları populyasiyalarının strukturu, ekologiyası, yayılması və ehtiyatının bərpa olunması tədbirləri” mövzusunda doktorluq dissertasiyasını müdafiə etmiş, biologiya elmləri doktoru elmi dərəcəsi almışdır[2]. Zülfüqar müəllim 1981-2005-ci illərdə Azərbaycanda balıqçılıq təsərrüfatı ilə bağlı olan müxtəlif unstitut və idarələrdə məsul vəzifələrdə çalışmışdır. 2005-ci ildə Zoologiya İnstitutunun “Su heyvanları” şöbəsinin müdiri vəzifəsinə seçilib və ömrünün sonunadək bu vəzifədə işləmişdir. Xəzər dənizi və daxili sututarların sənaye əhəmiyyətli balıq sərvətlərinin artırılması, forel təsərrüfatlarının yaradılması sahəsində Zülfüqar müəllimin xüsusi xidmətləri olmuşdur[3]. Həmkarları arasında həmişə böyük nüfuz sahibi olan Z.M.Quliyev 5 monoqrafiyanın, 260-dan yuxarı elmi əsərin müəllifidir. Onun rəhbərliyi altında 5 namizədlik dissertasiyası müdafiə olunmuşdur[4].

Əsas elmi əsərləri[redaktə | əsas redaktə]

  • Рыбы залива Кирова Каспийского моря (1989)
  • Жерех (характеристика вида в пределах ареала) (1995)
  • Промысловые рыбы Нахичеванской Автономной Республики (2000)
  • Карповые и окуневые рыбы Южного и Среднего Каспия (2002)
  • Xəzərin əsrarəngiz balıqları (Biomüxtəliflik) (2003)
  • Azərbaycanın heyvanlar aləmi (2004) kitabı, III cild. “Balıqlar” hissəsi
  • Форели Азербайджана (2005)
  • Azərbaycanda əmtəə balıqçılığı (2006) və başqaları

Elmi qurumlarda üzvlüyü, təltifləri və mükafatları[redaktə | əsas redaktə]

Z.M.Quliyev Türkiyədə nəşr olunan “Təbiət və mühəndislik elmləri” Beynəlxalq jurnalın redaksiya heyətinin üzvü olmuşdur. O, apardığı tədqiqatların nəticələri haqqında müntəzəm olaraq Moskva, Leninqrad və keçmiş SSRİ-nin digər şəhərlərində keçirilən elmi konfranslarda, konqreslərdə və simpoziumlarda mərüzələrlə çıxış etmişdir. Zülfüqar müəllim 1992-ci ildə yaradılmış və 5 Xəzəryanı ölkə mütəxəssislərin təmsil olunduğu “Xəzər Bioloji Sərvətlər Komissiyasının” hər ilin sonunda keçirilən yığıncaqlarında Cənubi Xəzərdə aparılan ixtioloji tədqiqatların yekunu barədə məruzələr etmişdir. Əmək veteranı ordeninə və AMEA-nın fəxri fərmanına layiq görülmüşdür.

İstinadlar[redaktə | əsas redaktə]

  1. Zoologiya İnstitutu
  2. Zoologiya İnstitutunun əsərləri, XXVIII cild, Bakı: Elm, 2006, s. 952-954.
  3. Azərbaycan SSR Elmlər Akademiyası Zoologiya İnstitutu – 50 il. Bakı: Elm, 1987, s. 95-99.
  4. AMEA