Cavanşir Feyziyev

Vikipediya, azad ensiklopediya
Naviqasiyaya keç Axtarışa keç
Cavanşir Feyziyev
Doğum tarixi 12 iyul 1963(1963-07-12) (60 yaş)
Doğum yeri
Fəaliyyəti alim, siyasətçi
Elmi dərəcəsi
  • fəlsəfə üzrə fəlsəfə doktoru[d]
Üzvlüyü
cavansir.feyziyev.com
Vikianbarın loqosu Vikianbarda əlaqəli mediafayllar

Cavanşir Feyziyev (Cavanşir Əyyub oğlu Feyziyev; d. 12 iyul 1963, Şəki) — Azərbaycan Respublikası Milli Məclisinin V çağırış deputatı[1] , Mədəniyyət komitəsinin üzvü, Beynəlxalq münasibətlər və parlamentlərarası əlaqələr komitəsinin üzvü.

Həyat və fəaliyyəti

Cavanşir Feyziyev 1963-cü ildə Şəki rayonunun Böyük Dəhnə kəndində anadan olmuşdur.[2] 1970-1977-ci illərdə Böyük Dəhnə kənd orta məktəbində, 1977-1980-ci illərdə Turan qəsəbəsi riyaziyyat təmayüllü internat məktəbdə orta təhsil almışdır.

  • 1983 - 1985 Qazaxıstanda həqiqi hərbi xidmətdə olmuşdur.
  • 1986 - 1991-ci illərdə Azərbaycan Pedaqoji Xarici Dillər İnstitutunun tərcümə fakültəsində təhsil almış və institutu tərcüməçi-müəllim ixtisası üzrə Fərqlənmə Diplomu ilə bitirmişdir.
  • 1992 - 1994-ci illərdə Azərbaycan Pedaqoji Xarici Dillər İnstitutunun tərcümə kafedrasının müəllimi vəzifəsində işləmişdir.
  • 1994 - 1995-ci illərdə Belçikanın «Sərhədsiz həkimlər» humanitar təşkilatında tərcüməçi və inzibatçı vəzifələrində çalışmışdır.
  • 1995 - 1998-ci illərdə ABŞ-nın Filip Morris ing. Philip Morris şirkətinin Qafqaz nümayəndəliyində Azərbaycan üzrə şöbə müdiri işləmişdir.
  • 1998 - 2002-ci illərdə ing. «Planet Co. Ltd» şirkətinin təsisçisi və direktoru olmuşdur.
  • 2002 - 2010 «AvroMed» şirkətinin həmtəsisçisi və baş direktoru olmuşdur. ing. «Tour-İnvest» şirkətinin və ing. «Discovery Azerbaijan» elmi-kütləvi jurnalının təsisçi və baş redaktorudur.
  • 2004 - 2009-ci illərdə Azərbaycan Respublikası Milli Elmlər Akademiyasının Fəlsəfə, Sosiologiya və Hüquq İnstitunun dissertantı olmuşdur.
  • 2010 - Azərbaycan Respublikasının 4-cü çağırış Milli Məclisinə 115 saylı Şəki kənd ikinci seçki dairəsindən deputat seçilmişdir.
  • 2011 - Azərbaycan Respublikası Milli Elmlər Akademiyasının Fəlsəfə, Sosiologiya və Hüquq İnstitutunun doktorantıdır.
  • 2013 - Azərbaycan Respublikasının Mətbuat Şurasının İdarə Heyətinin üzvü seçilmişdir.
  • 2015 - Azərbaycan Respublikasının 5-ci çağırış Milli Məclisinə 115 saylı Şəki kənd ikinci seçki dairəsindən deputat seçilmişdir. [2]

Elmi fəaliyyəti

Azərbaycanda Fransız İnstitutunda keçirilmiş "Le Carrefour" qəzetinin təqdimatında, 5 aprel 2017-ci il[3]

2004-2009-cu illərdə Azərbaycan Respublikası Milli Elmlər Akademiyasının Fəlsəfə, Sosiologiya və Hüquq İnstitutunun dissertantı olmuş, 2009-cu ilin oktyabr ayında «Etno–siyasi münaqişələrin mənəvi aspektləri» mövzusvunda dissertasiya müdafiə etmiş və və fəlsəfə üzrə fəlsəfə doktoru elmi dərəcəsi almışdır.

2002-ci ildə «Qafqazda etno-siyasi münaqişələr və onların dövlət müstəqilliyinə təsiri» adlı kitabı ingilis dilində, 2008-ci ildə «Sülh fəlsəfəsi» adlı elmi-publisistik kitabı və 2013-cü ildə “Türk Dövlətləri Birliyi: qlobal inteqrasiyanın Avrasiya modeli” adlı kitabı Azərbaycan dilində çap olunub. 2014-2017-ci illərdə “Türk Dövlətləri Birliyi: qlobal inteqrasiyanın Avrasiya modeli” adlı kitabı türk, qazax, qırğız, rus, boşnak və macar dillərinə tərcümə olunaraq həmin ölkələrdə nəşr olunmuşdur.[2]

2017-ci ildə Türk Dünyası adlı 5-cildlik toplu nəşr edilmişdir.

  • "Türk dünyasının təməl dəyərləri";
  • "Türk xalqları";
  • "Türk dövlətçiliyi tarixi";
  • "Türkşünaslıq";
  • "Türk dünyasının tarixi şəxsiyyətləri".

