Zakir Qəmərli
| Zakir Qəmərli | |
|---|---|
| Doğum tarixi | 12 oktyabr 1942 (81 yaş) |
| Doğum yeri | |
| Elmi dərəcəsi | |
Zakir Qəmərli (Qəmərli Zakir Paşa oğlu; d. 12 oktyabr 1942. Kirovabad, Azərbaycan SSR, SSRİ) — Tibb elmləri doktoru, professor (1995). B.N.Yeltsin adına Qırğızıstan‑Rusiya Slavyan Universitetinin onkologiya, şüa diaqnostikası və terapiya kafedrasının müdiri.
Həyatı
Qəmərli Zakir Paşa oğlu 1942-ci il oktyabrın 12-də Azərbaycan SSR-nin Kirovabad (indiki Gəncə) şəhərində anadan olub. 1960-cı ildə həmin şəhərdə orta məktəbin rus bölməsini bitirib. 1961-ci ildə Qırğızıstan Dövlət Tibb İnstitutuna daxil olub, 1967-ci ildə ali məktəbi bitirib. Həmin ildən başlayaraq, Z.Qəmərlinin bütün fəaliyyəti Qırğızıstan onkologiya xidməti ilə ayrılmaz surətdə bağlıdır. O, 30 il Qırğızıstan Elmi-Tədqiqat Onkologiya və Radiologiya İnstitutunda işləyib. Adi həkimlikdən başlayıb, sonra şöbə müdiri olub, əyani aspiranturada oxuyub (1971-1974), institutun elmi katibi (1974-1978), direktorun elmi işlər üzrə müavini (1978-1985) olub. 1985-ci ildə Z.Qəmərli Moskvaya doktoranturaya göndərilib, 1986-cı ilin dekabrında isə Moskvadan geri çağırılıb və Qırğızıstan Elmi-Tədqiqat Onkologiya və Radiologiya İnstitutunun direktoru təyin edilib, 1997-ci ilə qədər orada işləyib. 1997-ci ildən indiyə qədər – B.N.Yeltsin adına Qırğızıstan-Rusiya Slavyan Universitetinin Tibbi Mərkəzinin kafedra müdiri və eyni zamanda direktorudur.
Z.Qəmərli 1975-ci ildə Daşkənddə tibb elmləri namizədi alimlik dərəcəsi almaq üçün, 1988-ci ildə isə Moskvada tibb elmləri doktoru alimlik dərəcəsi almaq üçün dissertasiya müdafiə edib. 1995-ci ildə Z.Qəmərliyə professor elmi adı verilib.[1]
Təltif və mükafatları
Z.Qəmərli Qırğız Respublikasının Səhiyyə Əlaçısıdır. 2003-cü ildə ona “Qırğız Respublikasının Əməkdar Elm Xadimi” fəxri adı verilib.
2004-cü ildə Qırğızıstan prezidenti Əsgər Akayevin fərmanı ilə tibb sahəsindəki xidmətlərinə görə Zakir Qəmərliyə Qırğızıstanın Əməkdar həkimi fəxri adı verilmişdir.[2]
İstinadlar
- ↑ Bağıyeva, Mətanət. Xaricdə yaşayan azərbaycanlılar. Qısa bioqrafik məlumat kitabçası (PDF) (az.). Bakı: "Papirus NP". 2016. ISBN 978-9952-8299-1-4. 2017-10-21 tarixində arxivləşdirilib (PDF). İstifadə tarixi: 2017-10-21.
- ↑ AZƏRTAC. "SOYDAŞIMIZA QIRĞIZISTANIN ƏMƏKDAR HƏKİMİ FƏXRİ ADI VERİLMİŞDİR" (az.). azertag. 2004-02-25. İstifadə tarixi: 2019-01-08.