İbrahim Bayramov

İbrahim Bayramov
İbrahim Məhəmməd oğlu Bayramov
İbrahim Məhəmməd oğlu Bayramov
Doğum tarixi	25 yanvar 1954
Doğum yeri	Toxluca, Çəmbərək rayonu, Ermənistan SSR, SSRİ
Vətəndaşlığı	SSRİ→ Azərbaycan
Elm sahəsi	filologiya
Elmi dərəcəsi	filologiya elmləri doktoru
Elmi adı	professor
İş yeri	ADPU-nun aspirantura və doktorantura şöbəsinin müdiri
Təhsili	Ermənistan Dövlət Pedaqoji Universiteti
Tanınır	toponomist alim

İbrahim Məhəmməd oğlu Bayramov — filologiya elmləri doktoru, professor, ADPU-nun aspirantura və doktorantura şöbəsinin müdiri, Yeni Azərbaycan Partiyasının üzvü.

Həyatı

İbrahim Bayramov 25 yanvar 1954-cü ildə Qərbi Azərbaycanın Göyçə mahalının Toxluca kəndində anadan olub. 1971-ci ildə Toxluca kənd orta məktəbini, 1975-ci ildə isə İrəvan şəhərindəki Ermənistan Dövlət Pedaqoji İnstitutunun filologiya fakültəsinin Azərbaycan şöbəsini fərqlənmə diplomu ilə bitirmişdir. 1977-1981-ci illərdə Azərbaycan MEA-nın Nəsimi adına Dilçilik İnstitutunun aspiranturasında oxumuşdur.

1975-1988-ci illərdə Toxluca kənd orta məktəbində Azərbaycan dili və ədəbiyyatı müəllimi və məktəb direktoru vəzifəsində işləmişdir. 1986-cı ildə «Müasir Azərbaycan ədəbi dilinin xalq danışıq dili hesabına zənginləşməsi yolları (leksika və frazeologiya)» mövzusunda namizədlik, 2007-ci ildə «Ermənistanın türk mənşəli toponimlərinin tarixi-linqvistik təhlili» mövzusunda doktorluq dissertasiyası müdafiə etmişdir. Filologiya elmləri doktorudur.

1995-ci ildən Azərbaycan Dövlət Pedaqoji Universitetinin Müasir Azərbaycan dili kafedrasında işləyır. 2009-cu ildə ADPU-nun Filologiya fakültəsinin «Müasir Azərbaycan dili» kafedrasının professoru vəzifəsinə seçilmişdir. 2003-cü ildən ADPU-nun magistratura və doktorantura şöbəsinin müdiri vəzifəsində işləyir.

Yeni Azərbaycan Partiyasının üzvüdür.

2009-cu ildən ADPU-da fəaliyyət göstərən Dissertasiya Şurasının üzvüdür. 150-dən çox elmi, elmi-metodik və publisistik məqalələri çap olunmuşdur.

Yaradıcılığı

İbrahim Bayramovun “Qərbi Azərbaycan şivələrinin leksikası” əsəri mühüm əhəmiyyət kəsb edir. Əsərdə toplanan dialekt sözləri Qərbi Azərbaycan məişətini, mədəniyyətini, tarixini, etnoqrafik xüsusiyyətlərini, yaşam tərzini tamamilə ifadə edir.

Kitabları

1. "Ermənistan azərbaycanlılarının tarixi coğrafiyası", Bakı, 1995. (ortaqlı)
2. «Истoрическая география Заподного Азербайджана». Баку: 1998. (в соавторстве)
3. "Müasir Azərbaycan ədəbi dilinin zənginləşməsi yolları" (dərs vəsaiti), Bakı, 1999.
4. "Qərbi Azərbaycan toponimlərinin təkibində işlənən söz və coğrafi terminlər lüğəti", Bakı, "Elm", 2000.
5. "Qərbi Azərbaycanın türk mənşəli toponimləri", Bakı, "Elm", 2002. 696 səh. 500 tiraj. Arxivləşdirilib
6. "Qərbi Azərbaycanın toponimlər sistemi", Bakı, "Elm", 2005. 432 s.
7. "Qərbi Azərbaycan şivələrinin leksikası" (dərs vəsaiti). Bakı, "Elm və təhsil", 2010.
8. "Qərbi Azərbaycan: tarixi həqiqətlər və ya Ermənistanın etnik təmizləmə siyasəti". Bakı, "Şərq-Qərb", 2012. 288 s.

Məqalələri

1. "Kitabi-Dədə Qorqud"dakı Altuntaxt toponimi,//Pedaqoji Universitet Xəbərləri (humanitar elmlər seriyası). Bakı: ADPU, 1999, s.61-68.
2. "Göyçə gölü" hidronimi haqqında,//Pedaqoji Universitet Xəbərləri, №4, Bakı: ADPU-nun nəşri, 2002, s.197-204.
3. "Kitabi-Dədə Qorqud" kitabında Qərbi Azərbaycanın toponimləri və ya "Dədə Qorqud" kitabının coğrafi mühiti haqqında//Dədə Qorqud (elmi-ədəbi toplu), №2, 2007, s.21-23.