2015-ci ildə Fransa tarixçisi Jorj dö Mallevilin “1915-ci il erməni faciəsi” adlı kitabını Azərbaycan dilinə tərcümə edərək nəşr etdirmişdir. 2016-cı ildə Fransa yazıçısı, Nobel mükafatı laureatı Patrik Modianonun “Məhəllədə azmamaq üçün” adlı romanını Azərbaycan dilinə tərcümə etmişdir. 2018-ci ildə Fransa yazıçısı Jan Kristof Rufenin “Böyük ürək” romanını Azərbaycan dilinə tərcümə etmişdir.

60-dan çox elmi məqaləsi Azərbaycan, Türkiyə, ABŞ, Qazaxıstan, Ukrayna və Rusiyanın müxtəlif elmi nəşrlərində dərc olunmuşdur. Dövri mətbuatda ictimai-siyasi və tarixi-fəlsəfi mövzularda 100-dən çox məqalənin müəllifidir. Azərbaycan, rus, türk, fransız və ingilis dillərini bilir.

Siyasi fəaliyyəti

2010-cu ilin 7 noyabr parlament seçkilərində 115 saylı Şəki kənd ikinci seçki dairəsindən Azərbaycan Respublikasının 4-cü çağırış Milli Məclisinə deputat seçilmişdir. 2015-ci ilin 1 noyabr parlament seçkilərində 115 saylı Şəki kənd ikinci seçki dairəsindən Azərbaycan Respublikasının 5-ci çağırış Milli Məclisinə deputat seçilmişdir. Milli Məclisin Beynəlxalq münasibətlər və parlamentlərarası əlaqələr komitəsinin, eləcə də Mədəniyyət Komitəsinin üzvüdür.[2]

Azərbaycan – Böyük Britaniya və Azərbaycan - Fransa parlamentlərarası işçi qruplarının rəhbəridir. Azərbaycan Respublikasının Milli Məclisi ilə İsveçrə, Macarıstan, Bosniya-Herseqovina, Qırğızıstan və Yaponiya parlamentləri arasında işçi qrupların üzvüdür. Türkdilli ölkələrin Parlament Assambleyasında Milli Məclis nümayəndə heyətinin üzvüdür. AVRONEST Parlament Assambleyasında Milli Məclis nümayəndə heyətinin üzvüdür.[2]

2017-ci ilin yanvar ayından Avropa İttifaqı - Azərbaycan Parlament Əməkdaşlıq Komitəsinin həmsədridir.

İctimai fəaliyyəti

2005-ci ildən “Discovery Azerbaijan” adlı elmi-kütləvi jurnalın təsisçisi və baş redaktorudur. “Azərbaycan-Qazaxıstan Dostluq Cəmiyyəti” İctimai Birliyinin həmtəsisçisidir. 2010-cu ildən etibarən Azərbaycan Jurnalistlər Birliyinin üzvüdür. 2013-cü və 2018-ci illərdə Azərbaycan jurnalistlərinin VI və VII qurultaylarında Azərbaycan Mətbuat Şurası İdarə Heyətinin üzvü seçilmişdir. 2015-ci ildə Kolmar ( Fransa) şəhərinin Fəxri Səfiri elan olunmuşdur. 2018-ci ildən Azərbaycan Yazıçılar Birliyinin üzvüdür.[2]

Təltiflər

  • 2005-ci ildə Şöhrət çələngi. Respublikanın müxtəlif ictimai təşkilatları tərəfindən dəfələrlə diplomlarla və fəxri fərmanlarla təltif olunmuş və 2005-ci ildə Avropa Biznes Assambleyası (London, Oksford) tərəfindən «Şöhrət çələngi» beynəlxalq mükafatı ilə təltif edilmişdir.
  • 2010-cu ildə «Qızıl qələm» mükafatı ilə təltif edilmişdir.
  • 2010-cu ildə Regionların social-iqtisadi inkişafı Dövlət Proqramının həyata keçirilməsində fəal iştirakına və əldə etdiyi nailiyyətlərə görə “Uğur” Milli Mükafatına layiq görülüb
  • 2014-cü ildə Fransa Respublikasının Kolmar şəhərinin Azərbaycanda Fəxri Səfiri elan olunmuşdur.
  • 2016-cı ildə Beynəlxalq Türk Akademiyasının qızıl medalı ilə təltif olunmuşdur.
  • 2016-cı ildə Qazaxstan Prezidentinin Fərmanı ilə “Qazaxstan Respublikasının müstəqilliyinin 25 illik yubileyi” medalı ilə təltif olunub.
  • 2018-cı ildə “Türk Dünyasının Şərəf medalı” ilə təltif olunub.[2]

İstinadlar

  1. ↑ Dördüncü çağırış Azərbaycan Respublikası Milli Məclisinin 2010-ci il 29 noyabr tarixli iclasın stenoqramı. meclis.gov.az  (az.)
  2. ↑ 1 2 3 4 5 6 7 Bioqrafiya
  3. ↑ Bakıda Frankofoniya həftələri çərçivəsində “Le Carrefour” qəzetinin təqdimatı keçirilib. azertag.az, 05.04.2017  (az.)

Xarici keçidlər

Vikianbarda Cavanşir Feyziyev ilə əlaqəli mediafayllar var.
Mənbə — "https://az.wikipedia.org/w/index.php?title=Cavanşir_Feyziyev&oldid=4550956"