Məqsəd Nur

Məqsəd Nur
Sarıyev Məqsəd Nuru oğlu
Doğum tarixi	1968
Doğum yeri	Azərbaycan Respublikası. Kəlbəcər rayonu, Zülfüqarlı kəndi.
Vətəndaşlığı	Azərbaycan Respublikası
Milliyyəti	türk
Təhsili	ali
İxtisası	yazıçı-jurnalist
Fəaliyyəti	yazıçı, jurnalist
Fəaliyyət illəri	1988
Janr	nəsr
Tanınmış əsəri	"Şəhər meri" romanı
Mükafatları	Milli Kitab Mükafatı (2011)

Məqsəd Nur 1968-ci ildə anadan olub. 1988-ci ildə "Mingəçevir işıqları" qəzetində peşə fəaliyyətinə başlayıb. Elə həmin il gənclərin həyatından yazdığı bir çox məqalə və reportajlara görə qəzetin illik mükafatını alıb.

1989–1993-cü illər arasında Azərbaycanın bir çox aparıcı qəzetlərində hərbi reportyor və fotoreportyor kimi çalışıb. Bu illərdə Qafqazda, Rusiyada və Azərbaycanda baş verən qaynar hadisələrin içindən hazırladığı reportajları, müsahibələri və fotoşəkilləri ilə tanınıb. 1993–1998-ci illər arasında həftəlik "Press-fakt" qəzetinin baş redaktoru və qurucusu olub. Qəzet bu illərdə ədəbi-bədii, ictimai-siyasi, intellektual mühitdə ən öndə gedən və art-sektorun ən avanqard sahələrini təmsil edən tanınmış mətbu orqanlardan biri olub. Məqsəd Nurun ilk ədəbi yazıları da bu qəzetdə yaratdığı "Yarıqaranlıq" rubrikasında dərc edilib. Bu rubrika altında yazılmış ilk miniatür hekayələri o vaxtın ictimai əhvalının mahiyyətini açır, eyni zamanda sovet dövründən qalmış yazı və düşüncə stereotiplərini yeniləyirdi. "Yarıqaranlıq" silsiləsində yazıçı dövrün qarma-qarışıqlarını əks etdirir, qəhramanlarının psixoloji sıxıntılarını, lokal konfliktlər məngənəsində əziyyət çəkən sadə insanların həyatını qələmə alırdı.

1993-cü ildə Məqsəd Nur dostu, ədəbiyyatşünas Tehran Əlişanoğlu ilə "YeniSi" Ədəbiyyat və Mədəniyyət Təzahürləri Mərkəzini yaradır. Daha sonra, Məqsəd Nurun təşkilatçılığı ilə Azərbaycanda ilk anadilli ədəbiyyat saytı — www.yenisi.net və bu saytın içərisində ədəbi müzakirələr üçün forum — www.yenisi.net/forums yaradılır. Bu, Azərbaycanda çağdaş və avanqard ədəbiyyat yazarlarını birləşdirən ilk sayt və ədəbi müzəkirələri Azərbaycan dilində internet məkana çıxaran ilk ədəbiyyat forumu idi. Burada 30-dan çox gənc müəllif birləşirdi. Sayt hər həftə yenilənir və forumlarda ədəbi mübahisələr, müzakirələr aparılırdı.

Məqsəd Nurun əsərləri Azərbaycanın bir çox mətbu orqanlarında, ədəbi nəşrlərində, o cümlədən Özbəkistan (Caxon edebiyyatı), Rusiya (Proza.ru), Türkiyə (Yeddi iklim), Gürcüstanda (Alternativa) dərc edilib. Müəllifin əksər əsərlərinin rus dilinə tərcüməsi daha çox rusdilli internet oxucularının arasında populyarlaşıb:

http://www.proza.ru/avtor/magsad

Əsərləinin internet resursunda tanınmasına və oxucu kütləsi yığmasına görə Məqsəd Nur Rusiyanın məşhur Lib.ru saytının fəxri redaktoru seçilib. Sankt-Peterburqda yerləşən və dünyanın rusdilli internet şəbəkəsində çox tanınan və sayılan Litsovet.ru portalının 7000-dən çox müəllifi sıransında Məqsəd Nur saytın reytinq cədvəlinin 3-cü pilləsinədək irəliləyə bilib. 2006-cı ilin əvvəlində bu saytın "superonluq" adlı müsabiqəsində 7-ci yerə nail olub. Müəllifin 2 əsəri –"Gəlmə" və "Vasili Daniloviçin Orkestri" hekayələri Litsovet.ru-nun kitabxanasına daxil edilib.

Məqsəd Nurun ümumi yazı stilistikası və yazı dili onu bir müəllif kimi fərqləndirir. Bu, azad, sərbəst düşüncə tərzi, o cümlədən milli köklərə bağlı fərqli bir prozadır.

"Tərs kimi" hekayələr toplusu (2005), "Şəhər Meri" romanı (2011), "Oliqarxın alaçığı" roman və silsilə hekayələr (2023) kitablarının müəllifidir.

"Şəhər Meri" romanı Milli Kitab Mukafatının (2011)qalibidir. "Şəhər meri" romanı bir neçə əcnəbi dilə tərcümə olunarq digər ölkələrdə ayrıca kitab şəklində nəşr olunub (Gürcüstan, Türkiyə, İran). Roman Ukraynada — "Vsesvit" jurnalında, Rusiyada — "Nezavisimaya qazeta"da dərc edilib.