Sarutahiko

XIX əsrə aid bir Sarutahiko təsviri.

Sarutahiko (猿田毘古) – Amaterasunun Niniqini Yerə hökmranlıq etməsi üçün göndərməsindən öncə cənnətlə Yeri əlaqələndirən Uçan körpünün qoruyucusu. "Okami" (大神, azərb. Böyük tanrı‎) tituluna malikdir. Sarutahiko incəsənətdə uzun saqqala malik nəhəng kimi təsvir olunur. Bədənindən işıqlar çıxır və daş-qaşlı nizə daşıyır. Yolların və keçidlərin tanrısı hesab olunur. Niniqiyə qarşı olan son Yer tanrılarından olan Sarutahiko körpünü tərk etməyi rədd etmişdir.

Cənnət tanrılarının heç biri (ən azından kişi olanlar) ona qarşı gəlməyə cürət edə bilmirlər. Lakin sonda şəfəq ilahəsi Uzume önə çıxaraq onunla qarşılaşacağını bildirir və körpüyə inamla irəliləyir. Körpüyə çatanda rəqs edərək gözəllik və zərifliyini güclü tanrıya nümayiş etdirir. Uzumenin gözəlliyindən təsirlənən Sarutahiko onun tələbinə qulaq verərək Niniqiyə sadiq olmağı qəbul edir. Əvəzində isə onunla evlənmək istədiyini bildirir və Uzume təklifi qəbul edir. Onların xoşbəxt evliliyi olur.

Bu iki tanrının məzarlarına həsr olunmuş şinto məbədi Mie prefekturasının Tsubaki Day məbədində yerləşir. 2000 yaşı olduğu irəli sürülən bu məbəd hələ də ayaqdadır.

Ədəbiyyat

• Roberts, Jeremy, Japanese Mythology from A to Z, Chelsea House, 2010, ISBN 978-1-4381-2802-3